一连三期的专栏记录了笔者与DJ Tommy历时2小时的详尽访问。从他初出茅庐成为DJ开始，谈到短短3个月自学捽碟后成为香港冠军，继而代表香港参加世界赛。经历数次的征战，最终在96年获得世界排名第二的成绩。其后他透过滑板店老板Tabo认识软硬天师，参与林海峰的专辑制作后正式踏入本地主流音乐圈。DJ Tommy多年来合作单位无数，既是LMF成员之一，亦与陈冠希和陈奂仁合组唱片公司，并成为农夫的经理人。来到最后一期，将聚焦DJ Tommy与他多年好友DJ Galaxy的经历。在此再次感谢DJ Tommy接受访问。

波盛：你同好朋友兼好拍挡DJ Galaxy系点样认识㗎﹖

DJ Tommy：我系做灯光音响𠮶时识佢，佢好似系另一啲人介绍入去做，系佢之后话返畀我听，我都好模糊。佢话𠮶阵佢喺公司睇到我攞唱盘喺度玩，觉得好神奇，跟住就识咗。

佢都有参加香港DMC比赛，佢都赢咗好似系两次香港冠军，之后去咗法国比赛。后嚟我同佢希望将捽碟或者DJ依样嘢传落去，香港𠮶阵时好似无乜DJ学校，我哋就无咁劲做学校，纯粹做班教下人，一对一咁教。所以好早期应该96年左右，就同佢开咗DJ班。

佢一路都有教，我都有尝试过教，不过唔系好好，费事误人子弟。Galaxy真系教得好，教咗好多冠军出嚟。佢好有经验，好有方法。咁一路同佢音乐上又有合作，农夫《风生水起》系佢做，《日出而作》、《456Wing》依啲都系佢做嘅。因为我自己真系做唔晒，我记得𠮶阵时已经无瞓觉㗎喇。

波盛：你眼中嘅DJ Galaxy系一个点样嘅DJ﹖

DJ Tommy：佢𠮶阵时喺湾仔一啲Club度做过，夜晚8点定9点左右，打到天光6点𠮶啲嚟。咁当然唔系不停啦，中间有啲Band表演。Band就玩3个字，DJ就9个字，不断咁样交换，到2点定3点就全部DJ，好辛苦。

我记得上去睇佢打碟，系好多人跳舞㗎佢打𠮶阵时，做到好好气氛，因为佢Cut歌Cut得好快，所以我就觉得佢睇到舞池状况系点样，就即刻Cut歌，系一个好Club嘅DJ，好叻嘅DJ嚟，好识得控制所有场面。

做音乐方面亦都好有Idea，佢会谂到一啲好独特嘅声，令到你记得。所以我一做到某啲歌唔知点做，就会揾佢帮手做，佢系一个好有能力嘅拍挡。

波盛：中间有段时间你哋点解会组成Fake Alien，戴住外星人面具打碟﹖

DJ Tommy：Fake Alien系因为我哋谂Hip Hop DJ𠮶个既有印象点样去打破。我哋两个其实都好鬼钟意听EDM，因为听得太多歌，你唔会剩系忠于一样，一定系：“哗！依个世界咁多好嘢听嘅﹖”跟住又已经做咗一啲歌，摆咗上Beatport𠮶度卖，咁点样打碟呢﹖不如整个头盔，好似Daft Punk咁样，啲人就唔知你边个啦。咁就当一个新人，做个Alien，玩啲好外太空嘅声，就组成咗依队EDM组合。

然后𠮶阵又揾到Adidas合作，因为中国Adidas𠮶阵要整一对新鞋嘅宣传，佢啲三间系好阔，唔知咩系列，系好萤光好特别，所以想揾啲奇怪嘅人去宣传。咁佢哋就帮我哋做宣传，即系Fake Alien好似做咗代言人咁。跟住之后又好多Tour咁做咗一轮。

波盛：依个做法同以往咁唔同，感觉系点﹖

DJ Tommy：其实好正㗎可以打EDM，啲人又唔知你边个，亦都觉得你好过瘾。可以将之前整𠮶啲EDM打埋，又可以打埋自己钟意听𠮶啲歌。我记得有个Party喺西九，跟住又去咗长城打唔知万几二万人𠮶啲Party，跟住又去咗好多Tour，去𠮶啲Club，都有一段几正、好唔同嘅阶段，疑幻疑真咁。

我哋早期叫UFO DJs㗎，之后觉得唔系好型，就转咗做Fake Alien，讲出嚟好似简单啲。维持咗差唔多两年左右，但系辛苦在个头盔，我哋整咗好多个，已经最轻喇，但都系好重，好攰呀条颈。惨在Galaxy好唔舒服，好似颈椎有事，所以我哋之后就唔做喇，咁鬼辛苦。

波盛：你同DJ Galaxy又有另一个Project叫“磨拳擦掌”，我记得系喺疫情嘅时候开始上载好多教学片﹖

DJ Tommy：因为DJ Galaxy一路都有教，佢亦都喺伯乐𠮶度教好多学生。咁磨拳擦掌嘅出现，其实系我哋觉得香港有好多劲嘅DJ，好有潜质，或者系希望帮一啲自学唔到嘅人。通常我都叫人喺YouTube学咗先，真系唔得嘅就嚟揾我哋教你。

有啲人觉得佢系要有个老师教先学到，咁我哋就开呢个班。我哋做磨拳擦掌就录咗啲片，两个喺度捽下碟搞下笑，令到多啲人知道呢样嘢，就开始拍片啰。

其实疫情前已经开始做，咁突然间有疫情，啲人都唔出街，剩系上网睇手机，咁就拍多啲教学片咁，等啲人喺屋企自学下。其实早期DMC比赛𠮶个年代，我哋已经攞住𠮶啲机录嚟玩搞下笑。依家拍返片，啲人睇话我哋咁搞笑嘅。我哋其实好低B，唔好觉得我哋好Cool。

波盛：去到上年，你同DJ Galaxy就组成咗一个玩广东歌嘅组合8090 Mega Team。依个又有咩契机而开始﹖

DJ Tommy：我哋拍摩拳擦掌拍到开始啲嘢教晒咁济喇，跟住我就录咗段Cantopop嘅片，谂住转一转唔好放YouTube喇，转去IG度，畀啲学生或者觉得DJ好过瘾嘅人睇下啦。我又好熟𠮶啲广东歌，𠮶阵时打咁多，自己好钟意听，所以就录低咗，等啲人知道Cantopop可以咁玩，咁啱打Cantopop又兴。

我点样发现打Cantopop好兴呢，就系睇到你哋BEAT FRIDAY，好似系Canton Disco庆祝40周年嘅Party。𠮶阵我睇到系觉得：“咁正嘅﹖点解打返呢啲歌嘅﹖我𠮶个童年呀，我𠮶个最开心、啱啱初出茅庐嘅时候，我嘅出身就系呢啲歌。依家咁多人钟意听嘅﹖佢哋又打得咁好听，打依堆我全部都识。”

跟住就发现原来你哋玩咗Cantopop好耐，知道依家好兴，上网就越推越多依啲片畀我睇，发现咁多后生仔钟意嘅。我好开心听到呢啲歌，回到𠮶个年代，无谂过最开心𠮶啲嘢，依个年代都仲有，咁就谂不如揾Cantopop嚟示范。出咗依啲片之后，就开始有人揾我打Cantopop。

跟住有一次就去咗睇你哋。好得意㗎，因为我𠮶阵时成日都系打碟嘛，你喺DJ个台同喺下面听系两回事。我就第一次感受到，喺台下面听你哋打碟，𠮶种欢乐唔知点样形容，所以我就留咗咁多个钟听晒，因为好开心。

𠮶次令我联想起一个记忆，就系我有一次喺港大陆佑堂打碟。我要去洗手间就播咗只比较长啲嘅歌，Boys Town Gang嘅《Can’t Take My Eyes Off You》，然后即刻冲落去洗手间。去完返嚟经过下面个舞池，睇到啲人喺度跳舞好Enjoy一齐唱，我其实真系唔舍得上返个DJ台，我想喺度跳舞或者喺度感受𠮶种感觉。

好短十零廿秒㗎咋，好印象深刻，即系感受到台下跳舞，上面播紧𠮶只歌𠮶个感觉。我终于明点解啲人去听歌、去跳舞、去玩喇。呢个印象好深刻系，我自己打紧嘅歌，同你喺台下面听𠮶阵时，𠮶种气氛𠮶个感觉系完全两回事嚟。所以𠮶次嚟听你哋打碟𠮶阵时，我就系有几廿年前𠮶10秒嘅感觉，好开心。

咁就揾返Galaxy，因为𠮶个年代佢同我打呢啲歌。我就80年代开始做DJ，佢就90年代开始做DJ，不如求其改个名“8090 Mega Team”啦，谂咩名呢谂唔到呀，咁就整个打Cantopop嘅组合。因为我自己打唔到咁长时间，揾佢一齐撑下。

波盛：以前会系喺啲咩地方有Party打广东歌﹖

DJ Tommy：以前会喺大学𠮶啲会堂，中大港大都有，80年代尾已经有，好多㗎。𠮶阵时唔会好多Disco播中文歌，尖沙咀嘅Canton都好少中文歌，Eurobeat呀，New Beat呀或者New Wave𠮶啲会多啲。因为我夜晚落唔到，未够秤，系DJ Simon佢个Noon D三、四个钟会播一只嘅啫。𠮶阵好多Disco都唔播中文歌，但出边啲Party呢就好多中文歌，直程系必须，唔可以纯英文歌。

依家其实仲正啲，𠮶阵系纯跳舞，依家系会大合唱。𠮶阵时无大合唱㗎，边度够胆，𠮶阵啲人系著重跳舞，自己喺度跳或者几个人围圈喺度跳。同埋𠮶阵时播慢歌呢，譬如一晚9个字快歌，3个字慢歌，或者播4、5只慢歌，一播慢歌就熄晒灯，剩系Mirror Ball，啲男仔就请啲唔识嘅女仔跳舞。我哋喺台上面睇好过瘾，𠮶个年代话“食柠檬”就系话请唔到个女仔跳舞。跟住又见到好多请到女仔出嚟跳慢舞，揽住咁样，𠮶阵睇住佢哋好开心。

喺酒店有啦，喺大学又有，喺啲Party度见到啲人一对对咁媾到女喇。咁有时我见到啲人食咗几次柠檬，我就播多一只慢歌。咁跳紧𠮶啲人又开心，未揾到目标嘅就希望佢请到女仔出嚟跳舞，𠮶阵时就会咁啰。不过慢歌就英文歌为主，𠮶阵时有电影Soundtrack𠮶啲慢歌，系好爱情咁嘅Feel，中文歌好似少啲，英文歌比较浪漫啲。

依家啲人跳舞就含畜啲，定系有个文化就系向住个DJ。依家个状况就系望住你但又唔会跳得好尽㗎㖞，如果跳尽啲就会开心啲，一齐癫下嘛。但调返转头谂，佢哋会咁样系尊重你或者欣赏你。即系好似睇演唱会呢，有啲人钟意坐喺度，坐喺度𠮶啲可能好Enjoy，其实佢有佢Enjoy嘅方法。

波盛：依家嘅你喺DJ或者音乐上有无咩追求﹖

DJ Tommy：其实都真系无。我发觉我其实一路都好被动，我都无谂住打返Cantopop。系拍咗啲片，跟住就有人揾我打下碟。咁我就认真对待，出嚟打碟就要度好啲喇，起码自己觉得好听先。有时录返出嚟喺车度听，哗好正㖞，自己都想跳。我谂自己Enjoy紧要啰，而人哋又觉得唔错嘅，我谂依家系呢个方向。

波盛：如果睇紧依个访问嘅读者对DJ有兴趣，你有咩建议畀佢哋﹖

DJ Tommy：如果真系对 DJ 有兴趣或者学到有樽颈位，咁你就可以揾摩拳擦掌喇哈哈。揾DJ Galaxy！我系做风纪㗎啫，即系监督下。因为DJ Galaxy真系教得好，我估唔到佢为人师表咁好，教到咁多冠军出嚟。

其实如果自学到尽量自学啦，依家网络世界好容易，好多嘢教到你好深层次或者好仔细都有。如果你系一个自学叻嘅人，我觉得可以上网睇，自己摸下先。

波盛：经历咗咁多年嘅体会，依家喺你心目中点样为之一个好嘅DJ﹖

DJ Tommy：其实我觉得 DJ 就好似一个厨师或者好似一间餐厅，DJ亦都要有人听歌或者跳舞。即系一个厨师、一间食店，你都要有食客。点样为之好﹖我就觉得系入到黎听你𠮶个人，听你几首歌觉得唔错㖞，一路听，听到你完佢都仲留喺度听，会跳舞或者欣赏去听嘅，咁你就系一个好嘅 DJ 。

好似你去食店咁，觉得啲嘢难食，食咗几道菜你就走喇，咁可能真系做得唔好，即系差唔多嘅感觉。你要以你嘅能力服侍到咁多人，咁样先为之好。以前无咁样谂，以前听好多DJ讲话：“唔播呢啲歌就会好㗎喇！”即系有型啲，有品味。品味嘅嘢真系好个人，啲嘢好唔好食其实系你钟唔钟意食。好多人钟意食，你觉得唔好食，其实佢唔系一定唔好㗎，讲到尾都系钟唔钟意。