在对上三篇专栏，DJ Tommy非常详尽的分享了他整个职业生涯，当中绝对不能缺少他的多年好友兼工作伙伴DJ Galaxy。DJ Galaxy亦是一位著名的DJ，90年代开始活跃于本地DJ圈。他曾经多次夺得香港DJ大赛冠军，多年来亦致力推动DJ教育。感谢DJ Galaxy接受邀请，本月将先由他的DJ故事说起。

波盛：一开始系点样接触DJ呢样嘢﹖

DJ Galaxy：读小学五六年班𠮶阵时，我系钟意听跳舞音乐。听到点解啲歌可以接埋一齐嘅，我完全唔识但系觉得好型好听㖞。之后读中一，我有个朋友就有饼录音带，佢话呢个系DJ Simon。我谂如果系我哋嘅年代都会知道呢个人，因为佢好劲，对我嚟讲系一个学习对象。

我个同学问我录唔录，当然唔系免费啦。跟住我就比钱佢录。𠮶饼带我到而家都仲有Keep，我仲转咗做MP3，因为我觉得饼带好正，系一个学习嘅模式嚟。我曾经系听晒DJ Simon啲歌，买返佢啲歌。

后嚟有个朋友带我落Canton Disco，但系我哋落唔到夜晚，系落Noon-D，就见到真系DJ Simon 喺度。𠮶阵时我唔识佢，我见到佢同我哋差唔多大，但系好劲。佢系玩3个唱盘，转歌𠮶啲位系突然间可以搭第二个Chorus，到只歌唱完就另外一只歌出现。我𠮶阵觉得：“哗！好神奇！如果我可以成为佢咁就正喇。”

波盛：之后有无谂方法令呢样嘢成真﹖

DJ Galaxy：𠮶时系谂：“读紧中学边有可能呀。”又冇咩DJ学校，就算有我谂我老豆老母都唔会畀我做呢样嘢。直到出嚟做嘢就喺公司认识咗个朋友，佢有时会带啲录音带返嚟，佢又自己录咗啲Medley，我就有少少崇拜嘅心，好想同佢Friend。

之后佢就带我去一间灯光音响工程度做，就系𠮶度见到 Tommy 喇。𠮶阵时Tommy系帮公司录定啲录音带，做Mixtape畀啲社区会堂、船P，或者一啲派对冇Budget去畀DJ，就揾个人喺现场播。

我见到Tommy玩之后，就觉得相比自己个Friend，呢个好似劲好多㖞，即系你会感受到。我记得𠮶阵佢好似系录张立基嘅《Electric Girl》，佢将两只碟啲歌词调转嚟玩。之后倾咗两句，佢就Show咗少少，攞两只碟出嚟做咗少少Juggle，又捽几下。咁我觉得呢个人系有料到㗎㖞，我就开始死缠烂打，佢一喺公司我就会出现。

波盛：𠮶阵Tommy系点样教你﹖

DJ Galaxy：佢又唔系好正式咁教我，可能佢真系唔系好叻喺教学方面。佢又唔系唔教你，佢有讲你知，但系我要自己去理解跟住试。𠮶阵成日去佢屋企，因为我屋企无𠮶啲唱盘。我仲记得去佢屋企之前，系要买啲嘢畀佢食下。每次我搭巴士去，佢会话：“去沙田新城市广场肯德基买鸡脾吖。”我记得佢最钟意食鸡脾，到而家都系。咁我每次经过就去买，佢系有少少变咗我偶像𠮶只。

一开始跟Tommy系学Mixing先，玩下啲对Phrasing。最初嘅练习好艰辛，因为唔似而家咁有成套嘢。我屋企就有一套唱盘，系啱啱可以郁到个Pitch Control。但𠮶阵嘅唱盘唔系Direct Drive，系皮带带动所以会停盘，一推只碟就乱转。咁我就谂咗个方法系穷人玩法，如果要推快佢呢，揿住转速个掣嚟推。如果要拉慢佢，我就折咗张纸，跟住揩盘边令到佢慢，我𠮶时就系咁练习。

然后Tommy又同我讲，有啲位要计数㖞，唔系就咁计8拍。因为以前啲Old School 歌，可能会有啲中段系20拍，有啲系16拍。譬如我要16拍Mix 20拍，多咗4拍出嚟，一系加一系减，即系要计呢啲数。

佢得闲又会介绍我听啲歌。𠮶阵时我系听New Beat、Eurobeat、House𠮶类型。有次佢突然攞咗只Public Enemy嘅《911 Is A Joke》畀我听。我话：“哗！咩嚟㗎﹖点解唔系我平时听𠮶啲嘢嘅﹖”佢就话呢啲系Hip Hop，我就觉得好正，点解我未听过。佢又介绍啲录影带畀我睇，有次佢攞左DJ Simon 𠮶饼带畀我睇，我先发现原来DJ Simon都有参加世界赛，𠮶届应该90年。

就系𠮶时开始，日夜咁样成日去佢度，我试过系可以射波唔返工就系上去玩唱盘。当中嘅吸引力我都唔知，可能𠮶个年代唔系好似而家咁多嘢玩。咁我又觉得佢系偶像㖞，叫到就要去㗎喇。其实我睇佢玩嘅时间系多，因为我自己唔系太识。我就用学习模式心态，尝试听佢讲完啲嘢，凭我嘅记忆返屋企即刻练习。开始嘅时候系比较艰辛，但如果我唔去学，之后咪更加唔使学。我又好钟意，所以就好投入去做𠮶件事。

波盛：之后系咪跟跟下就跟埋Tommy去比赛﹖

DJ Galaxy：91年𠮶阵学咗唔系好耐，好似几个月，跟住𠮶年比赛好似唔够人，我就去参加，其实我惊到甩裤。我记得我系攞几只碟系咁玩，我觉得自己玩得唔好，真系惊呀，连落针都惊。同而家唔同，细个唔系𠮶种表演者嚟，唔系好想企上个台度畀人哋望到。但系𠮶次经验之后，都OK嘅。对我嚟讲，起码我知道原来自己唔够准备，上到个台就会好惊，呢啲系我吸收咗嘅经验嚟。

之后应该系93、94年，我已经差唔多玩咗一年几两年喇。𠮶阵我有个DJ朋友系玩DMC识嘅，都系我前辈。佢嚟我屋企睇过我玩，就叫我尝试下去Part Time。佢介绍我去尖沙咀嘅北海渔村，𠮶度系一个卡拉OK场嚟。𠮶阵Disco开始没落，开始用卡拉OK包装，可能半个钟卡拉OK半个钟Disco咁。

𠮶阵个DJ Head放假，就叫我顶，其实我好惊呀我想讲。我有落过去参考睇下嘅，但原来去到实战我系失败。我去探我个Friend班，以为同佢玩一两只接下歌无问题，但原来我成晚去Handle系有问题。我嘅Music Library太少喇，我唔识点样去令到啲客跟住个Flow去跳舞去Get High。

我以为𠮶一次就系最后一次，因为个 DJ Head 同我 Friend 讲以后唔好再揾我。我就冇 Hurt 嘅，可能我𠮶个 Moment预咗人哋会讲呢啲嘢，自己都觉得自己唔好。但我团火又无熄㗎㖞，可能有Tommy喺度同佢一路Keep住玩，咁我咪尝试自己努力啲去增加自己个Music Library。

波盛：你𠮶阵用咩方法去增加自己嘅Music Library﹖

DJ Galaxy：𠮶时想增加Music Library系难过依家，依家上网揿个掣就好多。𠮶阵我跟我朋友落湾仔，因为好多Club喺𠮶度，有Band有DJ，我就落去听下啲歌，喺度𥄫佢哋啲碟嘅Label 。咁我英文又唔系好叻，记得大概啲歌名跟住就去揾，再度下睇下点样做好啲咁样啰。

其实我谂住算数㗎喇，冇得打碟咪打工啰。𠮶阵17、18岁倒，谂住玩嘅啫。点知我个Friend又再揾第二次，我话：“你真系唔惊呀﹖”佢系好帮我嘅，可能佢觉得我都唔系玩咗好耐，经验唔够啫。第二次就落湾仔喇。

其实心理压力好大嘅，第一自己英文唔好，第二佢哋𠮶度系啲鬼佬场，又有菲律宾人，我都惊我唔得，我系成日都打定输数觉得自己唔得𠮶啲人嚟。呢次个DJ畀我试咗半个钟一Set，因为湾仔又系咁样嘅，半个钟Band半个钟DJ。到我落去打，佢又冇同我讲任何嘢㖞，我以为我唔得啦。跟住佢突然间话：“你下个礼拜五得唔得呀?”𠮶吓我都唔理佢畀唔畀钱，我系觉得终于有人肯比一个机会我。

跟住我就开始Part Time，但唔系每个礼拜都有，可能一个月两三次咁，因为𠮶度仲有其他Part Time嘅，佢就可能当畀个机会我摄我落去。𠮶阵我好畀心机，觉得如果我呢次机会做得唔好，我就冇下一次。我就喺屋企系咁背歌，而家就好容易落Marking，𠮶阵我真系要听熟只歌，同埋我成日落去听佢哋啲歌。我觉得我要做好佢，唔理佢系咪我以后嘅工作先，我都唔想我Friend畀咗咁多次机会我但令佢失望。当然啦我亦都钟意呢样野，我先会投放咁多时间落去。

波盛：有无咩契机令你可以由Part Time变成Full Time DJ﹖

DJ Galaxy：做做下跟住另外有个DJ接到另外一个场 ，佢就问我打唔打。我话：“好呀！我想打！”咁就多咗个场打，返返下就原本𠮶度都无返。但系新个场都有几个DJ ，后尾可能个老细觉得太多DJ太杂乱，净系想请返一个，佢就问啲客。𠮶阵我谂：“死啦！咁我系咪应该冇机会呢﹖我系最细个，其他𠮶啲全部系起码打咗十年以上嘅前辈。”

估唔到最后老细留左我，佢话啲客钟意我打。我𠮶阵好惊得罪啲前辈，但系我又好想做㖞，咁梗系拣做啦。可能因为我打歌个模式啲人钟意，就得到咗呢个机会做Full Time， 就由95年左右一路做到差唔多99年。

波盛：𠮶阵你点样去揾属于自己嘅Style﹖

DJ Galaxy：其实我嘅学习对象唔系净系Tommy，Simon Choi都系。我系攞返佢啲录音带听，觉得边啲位好我就买晒佢啲黑胶。我咁做系因为如果我唔Copy佢，我永世都唔知道佢啲位点样计出嚟。Tommy同我讲要计数，唔系剩系识数Bar，咁我就要谂下点样去计到𠮶条数。

同埋我会录音畀自己听，如果𠮶只歌有一下甩Beat我就重新录过。当60分钟，如果去到50分钟有Mistake就由头开始。我觉得如果我唔对自己有要求，喺屋企都做唔到呢件事，我出到去会更加失败。纯粹系我唔得咪练到得为止，我会咁样去练习。

𠮶阵时除咗Simon，我都有听啲意大利Disco嘅Medley，佢哋都系𠮶啲好紧凑嘅形式去接歌，我好钟意呢种format。其实香港唔系好多 DJ 会玩呢种，通常会喺Break揾一个靓位令转咗歌你都唔知。呢种玩法系好正常，但系我听到Simon系唔同嘅，我永远都会记住。我系最钟意呢种Format，我唔系太钟意好耐先转一只歌，我觉得系唔够紧凑。

Simon佢做𠮶啲位系好靓，当然都听到有啲位佢系试紧，佢喺试之中都启发到我，原来唔系下下都会即刻谂得到，要试清楚啲位得唔得你先可以做得靓。𠮶阵时我就系会攻依样嘢，有时冇客我会咁样去排下啲嘢，喺屋企就研究啲位同埋背歌。

波盛：同埋我估喺Club度对住观众打，拣歌又系另一套功夫﹖

DJ Galaxy：屋企做𠮶啲套路，始终都系Home DJ，剩系谂到靓嘅位，你唔知边啲歌系人哋讲嘅靓歌。佢哋最钟意讲Beautiful Song，咁我又要试喇。其实我心知好几首都必定Hit嘅，因为我自己听都觉得个旋律易记，即系好似《Barbie Girl》𠮶啲歌。𠮶阵时自己DJ都要好主导性地拣歌，我试过一只歌可以即刻清场，亦都试过一只歌可以即刻返嚟。

我𠮶阵几钟意湾仔个感觉，因为美国船兵有咩独立号嚟，我就识多咗好多Hip Hop。啲船兵大部分有分东岸同西岸，如果东岸你打西岸嘅歌，佢会嚟嘈你，跟住佢就会话比你知你要打咩，佢会带埋CD畀你。我又唔介意呢样嘢，因为我唔识。𠮶阵真系得有船到我哋先可以打Hip Hop。

我觉得做Club DJ唔系话想打自己风格就摆落去，因为Club系唔同嘅，你可以加插你自己少少风格，但唔可以多，除非你个风格适合啲人。但系打Party、Festival𠮶啲就唔同，两样嘢啦。而我𠮶阵比较学习到个模式就系知道对住咩人应该要打咩歌。

波盛：1998同1999年你都赢咗香港嘅DMC DJ比赛。系咩原因令你做紧Full Time DJ都想去再比赛﹖

DJ Galaxy：做到98年其实已经系点讲呢，唔可以讲话我团火熄咗，但因为当时返湾仔系星期一至日都要，7日都要DJ，你要放假就自己比钱DJ。跟住礼拜日下昼又有Noon-D，由2点打到凌晨3点，其实好地狱㗎。唔好话五六年，两三年你都好地狱。但系头𠮶几年系好有火，因为真系冇见识过。但后尾我系放只歌落去，最尾𠮶8拍推出去Pitch Control Mix，即系去到呢个地步，我就觉得：“死喇！我系咪已经熄咗火呢﹖”

我就喺度谂我应该点样呢，就咁啱有比赛，于事我就想比赛，睇下有冇其他好嘅方向啦。比赛之前我记得有一个月唔系成日返工，因为想准备个比赛，就叫个Friend返工，自己就系咁练习，咁就幸运地赢到1998年𠮶届。

1999年想卫冕，之后赢咗去美国。其实1999年我想参加系因为想去美国，因为我未去过，𠮶阵时你有钱都未必攞到Visa㗎。我系想去美国感受下个Hip Hop文化，我自己又钟意跳舞音乐又钟意Hip Hop，想感受下 New York City，所以死都要谂办法赢，最后好彩又赢咗有得去美国。

其实第一年赢嘅时候，过去法国参加世界赛已经睇到𠮶啲 DJ 系唔同㗎喇，同我平时睇带系两回事，喺现场见到个震憾性。我见到有个DJ叫Akakabe，佢初赛我觉得佢玩得好好，跟住佢好似甩咗少少，哗佢可以坐喺度唔开心。佢呢样野系影响到我，佢哋要嘅唔好话完美，但唔好有错，我觉得呢下好紧要。

跟住2000年我有谂过再玩，但觉得自己又唔够好，跟住就停咗。我好似辞左工冇做湾仔，好大抉择㗎。咁我觉得系咪应该要搏下呢，我成日都系咁同自己讲：“你本身都系零㗎啦你怕咩啫﹖”跟住之后就认识到农夫。

* 本月专访让我们认识DJ Galaxy成为DJ之路。下月专栏将会聚焦他在遇上农夫后，职业生涯的改变，如何从一位DJ 变成一位音乐制作人。