过去两期专访回顾了DJ Galaxy成为DJ的历程。年轻时在朋友介绍下于Disco初试啼声，却险些成为绝响，自此发奋钻研。其后踏上音乐制作之路，在反复尝试与失败中成长，造就多首大热歌曲的诞生。DJ Galaxy勇于尝试和永不放弃的性格，为他带来丰富的经验，成为教学的基石。来到DJ Galaxy专访的最后一篇，他将会分享DJ教学方面的心得。

波盛：开始咗做音乐后，做DJ方面嘅思维有无改变﹖

DJ Galaxy：我觉得自己最进步嘅时候唔系比赛𠮶阵，系比赛之后开始做音乐，启发咗自己将音乐嘅模式摆落DJ度。𠮶阵我已经教紧学生，我就谂不如将我嘅模式、套路或者技术，畀学生试下，去培育下一代睇下得唔得。

其实之前一路都有教，但系可能我突然间觉得自己开始进步紧，有啲唔同以前嘅DJ模式。我会将一啲Audio Edit摆落去，或者创作一啲Storyline去比赛，已经唔再同以前就咁攞电脑喺度转下、捽下，系去到做歌嘅模式，好似做一只Medley 或者一只歌咁，话畀人听系有Intro，将呢个模式摆落去DJ度 ，令到我有一个启发再延伸落下一代。

我觉得呢样嘢系我最高兴，高兴过自己赢，原来我可以令到人地赢到㗎㖞，原来我谂到嘅嘢可以令到佢哋快啲学到，唔使自己喺度摸。因为我同Tommy玩嘅时候系冇人教，我哋好惨，学一个Trick真系要谂或者睇录影带，翻睇再翻睇，先可以睇到少少，都未必做到十成。自学到嘅咪自学，自学唔到咪跟老师，有啲真系要有老师跟住去陪伴先真系有𠮶个心，有啲人系咁嘅， 每一种DJ嘅性格都唔同。

由2000年开始，电脑开始进步嘅时候，有个叫Stanton出嘅Final Scratch，仲未有Serato。𠮶阵时我已经觉得DJ可能有机会贬值，可能因为呢种心态，就试一样唔同嘅嘢去学做音乐。电脑呢样嘢或者Controller会令到好多真正嘅DJ揾唔到食，唔系话播歌𠮶啲唔系DJ，就算你Play、Stop、Cut，我都唔会理。不过我自己角度就系想一啲真正嘅技术可以传承到。我未必系最好，但系我一定可以畀到一啲正常嘅套路，令到你达成目标。

当然都系𠮶句，要睇你自己，呢个系我同Tommy最基本嘅理念。唔系话我要一百个学就要一百个传承到，一百个学有一个传承到都好好呀，我会系依啲心态。其实九几年开始有教班，不过就无咁密，2000年开始正式教多啲，我谂都过千人以上。

波盛：DJ Tommy有讲过你好叻教学生，你自己对DJ教学系点睇﹖

DJ Galaxy：我又唔系Tommy讲到咁夸张好有理论性𠮶啲，我系后期先开始有一套理论。因为开头唔系太熟个Format点样去教好一个人，我系一路教人嘅时候我一路学紧，点样可以令到佢容易明白啲呢。跟住到电脑嘅时代同有Controller嘅时代，我点样可以令到佢有唔同。以前我教唱盘跟住再教Controller，咁我就要有另一个模式。

可能有啲人就会揾纸写低所有嘢，但我唔系嘅，我系个脑度不断运行，我连瞓觉、有时睇电话，我都会喺度谂点样去做。即系好似Tommy去Produce我，我点样去Produce个学生。因为有啲学生真系唔知道佢自己要做啲乜嘢，咁你就要话畀佢知你可以做到啲乜嘢。

教学嘅模式我都系喺做音乐𠮶度领略返嚟。我变咗系Set咗一个套路，可能今年呢个套路系咁样，第二年个套路又改少少，一路改一路改，改到系最容易迎合到畀人学到。反而我就做唔到速成，我都讲我系传承唔系速成，我成日都同学生讲，速成就唔需要揾我学，我都帮唔到。

波盛：千禧年代你除咗教学生，系咪同步都喺Club度做紧DJ﹖

DJ Galaxy：系呀，𠮶阵时我做DJ系开心过喺湾仔，又唔使话返足三十日先系𠮶个人工。细个嘅谂法系如果上到兰桂坊就系另外一个世界，懒系高档少少。跟住同Tommy接到啲兰桂坊嘅Club，我自己又喺出面做吓Part Time，𠮶阵时系比较开心。

𠮶阵我反而做多啲唔同嘅Remix，唔做Remix我都会整Audio edit。每次有新歌我就将佢剪短，出最重要𠮶啲部分，我要即刻到位，𠮶阵时系比较落力做呢啲。既然我都识呢啲嘢，点解我唔将佢摆落DJ度。反而喺2000年头𠮶阵团火仲大啲添，唔驶成日翻工，你团火就无咁易熄。我𠮶阵谂原来我唔系唔钟意，只不过变咗份工，你𠮶团火真系冇咁犀利。

但系后尾2014年打后，市场已经唔系𠮶样嘢，DJ Culture里面有好多嘢唔同咗，可能唔系我杯茶，我就唔做喇。同埋我觉得开始做 DJ 系揾唔到食，我自己认为啦，可能有啲 DJ 揾到食嘅，但无咗𠮶种黄金时代嘅感觉。我见而家好多新嘅DJ，或者我啲DJ朋友，都要打两份工，日头返工夜晚DJ，唔同我哋以前真系净系做DJ就可以开到饭。个市场你话萎缩又唔系，系价钱萎缩令到我唔想做Club，Budget又少咗，咁我都无谓强求。咁咪专注教学，同埋做自己钟意嘅音乐。

波盛：系咪就喺𠮶段时间你同DJ Tommy开始钟意玩EDM而组成Fake Alien﹖

DJ Galaxy：当时2010年左右EDM冒起，咁啱就同Tommy玩 EDM。最初叫UFODJs，后嚟叫Fake Alien，戴住头盔打碟。个头盔已经系好轻用玻璃纤维，我哋已经唔系打耐，打一个钟倒，跟住颈𠮶个位唔知点解成日会㾓痛，跟住我真系搞唔掂，唔系钱问题，系条命问题，就停咗。

不过好玩嘅，即系每一个阶段都有唔同嘅嘢。好似你哋BEAT FRIDAY打Cantopop，突然间爆㖞，又几好玩㖞，即系做返我哋八、九十年代𠮶啲嘢，咁我哋觉得又几好玩，咁咪试下啰。都系冇咩确定嘅目标，最紧要系好玩。

如果为咗某个目的我觉得好辛苦，真系唔知几时先达到个目的，呢个系我自己嘅谂法。即系好似我做歌，如果谂住要做到某个目的，例如《风生水起》一定要Hit，唔Hit咁你会好失落，所以佢Hit咪Bonus。我自己系呢个心态，做到自己钟意嘅嘢，又可以有成绩，我觉得成件事已经好OK。

波盛：呢啲对待DJ甚至音乐嘅心态，你上堂会唔会都同学生分享﹖

DJ Galaxy：有啲学生你可以教佢，有啲你就好难讲呢样嘢。通常小朋友会多啲，因为佢哋会容易听你讲，专注少少啦。大人就睇下边啲，有啲真系好钟意嘅，都会留心听下你讲嘢。

我觉得做DJ要坚持，同埋要努力学习新嘅事物。如果你想留到最后，就要不断增值同改进自己，同埋要承认自己嘅错误。呢个只系我自己嘅谂法，因为我系呢种人。但系如果你无端端话我唔啱，你又讲唔出原因嘅，我系唔会睬你。如果你讲得出我嘅错误，我OK嘅。

我自己觉得一定要有呢个心态，因为好多觉得自己做咗有咁上下年份嘅 DJ ，佢未必会听你讲㗎。我唔系嘅，就算你年纪细过我年资少过我，只要我欣赏你做某样嘢，我都会跟你学习，我有少少𠮶种不耻下问，我唔会怕丑。我系唔识就问，我唔会同Tommy识晒全部嘢，如果我话我哋识晒嘅都呃你啦。我觉得你追随自己个理想，你嘅坚持呀，改进同增值系好紧要。

波盛：如果有啲读者对DJ比赛有兴趣但又唔确定自己得唔得，你有咩建议﹖

DJ Galaxy：如果你真系确定唔到嘅，你可以过嚟摩拳擦掌。第二样嘢唔敢同你确定，比赛模式嘅嘢一定确定到。唔系话刻意卖广告，我觉得真系连自己都转牛角尖解决唔到嘅时候，你真系需要揾人帮你解决。唔系净系我，好多人都玩开依样嘢，我觉得系需要揾返一啲有经验嘅人去帮你解决个问题。

波盛：如果已经有参加DJ比赛嘅念头，应该从何入手去准备﹖

DJ Galaxy：首先，练好基本嘅技术先。因为你冇基本嘅技术，有概念系冇用嘅。你个技术帮唔到你达成嘅话，你有再多概念都系冇用。所以通常我都会Train学生嘅技术，或者畀一个功课学生去Copy我嘅技术去做。练到嘅话，咁我心里面就知道佢大约去到咩Level，我就会开始话畀佢知应该点样去组合一啲套路。

当佢达成到一啲最基本嘅组合套路，就会开始真系做Routine喇。先做一啲小Routine去Test，做熟咗之后真系OK嘅话，我就会真系Suggest佢去比赛。因为从好多嘅小套路里面，你会睇到𠮶个人系咪已经达成到目标。我自己就系呢个Format嘅。好似DJ Silenze同SimonGirl，我觉得系呢啲Format可以令到佢哋成长，起码佢知道自己做紧咩。如果我一开始畀晒一个真系好DJ嘅Routine你去比赛，你系做唔到，因为你都理解唔到。

仲有就系你个表达嘅动态，唔系净系DJ Party嘅时候你先有一啲动态㖞，你喺比赛模式里面你都要有啲动态。同埋就系Gimmick嘅嘢，我成日话比赛都要有一下畀人记得你，唔需要多，你越多人哋越乱。好似我有教过一个女徒弟叫做 DJ Ashy，佢就玩 Pioneer Hong Kong赢咗嘅，应该系第一次有女DJ赢咗。

𠮶阵时The Chainsmokers有只歌叫《#SELFIE》，我话不如呢个位你停咗佢，然后攞你部手机出嚟自拍，再即刻揿返只歌出去。其实依一个位已经系一个好大嘅Gimmick，咁佢又做到。佢成个Perform都好冷静，加埋𠮶个Moment一招就令到啲评判记得。因为啲评判真系会攰，我自己做都会，你一下子睇十几廿个，所以我觉得令人记得你系好紧要。

波盛：呢家IG都有好多DJ会Post啲打碟片，你觉得系咪一个好嘅途径去学习同揾灵感﹖

DJ Galaxy：如果你𠮶个学习对象系好Technical嘅，本身已经系有名堂或者做得好嘅，就冇问题。佢哋玩𠮶种分零钟，你话系咪真系完全学到嘢呢，如果你本身识少少嘅去睇系OK，但系如果你系零去睇呢，其实你未必知佢做紧乜嘢，你只系知道佢喺度转紧歌。好似Tommy玩𠮶啲都系Cut嚟Cut去，但系你都要知点解佢会咁样Cut到，呢个又系一个Technique嚟。

其实我有睇好多，好𠮶啲可以留意下。有几个我都会常睇，James Hype、DJ Sally，啲概念玩得几好。如果你想玩一啲Mixing以外嘅技巧，可以睇下佢哋。好多DJ都系玩佢哋嘅模式，Looping Mode、Looping Transition，同埋玩Acapella、Chopping Mode 𠮶啲，我都有教学生玩。

而家个时代系玩呢啲嘢，好似见到啲Launchpad出咗嚟，你唔会唔玩，我自己都会练。我教学生之前其实都要自己埋头苦干咁练，但唔系为咗教学而学，而系我真系觉得呢样嘢OK㖞我想玩㖞，咁我就会狂练。

波盛：如果无任何条件限制，呢家嘅你会想打咩类型嘅Party﹖

DJ Galaxy：EDM 里面其实我最钟意系 Dubstep、Future Bass、Drum n Bass，因为呢啲都系同Hip Hop有关。如果可以EDM加Hip Hop两样嘢一齐玩，咁我就觉得好正。其实好少会咁，通常你系EDM就EDM，好少突然Hip Hop。如果可以打到自己钟意嘅EDM，又可以打自己钟意嘅Hip Hop，或者可以将Cantopop夹埋一齐玩咁就正喇。

因为而家好少依样嘢出现，啲Club多数都系嘭到尾。以前真系有高低起落，而家就少咗呢啲，所以如果可以做到呢样嘢，或者玩一啲House Music，我都好钟意。我成日觉得啲人认定咗我同Tommy就系Hip Hop，因为我哋玩DMC，但其实我哋系乜嘢都听。我最先听都系啲流行跳舞音乐，同Tommy一样细细个都系听MJ、Prince、Madonna。

波盛：现阶段嘅你喺DJ方面仲有冇咩目标想做到﹖

DJ Galaxy：其实目标就冇乜，如果可以将我自己钟意嘅嘢Last到最后，我已经好高兴。即系你话系咪要再更大啲名堂𠮶啲，可能以前细个仲会睇下可唔可以做到只歌出名啲。但系我到呢个Moment仲可以做到呢样嘢，仲可以用玩唱盘同埋 DJ、Mixing、Scratching去令到自己生活到，我已经觉得好好。

同埋可以做自己想做嘅音乐，我觉得已经系好好。有咩大志𠮶啲，可能以前同Tommy已经经历过好多，衰啲讲句我死而无憾㗎喇。起码我有一啲嘢留咗喺度，我已经觉得好开心。起码我曾经做过好多Hit歌，又教过好多好嘅DJ，做过自己想做嘅嘢，喺我心目中已经系好好。