一连三场许志安《On Stage演唱会》，昨晚（10/10）举行尾场，完骚后安仔接受传媒访问。对于相隔11年再开红馆，自己每一晚都好感动。特别在嘉宾方面，每位歌曲的配搭都用心挑选，务求令观众有惊喜。至于为何太太郑秀文（Sammi）未有担任嘉宾，原来是Sammi意思，她不想抢去焦点，甘愿三晚以来默默地在后台支持。另外，网上洗版地将《让爱》的英文歌词变成“冻辣蟹”，安仔都表示有看到，还庆幸到第二晚才睇到这条片︰“好彩未入脑，如果你话唱多两晚，我惊唱咗中文字。”

隔11年重返红馆张学友赠暖　郑秀文后台祈祷护航

许志安演唱会的尾场嘉宾有天王张学友，安仔在台上已表示好挂住对方，亦挂住对方的声线，所以决定邀对方做嘉宾。“我系好挂住佢，唔单止想睇佢唱，直头想喺现场，企隔篱睇佢唱歌。”安仔续指学友一直给予他温暖的感觉。“真系由细听大，后来认识咗，又同公司一齐做电台音乐会，之后都十几二十年冇合作，见番真系好温暖。”原来学友一直都关心其歌唱事业，得悉他已签新唱片公司，会致电老板黄剑涛（Duncan），追问几时做歌？“所以今次揾佢亦一口答应，好感谢佢，亦都好多谢克勤同Eason。”

问到太太Sammi为何未有担任嘉宾？原来是Sammi意思︰“佢见我咁耐冇唱，唔想抢Fo，不过三晚都有嚟为我祈祷，有一齐做运动，跟佢去操练。”而在台上，安仔以跑步时怕再看不到某个山丘景色，疑似讲曾经怕再冇机会开红馆，访问时他未有直接回应，只说山丘个景色已经在心中。“有冇机会再开演唱会都唔知，如果突然有3场档期，问公司又许可，都可以去唱part 2。”

爆笑回应“冻辣蟹”！　庆幸自己未被洗脑

此外，网上近日疯传将许志安首《让爱》变成“冻辣蟹”，事缘歌词一句英文歌词为“Don't lie, don't lie, don't cry”，安仔演绎起来好似“冻辣蟹”，所以恶搞埋片同图疯传，安仔亦有收到。“正呀！我系寻晚先知，今晚都唱得好投入冇受影响，如果你话唱多两晚，我惊会唱咗中文字。好彩未入脑，如果入脑就不得了。”有记者要求安仔试唱“冻辣蟹”，但怕变咗粗口冇唱到，但就再三表示好正！“我睇完系笑出嚟，立即share畀朋友。”