容祖儿上周公布首个启德主场馆演唱会《AURA TOUR》详情，指暂定明年1月22至23日于启德主场馆开两场，不少歌迷都担心只得两场买不到飞，纷纷呼吁加场，而今晚（13日）祖儿直播时就宣布史无前例地未优先订票已先加场，她说会加1月18号头场，作为报答粉丝的礼物！她更预告：“大家可以好努力咁支持我，我希望我可以加到几多得几多！如果有你哋嘅支持，我相信可以继续加落去。”她解答了不少有关演唱会的疑问，讲到2019年开《Pretty Crazy》演唱会时曾答应大家三年后再开大型演唱会，结果等了7年才找数，她突然感触落泪表示有种“复杂的感动”，之后唱《阳光普照》时更喊到唱不下去。

解构“向前加头场”心思 祖儿公布优先订票详情

一开始，谈及今次破天荒在未开卖前便宣布加场，祖儿直言日日与公司开会商讨，一心只想让大家买到兼睇到。至于为何选择“向前加”而非“往后加”，她坦言背后藏著自己的心思：“我而家决定加埋18号做优先订购，系送畀一班等咗我好耐嘅粉丝，希望能够用你哋嘅力量，帮我话畀大家听，亦都希望喺我嘅头场，有你哋参与。因为我自己觉得每一次歌手嘅头场，系好需要一班锡我嘅粉丝坐喺度去交换力量，所以经过一番努力争取之后，我同公司可以争取到！我知道班fans一定系一开就会买，但系如果𠮶个唔系头场嘅话，我会觉得我有少少遗憾，所以希望大家今日接收到我呢个讯息！”她更公布了具体订票时间表，1月18、22及23日三场门票，将于11月9日中午12点供中银及银联信用卡优先订购，11月10日中午12点则开放港澳银联信用卡，并于11月13日中午12点公开发售，叫大家mark定落时间表。对于歌迷会会员能否有内部订购飞，祖儿亦霸气笑言：“梗系有啦！如果歌迷会都冇订票，咁入我歌迷会做乜鬼？呢个好基本咋嘛！”

将开三面台 预告23号非尾场：希望加得几多得几多

有观众问23号是否尾场？她随即大卖关子笑称：“梗唔系啦！但系呢一刻我只可以话俾大家听，头场一定系18号。大家可以好努力咁支持我，我希望我可以加到几多得几多！如果有你哋嘅支持，我相信可以继续加落去。”她指22、23号适逢星期五及星期六，按以往经验全场必定情绪高涨。谈到舞台设计，祖儿直言看过设计图后觉得非常震撼，内部亦曾讨论过设企位，不过最终拍板采用“三面台”而非“四面台”，她亲自解画：“四面台其实有好多视线阻住嘅位，我自己都会觉得一来个台又好大，你又要行来行去呢，其实好多时候会忽略咗可能……你近嘅时候可能会好近，但系你行咗去𠮶边嘅时候，咁另一面嘅观众有可能成日见唔到你。”

积极设计演唱会周边 呼吁多行隧道口睇演唱会广告

《Pretty Crazy》演唱会中，“红馆360”设计非常震撼，问到今次会否有“启德360”，她亦大赞是个好提议。除舞台制作外，祖儿透露目前也积极筹备演唱会周边商品，并收集大家意见，除必定有T恤外，她说：“其实我自己每一年嘅Merchandise里面，我自己都好希望大家可以有收藏价值，亦都有实用价值，我会俾心机设计！T恤一定有，仲有啲乜嘢？”由于祖儿在香港两条主要隧道口落了广告，她力推大家可以多多驾经东隧或红磡海底隧道打卡：“星期日𠮶日，我特登游车河，行咗一转，我觉得系好震撼同埋好壮观嘅！所以就喺呢度都好多谢所有支持我朋友、公司，我哋嘅赞助赞，帮我影呢辑相嘅所有单位。行到嚟呢一步要公开话俾大家听，announce呢件事，我觉得都好似行咗好远嘅路，但系其实都仲有好长嘅路要行，所以呢几个月里面都要继续努力！”

将于林家谦合体受访 谈演唱会之约“三年变七年”感触落泪

至于新歌方面，祖儿感谢大家喜爱新歌《阳光普照》，并透露非常感激林家谦为她作曲填词，剧透将于未来一至两星期内合体登上叱咤903受访讲新歌。直播尾声，忆起开骚的心路历程，祖儿感触良多：“其实讲开呢个show我自己都好感触嘅，我好记得《Pretty Crazy》嘅时候，话讲过三年，我应承大家三年我就会再开show，冇谂过三年又三年，由19年到而家都有成七年，今次可以再同大家去演出，有一种好复杂嘅感动喺入面，哈哈！自己都有少少感动……”讲到此处她不禁眼泛泪光，续说：“所以……总言之我今次呢个show就好多感情喺里面，亦都期待同大家，亦都多谢大家支持，都唔讲咁多客气嘅说话，因为我都知道入得嚟呢间房嘅都系啲好锡我嘅朋友。”最后，祖儿演唱《阳光普照》送歌迷，不过由于她仍相当感触，所以一度喊到要停唱，并且用纸巾拭泪，也预告演唱会都会投放丰富感情！