DJ器材不断推陈出新，随著功能日趋强大，入门打碟的门槛亦随之降低，令不少人投身打碟这项兴趣，甚至发展出一番事业。在这个数码化时代，本地音乐人Lili Forest木子却深受DJ的传统黑胶文化吸引，崇尚黑胶DJ的工艺。一连两期专栏，Lili Forest将与各位读者分享他成为DJ的故事。

波盛：之前一路有见到你喺Mercury Recalls打黑胶碟。你系几时开始接触DJ﹖

Lili Forest木子：真系计嘅话，应该系三年几前，𠮶阵我系完全对DJ冇概念，因为我主要唱歌、写歌、做Production。以前有间餐厅叫Lost Stars，主要系Musician唱歌、Live Band，佢哋三年前就准备开铜锣湾新舖头，叫 Mercury Recalls。我𠮶阵有砌啲Playlist，系R&B、Soul Jazz、Afro Jazz𠮶类嘢，感觉贵啲嘅嘢啦。佢哋就应该睇完个Playlist，觉得啲歌拣得都几好，就问我有冇兴趣落新舖打碟。

𠮶阵时我对DJ嘅概念，就系好少布啦，喺个台度揈揈揈啦，跟住就掟蛋糕啦，系做Hype Man，觉得呢个系非常过誉嘅工作嚟，好多人会咁谂。咁但系佢话系玩黑胶，咁我觉得又唔同，就当电台DJ播下歌咁样啦，我就应承咗。

铺头啱啱开，个Selection有几百只碟，都系老板嘅Collection，主要都系80年代欧美嘢，咁我都识。一开始系要特登上一堂嘅同老细，因为我连 DJ Mixer 同Turntable 都未掂过。而我一Into一件事就好热衷，瞓晒身，咁我就知道要买Turntable要买Mixer喇。

因为我觉得要做就要认真做，如果唔系不如唔好做。我就真系上二手网睇，咩牌子呀，几多钱呀，全部二手买嘅，洗咗几千蚊啦。但系钱唔系问题，地方系个问题。跟住我𠮶阵就特登喺个厅中间开咗个坛出嚟，攞个Keyboard Stand 加块木板，摆咗两个唱盘加一个旧嘅Mixer 喺度开始练习。

波盛：我觉得除咗器材，打黑胶最大挑战系要买大量黑胶同揾地方储存。你本身有无储开黑胶﹖

Lili Forest木子：我本身冇储黑胶嘅，当时我应该有两只黑胶，纯粹啲朋友送，或者贪得意觉得好靓买。跟住应该头一个月啦，我净系用舖头啲碟打，但系当时我觉得好闷呀已经，即系又系呢啲碟，又或者系我觉得我唔够熟啲碟。开始萌生一个谂法，然后上网又睇下Reddit啲人点样开始打碟，就拣一个好熟嘅Genre先，咁我就开始储。目标系有廿只碟先，廿只碟我有Greatest Hits呀、杂锦碟咁，我起码可以挨到过零两个钟先。

一开始系储 City Pop 碟嘅，因为觉得 City Pop 好百搭，三年前 City Pop 仲系几Hit嘅我觉得，而家就慢慢息微，或者叫做Fade Out 少少。当时系全新买，全部啲Reissue 系去White Noise买，次次都两千蚊三千蚊走唔甩，我当时就不停说服自己，呢啲系工作开支，买咗都系有用嘅。之后就揾返啲我比较熟嘅嘢，但系香港都难揾嘅我自己觉得，就有啲 Disco、Soul、Funk，即系讲紧 Earth, Wind & Fire、The Stylistics Commodores 之类，咁就开始储。

当时我会YouTube揾Vinyl DJ Set，如果净系揾DJ Set可能会揾到Boiler Room，可能会揾到DJ Soda，亦都可能会揾到啲再OG啲嘅 Louie Vega。𠮶啲系Club、Festival嘅Environment，咁对于我现时或者𠮶时嘅工作系冇益处嘅，因为唔系𠮶啲Crowd唔系𠮶个玩法。

咁揾Vinyl就会揾到佢哋喺间好Quaint好Stylish嘅一间Café，咁佢有个DJ Set 打一个半钟咁样。通常就见到佢单手拎住一支𠮶啲Lollipop耳机，系好有型，咁就学佢哋，听佢哋做咩，发觉原来佢哋唔系净系播歌㗎㖞，原来系将两首歌夹埋一齐。咁点样夹埋一齐呢，又开始研究。因为我有玩音乐，我就明个Concept，两首歌可能个速度差唔多，或者令到佢差唔多，就可以咁样过歌喇，咁就自己试啰。

好好彩地铺头见我打歌嘅时候啲Crowd 系几愿意留喺度消费多啲，佢就请多啲我，咁我就多咗练习机会同埋观察个Crowd 嘅机会，发觉原来系咁样打会好啲，个节奏应该系点样，应该好急咁样转，定应该摊长首歌呢，咁就真系现场去学呢啲。

波盛：除咗打黑胶，你有时候都会打Digital。你觉得两只有咩分别﹖

Lili Forest木子：玩黑胶嘅DJ同玩电子嘅DJ，同玩棍波车同玩自动波车嘅人系有少少相似，即系佢哋会Look Down嘅，玩棍波你做乜嘢揸自动波。我都可能有时会有呢个谂法或者疑问，但系慢慢会发觉其实唔同嘅嘢嚟，个Craft好唔同。

到我开始接到啲唔系黑胶碟嘅Job，我发觉自己好Handicap，我唔识用部机。个机帮我对咗拍子，咁我要做啲咩呢。黑胶嘅话系要完全自己听，佢冇得Lock个Beat，你要随时去Mon住佢，所以我会形容黑胶嘅Transition通常感觉会比较原始少少，冇咁多花臣嘢，但系我要用嘅注意力系多过我打Digital可能两倍，因为我全神贯注，听紧首歌做紧乜嘢。

玩Digital多咗嘅时候，发觉可能我哋追求或者观众追求𠮶样嘢唔系个技术含量，唔系你识唔识用耳仔对拍，唔系你识唔识Scratching。更加多系气氛上，你识唔识配合呢个场合。当然如果你落Club或者你去一啲好Battle 嘅场合，技术含量都要高返啲，但系如果纯粹系啲Event，可能系一啲大家开心Chill嘅地方，反而系气氛紧要。人哋在乎你拣嘅歌啱唔啱佢听，成个Flow你有冇带紧佢去一个地方。我发觉呢样嘢系作为Selector 嘅功力比起你识唔识Scratching紧要。

波盛：系咪就系呢种现场同听众嘅互动同交流令到你觉得打碟好好玩呢﹖

Lili Forest木子：其实就系呢样嘢。我本身系一个唱作人，有时会好大压力，会觉得我成个表演唔可以错唔可以走音，对自己要求好高。但系𠮶种压力有时会令自己对于音乐嘅热诚，又唔系少咗，但系好似冇咗当初𠮶种好纯粹弹到个音已经觉得好叻𠮶种感觉。

当初转去开始打碟嘅时候，就好似对音乐有个好 Fresh 嘅 Point of view去睇，我真系纯粹分享紧我觉得好听，或者啱呢个时候听嘅歌。或者我觉得你钟意听呢首歌，你有反应嘅，我畀另外一首睇吓你钟唔钟意，然后你过嚟问咩歌，得咗！对于我嚟讲最开心系呢啲位，佢哋会真系放低戒备，行过嚟好纯綷地问呢首系咩歌，咁我觉得音乐嘅Power喺呢度。唔系𠮶个Elitism，我系精英我要唱得几好，我要唱得好过你，唔系𠮶种比较。

波盛：有无印象播过边首歌后，有意想不到嘅人埋嚟问你系咩歌﹖

Lili Forest木子：有一对系Gen Z嘅男女，著得好有型嘅。个男仔系好似黑人Hood𠮶啲Gangster，濑屎裤、白色背心、红色Cap帽向后戴、金链，个女仔就系地雷妹样 Trap妹样。我见佢哋入嚟呢间黑胶Theme嘅Bar，好奇点解佢哋唔喺老兰𠮶种地方嘅。

咁唔紧要啦佢哋坐低，我播紧Deep House嘅𠮶阵时，跟住佢哋已经䟴紧，我就觉得OK佢哋Feel紧，我就试下转野先。𠮶个前奏出嚟，少少80s Feel ，但Pproduction系Modern嘅，跟住有把女声出现唱广东话。我见到个男仔即刻望咗过嚟，个样系唔知依首咩嚟，但又好好Feel㖞，跟住行过嚟问咩歌嚟㗎。然后我话：“呢个系刘天兰嚟㗎。”佢话唔识刘天兰问系边个，我答佢：“岑宁儿阿妈。”

因为同佢讲系叶德娴个好朋友、咩Art Direction，佢唔会知，始终唔系𠮶个年代。但系同佢讲岑宁儿阿妈，佢就Get。然后佢问系咩歌嚟，𠮶首其实唔系真系刘天兰唱，系刘天兰首《半个梦》，但系晓霖Xiaolin个Remake。次次打𠮶首我都觉得：“Yeah! That's it!”

系有少少穿越咗年代，即系我系90后，佢系00后，然后刘天兰我唔Sure系几多后。好似系几个代嘅一个对话，我觉得系几Cool嘅一件事。我觉得做DJ 好多时候更加多系点样氹人落叠。我哋听好多歌，听深啲嘅，会有好多觉得正嘅歌，但观众未必会即时Get到，或者佢哋未必Catch到。

但系With the right introduction同铺排，佢哋系会觉得：“咦﹖我原来钟意呢样嘢㗎㖞。”觉得系要咁样氹人落叠啰。我哋就系分享紧我哋嘅口味同喜好，唔好话Educate，我觉得呢个字好似好高高在上，而系纯粹分享。你未识我就介绍你，我有啲嘢都唔识，你可能介绍返我呢。

波盛：一路听你讲，都系钟意啲Funk、Soul、Disco。你嘅音乐口味系点样培养出嚟﹖

Lili Forest木子：我觉得我嘅音乐品味同口味，好大部分系打机嚟嘅。我细个好钟意打机，打到唔冲凉唔瞓觉，我仲会因为打机逃学嘅，打得最多就系GTA同埋Guitar Hero。咁Guitar Hero就明啦，我夹Band系呢个原因，听Band系呢个原因。但系GTA好重要一样嘢就系成日都揸车，揸车成日有电台，咁我𠮶阵打San Andreas 就系喺 LA 嚟，LA 其实就系全部 Soul、Funk、Boogie，𠮶度影响我音乐嘅Taste系超大。所以点解我话我首先系储City Pop黑胶， 因为最容易Get 最容易买，之后我就开始系储Soul、Funk、Boogie。

我𠮶阵时唔喺香港读书，到我开始听歌就想夹Band，可能觉得容易啲，即系你自己玩 Disco、Funk 好难㗎嘛，𠮶阵时又未有电脑去做Production。咁我就谂不如夹Band啦，弹支老木都可以唱吓歌，所以一开始就变Band仔。我好记得𠮶阵时一返嚟香港听电台，有播 My Chemical Romance，我钟意咗就向咗𠮶个方向发展，系咁样先嘅。

波盛：打过最好玩嘅Party系边一次﹖

Lili Forest木子：我同Mercury系合作得最紧密，因为我而家系佢嘅Resident。除咗佢Promise Book我多啲之外，咁我Promise返佢我试下用我哋有嘅资源、地方、人脉去做啲Event或者Party。我觉得最开心最正嘅Party，就系同香港有个跳舞团体，跳Locking嘅，佢哋叫做The Quickies。佢哋某啲成员加其他啲跳舞前辈，有个搞Party嘅Group就叫 For Funk's Sake，佢哋就专系Disco、Funk、Soul、R&B，佢哋个Community好Tight好合群嘅。

我当时就同其中一个成员倾，跟住就搞咗一场黑胶嘅 Party，专玩Soul、Funk、Boogie。香港系极少嘅，可能会有Bar播呢啲歌，但唔系一个呢个Theme嘅Party。我哋就同餐厅倾，我哋纯粹三方合作搞个Scene啦。我哋谂住一季搞一次，咁喺上年开始搞，搞咗四次，每一次反应都好好，每一次都系劲多人。我IG 虽然𠮶条片唔系最多人Like最多Views，但系DJ嚟讲我最钟意𠮶条片，我就Pin咗佢。成班人喺度听紧Disco 听紧Funk，跳紧Locking、Popping 、Soul Dance，呢个应该系我最想做嘅。

波盛：如果无任何限制，你最想做到一个点嘅Party﹖

Lili Forest木子：我觉得玩得黑胶嘅人都系怀旧嘅人，会对以前有美好嘅想像。我会好想有真系以前Disco咁嘅环境，真系有人跳舞然后听歌，即系唔系Club。Club同Disco系两回事嚟，Club 系真系揿手机然后自拍，唔系跳舞。我好想要Disco 𠮶种感觉，就有少少我喺 Mercury 搞嘅Event，唔一定要好叻跳舞，但系肯跳舞嘅人，一齐听音乐、跳舞、Have fun。That's all。

系好难㗎呢件事，如果香港有好Specific 嘅一间 Club 或者 Disco 系专做呢啲嘢，我觉得呢件系好Cool嘅事。真系好似70年代美国，精心打扮完过嚟，真系去玩嘅Look嚟， 系好缤纷嘅，然后Express自己。

我呢家一季做一次嘅呢个Event如果可以变成再恒常啲，咁其实就系我好想做𠮶样嘢。好High㗎，因为真系有一啲Dancers，然后你打碟佢哋肯跳到好开心，仲觉得正添，That's the best！ 你Get佢哋要乜嘢，即系Sync到，你会见到大家喺度发酵紧。

如果一个DJ Set净系得观众冇Dancers， 呢个DJ Set系好奇怪嘅对我嚟讲。因为我哋播嘅歌Suppose就系要跳舞，我哋唔会全部Ballad咁播。如果冇一啲人肯跳舞，咁𠮶个Show系一个好奇怪嘅Show，揾个人唱歌好过，我会咁谂。𠮶个Dance 唔系讲紧真系要识跳舞，唔系要你去练舞去学Locking， 唔系。而系你有Movement，个人会有Groove，同DJ𠮶个互动呢，真系一切嚟㗎。

波盛：咁之前喺KKBOX风云榜𠮶种演出嘅感觉又如何呢﹖

Lili Forest木子：好唔同。正如我头先讲，我一开始打黑胶嘅场合，或者呢家比较常驻嘅场合，成件事系睇个Flow，而且大部分人唔系买飞入嚟，冇个Expectation要听乜嘢歌，我觉得𠮶样嘢系好似Busking多啲，歌单有乜歌都得。甚至乎你觉得唔钟意嘅，你去个厕所返嚟都冇问题，因为我纯粹系个场地嘅Background Music ，未必系个Main Event。

去到KKBOX我都唔系个Main Event，但系个Set Up就变咗三面台，大家见到有个人升起咗，准备打碟，佢就会想全程Engage落去。𠮶阵我一开始谂呢件事就觉得好大压力，因为可能我对于DJ嘅概念，从来都唔觉得DJ应该系主角。我去Club嘅时候Club DJ都唔系主角，主角应该系Dancers，主角应该系个场嘅任何人。

所以比较辛苦嘅系谂法嘅转变，我点样可以令我播出嚟嘅嘢变成个聚焦，唔想佢哋聚焦嚟我度，可能我对DJ嘅Stereotype就系咁样，班人跳就啱㗎喇。但系喺KKBOX，啲人唔系落Club 或者唔系落Disco，佢哋唔会想跳，变咗我个Preparation Work要多好多，我要Expect佢哋想听啲咩，Fulfill Expectation 从而 Exceed 佢哋 嘅Expectation。

当时 Plan 嘅时候同导演倾，既然我又打到黑胶，又打到 Digital，咁就不如做到香港流行曲编年史咁样啦，我哋由70年代打到 2000、2010、20220年代咁样。我谂啲人慢慢 Feel 到啲歌慢慢新紧，慢慢越嚟越熟，最尾就变咗系用当日表演或者攞奖嘅单位嘅歌，去做个Remix同Mash up，十几分钟，咁就Mash咗十二个歌手。所以系全部One Minute Mix 咁入，就做个新嘅Remix。

我个谂法要有啲唔同先可以做到呢啲Set，如果用我平时𠮶个做法，应该畀人闹死。所以实质𠮶句就Enjoy平时随机应变，然后睇Crowd睇佢哋嘅心理活动变化去玩多啲。不过都系一个好难得嘅体验，如果有更多呢啲Show，我谂会玩得再好啲，会玩得越嚟越叻，同埋会知道佢哋想要乜嘢。

波盛：见到你呢一年加入咗NO CAP RECORDS，音乐风格有少少唔同咗，甚至第一次整咗广东歌《Muscle Memory》。呢家喺做歌方面，系咪会想融合埋打碟嘅想法入去﹖

Lili Forest木子：绝对系。因为以前冇DJ嘅时候，我纯粹谂Live Band，Live Band呈现到出嚟就好好喇。但系而家打完碟嘅时候，就好想我首歌如果啱喺某啲Party或者某啲场合可以畀人打到，咁就好喇。所以啲歌都系会Urban少少，Beat Heavy少少。同埋11月Plan紧出一首歌，同上一首《Muscle Memory》系好似Mix咗咁样，都系一啲开始咗打碟会有嘅新谂法。以前应该唔会谂到咁样嘅。

不过我自己Set会少啲打自己整嘅歌，因为我未出黑胶，打Digital嘅话又通常系啲Corporate Event，咁𠮶啲我就可能一开始暖场打下，自己High下。但系都有听过其他DJ喺某啲Party有打我啲歌，或者喺啲Radio打我啲歌。感觉原来系咁，我谂我要做多啲喇。

*了解过Lili Forest木子的DJ历程后，下期专栏他将分享作为DJ私心推荐的广东歌，以及介绍他全新作品的创作理念。