“热气球节变放风筝”事件仲有下集　“激心港妈”火拼主办方总监

香港首个国际热气球节本来是万众期待的盛事，原定9月4日于中环海滨开锣，但首日开幕竟发现原来主办方未成功申请载客许可，令到场游客只可以望住个热气球飞，而自己只能站在地面“欣赏”，而且主办方更拒绝退款。有“激心阿妈”嬲到震，受访时字字珠玑，完全无粗口但句句到肉。该访问片成为近日最热门话题，原来除了“激心阿妈”何小姐受访片段外，还有她与主办方对质的片段，一样问到主办方哑口无言！

片中“激心阿妈”与主办方争论，直言要求退款：“而家卖晒飞入嚟，人哋要去旅行，我哋有其他事，我哋系冇可能再入嚟，等你几时升到空，所以你畀唔到呢个service我哋，你一定要退钱。你呢啲系错晒，商品说明条例你根本达标唔到。”主办方口窒窒解释：“因为呢个系门票嚟，𠮶个（指着）热气球资格系冇。”

“激心阿妈”再度展开“攻势”：“嚟呢度嘅人系为咗坐气球，然之后你话畀我听你可以随便更改节目，但系你更改嘅节目唔系我哋想要嘅嘢。”主办方继续重复以上对话，“激心阿妈”又继续说：“你唔好重复啦，唔系要你同我哋讲可以随时入嚟，我哋入嚟做乜嘢啫？你唔好扮苦主，我哋先系真苦主。你未有牌照之前，唔好宣传你可以坐热气球。”