方中信大爆17岁女儿符迦晴拍拖　大感不舍：佢唔好唔记得老豆

方中信今日（13/9）现身金钟出席投资分享会，提到17岁女儿符迦晴的感情状况，方中信接受《香港01》访问时大方分享：“佢谈情呢家嘢佢系有啲进度嘅，（你批准？）其实有得唔准咩，佢偷偷地咪仲衰，不过佢就当然讲啲唔讲啲啦。（有冇讲个男仔点识？）其实佢就冇讲，但我就冇问咁多，始终问佢佢都可以讲大话啫，亦都可以隐瞒我哋，咁所以都唔会去问咁多。”

被问到有否见过男方时，方中信表示：“其实都有望过两眼嘅，系见过佢真人嘅，对方都靓仔嘅。（有冇你咁靓仔先？）其实同我都不相伯仲，佢ok嘅，都系乖嘅，年纪就应该唔系差太远。”被问到会唔会叫阿女唔好挂住拍拖，唔好忘记其他事？方中信笑言：“佢唔好忘记老豆啰，同埋唔好忘记读书，同埋我谂在座咁多位17岁都拍拖啦，拍拖唔系问题，但就唔好忽略学业，始终读书系基本责任啰。”