曾志伟今日现身沙田马场出席“莎莎妇女银袋日”活动，他表示当然支持赛马：“赛马系香港人最大嘅娱乐，最大嘅慈善，我自细都有玩下赛马当捐啲钱畀马会做下善事。（今日会唔会同叻哥比拼下？）实唔够佢唔斗，佢只只买都买。”

提到叻哥陈百祥早前公开表示现在已没有人要靠TVB，对此曾志伟说：“人系需要靠自己，TVB只系一个平台，咁有啲歌手开演唱会都会打电话嚟问可唔可以拍个特辑呀？或者拍咗戏想嚟宣传下。咁算唔算系靠TVB呢？咁见仁见智啦，TVB始终都系一个平台能够畀大家向观众有一个更多嘅曝光率，依家我哋都同好多平台合作，国内都吹紧港风，大家都好怀旧，依家你见到演唱会最卖钱嘅都系张学友、刘德华、谭咏麟，即系证明大家对我哋香港以前嘅音乐文化、电影，剧集都好怀念，所以仲会见到我哋呢啲咁嘅年纪嘅人仲喺电影电视度做紧，好有情怀。（会唔会邀请刘嘉玲返嚟拍剧？）睇佢自己兴趣，请就请佢唔起㗎喇。”

对于陈百祥最近几次访问都大讲TVB不是，曾志伟说：“我哋成日讲阿叻佢系演艺界特朗谱，语不惊人誓不休，佢钟意做第一嘛，咁讲乜嘢最令到人关心吖？咁咪讲TVB啦，因为TVB大家比较熟识啲，咁讲TVB好无人听，就讲TVB唔好啦。咁其实我哋识阿叻咁耐都见惯不怪。（佢呃流量？）无所谓啦，每个人都用唔同嘅方法增加佢嘅曝光率。（佢仲爆料话你入TVB系为咗炒余咏珊？）其实我入咗TVB之后有好多人离职，咁系咪个个都因为我入去呢？咁我觉得系无可能嘅，咁讲边个会令个新闻大啲呢？咁佢咪讲𠮶啲啰。其实大家都知究竟系点嘅。”另外有传闻指曾志伟做到11月便会离任TVB总经理一职，曾志伟表示：“咁快？啱啱阿叻先讲完咋㖞，台庆再讲啦。”