香港资深演员许绍雄（Benz雄）今年10月28日不敌癌魔于医院安详辞世，享年76岁，其丧礼昨日（17/11）于大围宝福纪念馆地下宝福堂举行，今日上午举行大殓仪式随即出殡火化。许绍雄的家人以及挚亲好友今日都有到殡仪馆及火葬场送别他最后一程。

欧阳震华在许绍雄的火化仪式后接受传媒访问，分享他怀念许绍雄的往事，表示：“其实我同Benz呢，佢系我大师兄，佢大我10年，佢第一期（训练班），我第十一期，咁直到我哋正式结片缘就系拍《赌场风云》，咁我啦，Benz啦同三哥（苗乔伟）三个做好兄弟。头先喺上面都撞到阿戚（戚美珍）同三哥，我同三哥都有份帮Benz扶灵，阿戚同我讲𠮶时最开心就系睇你哋拍《赌场风云》，估唔到就好似个剧情咁样，佢（许绍雄）走咗先。”此时欧阳震华即哽咽说：“唉，我听到呢句说话真系，即系人就系咁简单㗎咋，即系戏如人生，好似我哋三个喺戏入面做三兄弟，戏入面Benz雄走咗，都成20年前喇，05年拍嘅。咁大家都有情有义吖，祝佢去一个佢好想去嘅地方，一定系咁嘅。”

问到他可有好多回忆涌上心头，欧阳震华感叹地说道：“好多，我….唉，佢走𠮶日我都喺我自己个微博度发咗一篇，几句啦，其实我喺拍《赌场风云》之前，觉得我自己系主角梗系好多方面都可以独当一面，但系到拍《赌场风云》我对住Benz雄，我简直系无地自容呀，真系呢啲先系神嚟㗎嘛，即系佢做咩都得嘅。佢做乜嘢都称职嘅，佢百搭嘅，我头先喺礼堂度同钟树佳监制，阿钟导倾开，佢话真系可惜呀呢个圈又少咗一位可以令观众睇到五体投地嘅人。老实讲句，有边套戏有边套剧有Benz雄喺入面，𠮶套剧或者戏一定好多㗎喇，无论收视无论票房都一定好多嘅。多谢Benz畀到大家好多欢乐，多谢。”

问到欧阳震华与许绍雄私下相处的难忘事，他说：“其实我哋做呢行好怪嘅，喺𠮶套戏好熟，好熟好熟，但系拍完套戏之后会有几多次再见面呢？呢个唔敢包嘅。但系我，第一我同佢以前呢系视艺会足球队嘅，一齐踢波嘅，就唔系明星队，明星队就系电影明星，视艺会就系电视演员，佢做会长，佢系搞手，咁我哋𠮶阵时成日都有一齐踢波嘅，成日见面，个个礼拜都踢波。后尾𠮶个会就无搞之后啦，我哋好多时都会喺一啲场合度见到面嘅，最近两年都有见过下咁样。（咁有无听佢近年身体嘅问题？）完全唔知。（即系佢都想隐瞒唔想你哋担心？）我唔知佢系咪刻意瞒，但系我觉得佢系一个唔想人麻烦佢，佢亦唔想麻烦人嘅一种人，同我差唔多。”

欧阳震华续说：“我觉得佢心态上系好开朗嘅，好豁达嘅，即系觉得个个人都系会行呢条路㗎啦，系咪，睇下边个上车边个落车先之嘛。（最后一次私下见面聚会系几时？）成年之前㗎喇，一齐食饭。（咁你收到消息系咪好唔开心？）我系收到芷珊call我，阿佘call我，我咪即刻落去养和啰。（放低工作即刻过去？）唔系放低工作，𠮶日我啱瞓醒，咁样咪即刻落去睇下，吓，咁严重？搞到我都晴天霹雳，我睇𠮶啲片佢早几日先同个女拍下啲点样打机呀，斗嘴呀咁嘅片。咁所以，唉，珍惜眼前人，珍惜现在，日日都开开心心。”