古天乐现身Tokyo Comic Con（东京动漫展）的消息着实令人兴奋，大会更特设影相环节，只需预先从官网购买JPY29,000拍照劵就可近距离一见偶像！今日（20/11）古天乐出席活动时，虽表示不太清楚当日流程，但对于粉丝们各种要求就表示十分欢迎。

古天乐接受访问时说：“具体流程我未清楚。我觉得除咗同当地影迷见面之外，都可以睇吓人哋点搞。（会有签名会？）系有，不过唔知流程系点。（好似仲有合照？）哦，合照签名，我都好开心呀。（你个收费仲贵过外国星？）呢个唔系我考虑范围。（有人话收费太平？）咁你买多啲啰。（会唔会有香港站，巡回影相？）我唔系交通警㖞，唔好意思。”

有记者问，古天乐会不会应粉丝摆心心影相？他回答：“我唔知㖞，兴㗎咩？（fans会问问题叫你答）吓，系咩？（惊唔惊？）唔惊，照答啰。（有冇问题唔答？）睇吓问咩啰，冇谂过。突然间问哥斯拉大战超人真系点答？（如果有fans叫你老公，你会唔会叫返佢做老婆？）我会奉劝佢快啲结婚，就唔使嗌我啦。（有咩pose唔做？）你唔好嗌我扮锡佢𠮶啲，唔好啦系咪？（揽吓佢？变咗抱抱会咁）好啦好啦，下个问题！”