宣萱由90年代红到依家，近期活跃于threads，更吸引了一批年轻支持者。而她有份主演的《寻秦记》近日上画，她接受传媒人金成的YouTube频道“叔叔的爱”访问，期间罕有谈到感情观及情史。宣萱较为人熟知的恋情，是与张卫健的两年情，她亦先曾与富商荣文瀚、牙医陈建纬及外籍兽医Ruan等交往，惟最终都未能走到最后。宣萱一直以来都是女强人形象，为人亦不平则鸣，但她透露自己曾被朋友取笑恋爱时是两个样：“有啲朋友都笑我，你做嘢好‘行’，原则唔变唔郁，但系一拍拖就会郁。”

年轻时拍拖过份容让　曾被劝揾有钱佬难以认同

被金成问到拍拖时是否过份迁就与容让，她坦言年轻时会，亦不觉辛苦：“你钟意𠮶个人， OK啦，有啲嘢唔系咁重要就OK啰，唔系讲屈我个人，要我性格去转变，当然有啲嘢系讲紧，我相信系啱嘅人自然就会夹到好多嘢，可能𠮶啲人系唔啱，但而家睇返转头，我又觉得有啲经历系好好㖞，因为我而家好清晰自己要啲乜嘢，好清晰，就算当年有啲朋友问‘你究竟想要乜啫？’我话揾一个夹同爱嘅人，大家相处舒服，佢话你咁样咪错啰，佢话你梗系要揾个有钱啦，真系系咁同我讲，我望住佢，喺我角度系错㗎啰，我觉得唔系咁。佢话你咁样咪唔实际啰，你唔会揾到呢个人，我好深信呢个世界一定有。”

庆幸经济独立有得拣　国籍非重点最重要价值观相近

她觉得“对的人”要相处过才会知道，她也颇欣赏外国情侣相处时的互相尊重、当大家好友的平等关系：“唔系话我揾钱多过你，我就有多啲say，唔系咁样，中国人我会睇到身边有啲朋友Situation系咁样，我觉得我唔得，自己经济独立，呢个系好幸运嘅一样嘢，我可以去拣，好基本。价值观好紧要，要相近，当价值观唔同朋友都做唔到，唔好话男女朋友。”纵然如此，宣萱也不觉得要跟外国人拍拖，她自言曾与华人、外国人交往，但各自都有“夹唔到”的地方，譬如外国人都不明白为何华人子女要买楼畀父母、供养父母之类，因此她认为与人种无关：“纯粹𠮶个人本身，要遇到一个啱嘅人我相信就会啱，价值观自然会似，似你先会相吸。”除价值观外，宣萱找男伴亦必需要风趣幽默和识得自嘲。

曾做第三者相信与性格强弱无关　初恋男友难忘旧爱惨变爱的替身

宣萱过往曾在访问中谈及自己曾当第三者，金成就问她有否分析过原因，会否跟性格太强或太弱有关，宣萱表示：“我觉得未必因为你弱，所以佢觉得可以瞒天过海，反而好讲𠮶个人自己。”她提到初恋男友当时跟前度分手后，就与宣萱拍拖，不过后来女方与新男友分手后，又回头找宣萱当时的男友，二人因而分手：“可能佢真系好好爱𠮶个女仔，只不过佢冇咗，咪同第二个啰，咪同咗我啰。咁咁啱𠮶个女仔揾返佢，佢仲好爱佢，咁佢咪做咗呢样嘢啰，𠮶时梗系好伤心啦，但系而家睇返当时大家都后生，后生嘅男仔未必咁成熟去处理咁多问题。”

误当第三者感晴天霹雳　受伤后不相信男人

至于第二任男友，就令宣萱惨成第三者，她透露：“第二个好明显系原来我系第三者我自己都唔知，系我啲大学同学，佢哋识𠮶个男仔，忍无可忍同我讲，话其实佢有个女朋友，你唔好以为佢系第三者，其实我先系第三者，𠮶时又系晴天霹雳，觉得咁系自己傻啰，系你自己唔知。佢花心系一样嘢，但系佢呃到我，𠮶时真系惊，第二次真系惊。”宣萱坦言自此不信男人，并谓：“会小心好多，但系又冇真系影响到我唔想拍拖，唔系嘅，只不过你再识到嘅时候，你会留意多少少，但系唔多唔少一定有啲影响，你一sense到佢做咗啲嘢同𠮶个人好似，我会惊，会即刻缩。”至于现时，人大了、经历多了，不论拍拖或工作，敏感度都比以前强，有时对方“趷起条尾”宣萱已知对方意图，她更说：“其实有问号已经系一个问题，𠮶个人冇问题，你唔会有问号，如果大家相处系开心。”