娱乐访谈节目《一周星星》第五集嘉宾，是在早前举行的《万千星辉颁奖典礼2025》中荣获“万千光辉荣誉传奇”奖项、并将于本月21日起，由TVB总经理（节目内容营运）转任新成立、专责就新节目内容及策略方向向董事局提供建议的咨询委员会召集人的曾志伟。

曾志伟叹五年任期“得不偿失”

谈到担任了五年总经理，志伟竟以“得不偿失”形容 ，不过志伟口中所谓的失，是指失去了很多他理想中的六十岁理想退休生活：“得系得到好多嘢嘅，都学到嘢嘅，原来做管理层系咁嘅；得到大家嘅肯定啦，最开心系街见到好多陌生人，三唔识七要行番转头揾我话：‘多谢你呀曾生。’‘多谢我咩呀？’‘好好睇呀依家啲节目’，即刻成个人冧晒。”、“失系咩呢，我最记得我60岁生日𠮶时，我猛咁同人讲黄金十年呀，我呢十年要好好享受人生，趁行得走得wet得样样都得嘅时间…无端端临尾仲要走番嚟TVB挨骡仔㖞，又未做过㖞最惨。”志伟续指，做电视圈、尤其TVB，是“冇得停架㖞”：“好似做完港姐咁，听日台庆又嚟喇，做完颁奖典礼又嚟喇，无止境地…不停度嘢谂嘢。”

叹开会责任压力重大致睡眠质素变差

谈到芷珊指他白头发变多，志伟搞鬼笑指只是因为“没时间”：“初初入TVB嘅时间哩，都染吓（头发）啦，后尾都费事染，多得滞，我睇番返嚟𠮶张相（啲头发）全黑架。”虽然白头发变多与健康无关，但志伟坦言担任总经理期间身体确有变差，而其中一个源头竟是因太过担心开会迟到：“我最唔想开会，我最惊，责任好大，一定要较闹钟。因为你唔喺度啲会开唔成，我会好内疚，（变相成日）七点几要起身，哗！好大压力。”、“唔够熟睡个人精神会好差，以前我哋自然醒架嘛，边使较闹钟！”

自评内容创作仅 50 分：认“太癫”工作量吓走同事

而谈到过去五年在职期间对于推动节目内容创作的表现，志伟只给予自己50分！“尽力就100分，好唔好可能得五十分啦。我未做到要放弃一啲嘢，因为我哋人手有限，我都冇谂过有啲同事嚟辞职话，‘你返嚟真系做死人，我过隔篱啲电视台好得闲，一年可能做一个节目架咋，你哋系不停手’，我先知道自己太癫，原来我哋度咗过千个节目，边用得晒！”

任内唯一遗憾：未办成大众认可音乐颁奖礼

志伟又坦言五年任内确有“还剩一件未做的事”：“呢样我觉得最遗憾，其实我自己最想做番一个，我哋香港大家都认可嘅音乐颁奖典礼，但始终我返嚟呢几年都仲未做到。因为颁奖典礼必须有一个大家都好认可嘅音乐榜，我哋未够时间去做好咁多音乐上嘅嘢，呢个系我唯一嘅遗憾，其实我唔止想做香港，我想做成个大湾区嘅音乐颁奖典礼，其实有筹备过，我都同好多大湾区唔同电视台开过会，但未喺我任期发生到。”

管理层最重要是有承担

对于不少同事认为他是节目内容创作的“定海神针”，志伟谦称自己最重要的责任其实是有承担：“我哋做呢个位最紧要我哋有承担，做得唔好要出嚟承担，因为你知架㖞，你畀佢哋做架㖞。”、“就算有啲你真系唔知，你都要话OK，你要帮下面啲人孭先得嘅，同埋好多大胆嘅嘢我哋要去做，未必一定得，但都要试。”志伟续指2022年让周奕玮一人主持整个《万千星辉颁奖典礼》，便是其中一个十分大胆的尝试。

望真正退休后学中医增值

至于辞任总经理后的打算，志伟笑言最开心是可以零企业包袱地回归幕前：“我最想返嚟做咩？做港姐！问港姐问题。”志伟又指当初杀入无线做管理层时，普遍不被看好：“全世界睇死我一定唔够一年，‘佢个人系咁，三分钟热度’，‘好难得啦佢做五年’。”活到这个年纪仍热血满腔、充满拼劲的志伟，透露真正退休后能抽空读书增值自己：“因为我钟意不断有新嘢，其实我有好多嘢好想学，我报咗两次名去学中医，结果都系冇返到学。”

秉承“奖门人”检讨精神：成功更要揾出原因

回顾过去多年的主持工作及参与综艺节目，志伟坦言对自己影响最大的，确是《奖门人》：“边有人做一个节目做三十年？同埋对我嚟讲系自己最满意嘅一件事，奖门人先至系我一个亲力亲为嘅节目，每条题目都系我自己起，每个环节都系我自己谂咁滞。”、“我（𠮶时）每晚做完都请食宵夜检讨，啲人问‘咁成功都检讨？’‘成功先要检讨…点解好睇？点解上个礼拜唔够好睇？因为多咗啲乜嘢？点解请呢啲人好玩？边个好玩？佢有几识玩？好玩在边度？’其实检讨唔系话做差咗要检讨，做好都要检讨，点解好咗？！你揾到好嘅原因，你先至可以做得更好。”

亲揭最爱与已故艺人肥姐合作原因

又谓最后悔的一件事，是曾于节目中因贪好玩向汪明荃阿姐“飞拖”，结果遭肥姐沈殿霞闹爆“想死呀你”，志伟：“所以我点解话我最钟意拍肥妈，系卒之有个人可以喝住我…最开心可以做小子，做小子可以讲嘢当开玩笑呀嘛。”志伟又指即使做了多年主持兼大骚经验丰富，但出台前还是免不了紧张：“系TVB先有咁多Live Show，全世界都冇，所以啲主持真系惊心动魄，明明去完洗手间，临出都要再去一次，我个人冇手汗，但做主持临出场会有手汗，你惊出错吖嘛，系冇得返转头。”