麦明诗一家向来是模范家庭，其职业治疗师母亲麦何小娟亦曾公开公享自己的育儿和教学理念，她除了教出麦明诗这位10A状元外，麦明诗哥哥麦明山也是一位出色的医科生，毕业于香港中文大学医学院，并成为整形外科医生，近日加盟养和医院整形外科中心。麦明诗昨日（12日）发文恭贺哥哥，她说：“我家大佬，一向做事沉稳，默默耕耘。经过多年在专业上的努力，今天很开心能见证他于养和医院展开新旅程。在大家眼中，他是一位对技术精益求精的整形外科医生。在我心里，他始终是那个对人将心比心、充满温度的哥哥。他带进手术室的，不止是专业，更有那份待人的真心。我相信在新岗位上，他也会一如既往，将病人的需要和福祉，放在最重要的位置。麦明山医生，加油！”

预言2026年喜事多？　麦明诗直认一两年内有计划追B

而今日（13日）麦明诗出席活动，受访时都坦言自己都为哥哥开心，因为自小关系已非常密切，希望他愈做愈好，又谓：“今年都几好， 2026年呢个年都几多喜事，希望再有喜事。”被问希望有什么喜事，她笑笑说希望一、两年内会发生，亦在访问中不讳言有计划生多个B：“都有规划有下一个，只系仔定女就控制唔到，希望长远嚟讲都觉得有仔有女系开心嘅。”

选港姐冇收入感激父母畀零用钱追梦　承诺做儿子强大后盾

今次活动讲到生涯规划，她的B仔目前10个月大，她也要开始做规划，又感谢自己父母当年给她很大空间和自由度：“我过往成长，爹哋妈咪其实畀咗我好多空间去发挥自己嘅兴趣、所长，呢啲空间唔系顺其自然，佢哋真系畀咗我安全感、畀咗我一个底气，可以做到呢啲选择。我𠮶时同爹哋妈咪讲话我唔想返工住，我想选港姐，咁即系冇收入，选嘅过程冇收入，选咗开头都冇收入，我妈咪都好好，佢同我讲话我都支持你，生活费每个位畀几千蚊你支持住，等你有嘢食，住屋企，我就唔会话因为生活嘅问题唔可以试呢个机会，最尾好好彩，选完亦都有好好嘅结果，亦都有而家嘅发展。我都谂如果小朋友，我第时点样可以畀佢选择嘅权利？我点培养佢多啲，无论品格、能力上，加上希望佢第时有需要去外国读书或者创业，我都会畀到一个金钱上嘅支持佢。”被问会否支持儿子追梦，麦明诗认为追梦要有策略，如果儿子表现出坚持、方向，而她亦觉得合理，都一定会支持：“做人有时真系有啲决定系听到好似好荒谬，但系其他人唔做你去做，你先有机会跑出新嘅条赛道，我希望畀到呢个底气同支持佢。”

拒做虎妈强求做专业人士：信赖佢决定

麦明诗亦冇强求儿子一定要做专业人士，表示：“冇乜所谓，读咩科目都冇所谓，我都好多朋友大学嘅时候读嘅嘢同佢做嘅嘢完全不相关，大学都系学习点去谂嘢、点去认识自己，究竟自己喜欢啲乜嘢、唔喜欢啲乜嘢，同埋点样令自己个人去运作，个Self-awareness呀，自知之明，读咩科目系一个过程，从中会得出好多技巧，有好多嘅skills其实都可以转移去其他方面，最紧要睇你兴趣。同埋佢读完都十几年后，个世界系点都好难预知，呢十几年如果培养得好，佢会有自己decision，我哋应该要信赖佢嘅decision。”她又笑言，自己到时可能都好老土，不能用自己思想替他做决定，因为儿子会最清楚到时那个时代需要什么。

B仔性格外向不怕生　叹只黐盛劲为玩：唔舒服先揾我

麦明诗透露儿子目前学广东话居多、英文也识少少，其性格外向、不怕人，去茶餐厅用餐都会撩后座的食客，自己和老公盛劲为虽然是“I人”，但都被迫Social。她又提到儿子好黐爸爸，因为爸爸负责娱乐、自己专职教育，她早已习惯和调适好心情。被问会否呷醋，麦明诗说：“头半年妈妈处理嘅事情系好多生理上嘅需求，喂奶，氹佢瞓觉，反而爸爸会多啲同佢玩，我谂佢已经对于我哋唔同嘅角色有个联想，觉得爸爸系玩，妈咪就总之唔舒服、饮奶就会揾妈妈，都好清晰。佢平时一返到嚟就揾爸爸，唔舒服𠮶几日肚饿就爬过嚟揾我，有啲蚀底！妈妈好注重照顾佢哋生理上嘅需要，冇咗咁多时间同佢去玩，所以一谂起有嘢玩就揾爸爸。”她之前试过带BB搭飞机，短短十个月已飞过三次，但没有喊，令她十分欣慰，更赞儿子有世界观。

感恩盛劲为搞大龙凤贺寿　不期望多惊喜：喺屋企出多啲力

上月麦明诗生日，盛劲为在酒楼表演舞狮，又放花炮送惊喜，现场还搭建了巨型花牌，其中一块上款写上“明诗老婆大人”，下款则是“老公喜贺”，大赞太太：“美若天仙 喜庆良辰”。麦明诗就指老公很少送惊喜，故非常感动：“我老公系一个好实事求是嘅人，唔系好多花款做出嚟。我个人都好实际，佢好少买花，可能都知我今年生日系生咗BB嘅第一个生日，好想畀我感受到其实佢唔系净系BB系第一位，老婆都好关心嘅，所以特登喺呢个时候，自己第一次做一坛惊喜俾我，都几有心！（想唔想keep住有惊喜？）唔使咁嘅期望，惊喜最紧要就系估唔到，成日都keep住咁，估到就唔惊喜，所以间唔中惊喜吓，其余时间实事求是喺屋企出多啲力，我都好感动。佢都好落力凑仔，同埋同我一齐培养同教育小朋友，好感恩，我同佢教养嘅方向都系跟住麦太嘅方向，都系好一致，中间都唔会有太大嘅conflict或者觉得唔sync嘅地方，我哋家庭都开心和谐。”