古天乐近日为心血之作《寻秦记》电影，积极现身大大小小的媒体及平台访问，近日他接受郑裕玲（Do姐）《The Do Show》以及金成《叔叔的爱》的长专访，也引起不少回响。一向不喜欢做长访问的古天乐，为Do姐开金口，访问播出版本都有逾个半小时，其中讲到不少较鲜为人知的受伤经历，亦有讲到当初拍《寻秦记》剧集的轶事，他坦言以搞笑方式表达对电视台一些荒谬制作及既定拍法的不满：“对于一个电视剧制作嘅不满，其实我做咗㗎啦，喺套戏里面。”又透露当时拍到发高烧“冧厂”，留医七日，最终决定拍完《寻秦记》要离开TVB，不能再无日无之地拍剧。而他在金成的访问中，亦首揭当初离开TVB，其实是高层何定钧主动提议，他听完对方一席话亦大受鼓励，心想：“我只眼系发光，咁好嘅老板边度有？”

出生脑缺氧积瘀血影响视力、堕马被马踩头、遭车撞飞险毁容

古天乐原来自小受过不少皮肉之苦，先是出世时因并非顺产、脑部曾缺氧，因此他五、六年级时眼睛常常短暂看不见，如像有大片白光在眼前，每次维持十多秒，一日四、五次，照电脑扫瞄后才得悉脑部有瘀血，要食药控制，幸好随年纪长大情况慢慢得以改善。后来古天乐跟父亲去骑马，期间有人用闪光灯影相，马一受惊就向后仰，令古天乐松手堕马，还被马匹踏住头部，幸好因为是沙地，所以无大碍。而中五毕业礼时，他又因为太兴奋得意忘形，过马路被白牌Van撞跌，他忆述：“我起身𠮶刻已经瞓咗喺地下度，同学问我你有冇嘢，我一擘大眼见到啲人喺上面望住我，一起身第一时间望到前面架车，白牌Van，我见到佢车头玻璃系裂晒，个车头系扁，系凹咗一个人形喺度，司机伏咗喺度，我起身成件衫都粉碎晒。毕业𠮶时系夏天，中学系短袖恤衫，成件衫烂晒，块面有血，缝咗几针，而家都有疤痕。”幸好车祸没带来后遗症，更能即日出院，反而司机比他更伤。

做模特儿公司经理人被相中　曾因怕辛苦冇得瞓拒签TVB

之后Do姐曾从古天乐的入行经过讲起，他未正式入行前，在模特儿公司做经理人、帮广告部门找适合人选，但他自己都被找去拍卡拉OK MV：“𠮶时一日拍三首，可以一个礼拜拍足七日，一个礼拜拍21一首歌。”但要数到正式的第一次拍摄，是93年的香港小姐宣传片，他说因为找不到男模特儿，公司便叫他顶上，拍完后TVB曾邀请他签约，但他拒绝了：“拍完港姐之后佢话‘你都几好，有冇兴趣签呀？’我话唔好喇，见佢哋做呢个圈都唔使瞓，𠮶时做一个正常人嘅生活，一日10几20个钟，有时唔瞓一日，可能都要瞓返两日先补得返，有冇可能年几两年唔使瞓，长期拍嘢？你听到都觉得冇可能，我话唔好搞我！一年之后间（模特儿）公司执咗，同一日𠮶个人就打电话嚟，咁仲唔系整定？收咗线之后，是但啰，试吓啰。”

借《寻秦记》剧集抒发对电视台制作不满　寸爆传统拍法

古天乐在艺训班做插班旁听生，未读完就已经有剧拍，结果也一如他所料，很累、很困，试过讲对白讲到一半都睡著了，Do姐听完都问：“边有行业系唔准瞓㗎呢？”Do姐请他回顾多部作品，包括《婚姻物语》、《神雕侠侣》、《刑事侦缉档案IV》、《创世纪II天地有情》、《寻秦记》，讲到《寻》剧时，他透露：“《寻秦记》我谂系我拍咁耐戏，对于一个电视剧制作嘅不满，其实我做咗㗎啦喺戏里面，我将佢变成一个喜剧出嚟表达畀你睇咋嘛，因为我系一个现代人返去古代，所以我当时一接到呢个戏，我第一个谂法‘好玩呀呢次！’等你拍古装成日三机拍摄，唔知做乜鬼嘢，有一个人行咗上前面，望住镜头，全部人喺后面听佢讲嘢，做乜鬼啫？边有人咁讲嘢？”

将电视台荒谬事化成对白：预咗佢剪，但都想试一次

于是他擅用“现代人返古代”的优势玩尽这一点，跟“陶总管”欧瑞伟拍其中一幕讨论和氏璧的剧情时，他说：“佢突然间行咗去，我话‘喂你过返嚟啦！同紧你讲嘢！’有样嘢我冇讲过，喺呢套戏我将我咁多年喺电视台做嘅一啲我觉得荒谬啦，唔合理啦……其实喺我角度几好笑嘅，我试吓摆咗佢落去。”Do姐于是问，电视台真的容许他这样做吗？古天乐回答：“畀，但系你要记住，佢有权剪。我唔理啦，做好佢先啦，做完之后你问我，我做咩都系预咗……你咪剪啰，但系我都想试一次吖。”

染恶菌发高烧留医7日冧厂　心淡公司只顾追问何时复工

Do姐再问他是否拍《寻秦记》太辛苦而离巢，他说不是太辛苦，而是大病了一场，平时宣萱在片场停机后总是“鸡啄唔断”很多话，一停嘴不超过五秒又会再说话，古天乐直言当对方是男生，他续说：“有一日我喺某个水塘拍外景，大家化好晒妆埋位，我坐喺货Van后面，佢埋嚟同我讲嘢，我冇应过佢一句，佢提我埋位，我都冇应过佢一句，跟住我同佢讲‘我唔得喇……’佢冇见过我咁，跟住我就入咗医院，一瞓瞓咗七日，原来𠮶时我叫佢唔好讲嘢𠮶时，我已经烧到102度，再多1度就烧脑！入咗院医生同我讲，话你有两三只菌喺身，我话咁大镬？咩黄金葡萄球菌，唔知咩菌，每一日打退烧针、吊盐水，一个礼拜都冇退烧，一个礼拜之后我问医生再唔退烧咁点，会唔会烧坏脑？佢话冇办法，你要等佢自己退。TVB好关怀我哋所有artist，第二日已经有人过嚟探‘你点呀？’又俾个生果篮、慰问卡你，问‘你点呀？’我话医生话咁咁咁，佢话‘哦，你几时可以返嚟开工呀？’跟住我话唔知，你问医生。”

病榻中反思人生　与梁家树讲数争取休息

当该工作人员离开后，他开始反思：“其实我仲要咁样到几时？又唔够瞓，病又冇人……系，你有慰问，真系好关心我，但不如算啦，拍埋呢部。”他出院后跟时任戏剧组制作部总监梁家树商讨，拍厂景可以晚晚开，但拍外景则想开一日停一日，结果最后《寻秦记》拍了9个月才完成，亦是他在TVB最后一套剧集作品。

获TVB高层何定钧一句“你唔系属于电视，你属于电影”　决心外闯

古天乐其后转战电影圈，甚至完全不用“过冷河”，他在金成《叔叔的爱》访问中，亦讲到当时其实是受一位TVB高层所鼓励，公开了从未对外讲过的离巢内幕。他说：“拍完《寻秦记》，𠮶时电视台高层叫何定钧（时任香港无线电视广播业务总经理），佢约我食饭，我谂都系倾续约𠮶啲，好啦倾啦，𠮶时我拍完《寻秦记》，我都谂住搞唔掂，但系𠮶时𠮶个好大嘅高层，佢一坐低就同我讲：‘你唔系属于电视，你系属于电影，你出去拍电影！’我𠮶时望住佢，我只眼系发光，咁好嘅老板边度有？”何定钧看到他属于电影的特质，甚至让他保留著TVB经理人合约出去拍戏，他又说：“当年有个讲法，话你出去拍电影，有祲‘电视馟’喺度，啲人成日咁讲，佢难得见到我冇咗𠮶祲馟。”原来正因为何定钧一句话，成就了古老板电影大亨之路。