现年30岁、凭《东张西望》成功入屋的梁敏巧（Maggie），于年廿九当日因为赶返家食团年饭，竟因一时大意误搭“霸王车”。梁敏巧因为刚换新电话，她的学生八达通“搞咗好耐”都未能过入新电话，所以她近期搭港铁都转用Alipay入闸。事发当日她乘坐头等车厢，并用电话内的Visa卡付车费，谁知因为手机贴了“超级防偷窥Mon”看不到侧面，加上惯性以为电话“震一吓”就代表Visa付款成功。怎料有港铁职员上车查票，即场踢爆她未付头等车资，Maggie才恍然大悟。她更自嘲正因为平时少搭头等才出事，并叫大家不要指她离地，最后更做反面教材提醒网民：“唔好似我咁丑怪啦！”

开live逐点澄清网民指控

事发之后，梁敏巧即被网民公审，指她“无知唔系大晒”，梁敏巧昨晚就特地于社交网开live谈及今次事件，并逐点澄清。 梁敏巧再次交代公开事件的初衷，澄清并非因为甩身而觉得好威，她说︰“其实罚款前，佢哋系先check你纪录良唔良好；第二执法都系人，你态度冇同佢对着干，唔系冇礼貌，而系同佢哋好好解释发生咩事，如果佢觉得合理，相信都有酌情权呢回事。可能有人觉得︰‘因为系Maggie，所以捉到都唔使罚钱！’我再重申，我真系唔知港铁职员知唔知系我，因为我戴晒帽同口罩，又唔化妆，我唔知佢哋其实知唔知我系边个，我亦唔觉得佢哋认得我，因一路以嚟都系用‘小姐’称呼我。”

反击被指“无知唔系大晒”

梁敏巧续说︰“综合多方面，佢哋决定放我一马，相信有佢哋嘅判断而决定唔追究。就算事后追究，我亦愿意接受，都系罚1000蚊，唔系咩严重事件。我从来无唔认衰，我从来无话无罚钱好得戚嘅心态，我从来都唔系呢个心态。”她又反击“无知唔系大晒”这一点说：“有人话无知大晒呀，咁以后好似Maggie咁捉到唔使罚钱啦。我觉得如果咁拗落去冇意思，我希望大家有番合理、理智咁讨论件事，你要咁样‘啫’我都无办法，因为真系我衰嘛，我有问题嘛！当日分享只系感谢港铁职员无即时处罚我，我系用呢个心态自爆件事。我尽咗做错事之后，应要尽嘅责任，我身为公众人物，分享俾大家听，只系叫大家唔好似我咁戆居咁傻。用Alipay搭头等，要入闸前揿定，否则会俾人罚钱。初衷系咁简单，冇谂过大家将件事扭曲晒，无谂过大家因为职员放过我，而捉住呢个point咬我，冇谂过原来大家咁care。都系𠮶句，要罚的话我从来愿意接受，冇讲过自己系公众人物而得戚。”

对于网民质疑她为何不用八达通，及港铁有张贴指示仍犯错，梁敏巧解释道︰“啲人话点解你唔用八达通，我唔用就唔用，呢几年冇用唔影响我生活，而家有咁多电子支付方法，点解要‘啫’我唔用八达通。再者，啲人话入闸之后边度边度提咗你啦，都系𠮶句，如果我知，就唔会咁核突。我真系唔知嘛，我唔多搭东铁线。所以种种因素加埋，变成一件咁核突嘅事。我衰我真系衰，无知地搭咗‘霸王车’，真系好丑样，讲出嚟都好核突好难听，我系衰我系错，我真系搭咗‘霸王车’，但唔系专登，只系因为我无知啫。我再重申无知唔系大晒。啲人点讲我我控制唔到，只系我有责任交代清楚，我唔想港铁职员被误会，亦系今次开live交代清楚原因。你有钱都冇用，唔识俾钱都系冇俾过钱，大家要小心啲。我阻止唔到大家点谂，我要讲嘅系咁多。”