李龙基今日（3日）现身好友陈德森的新书发布会，访问一开始，他已向在场记者表示：“新年快乐，唔好学似我咁，咳咳！你听吓我把声……”声线沙哑的他透露年初三工作后，年初五就开始病，本来不以为然，自己食成药，后来病情转差求医，医生诊断为感冒。问到何事生病，基哥说：“冇人冚被⋯⋯讲笑啫。”他指前阵子天气忽冷忽热，出外玩模型飞机时不小心著凉：“唔后生呀始终，唔同以前30几40岁，老虎打死九只，而家老鼠都打唔死。”他透露前两日直情开不到声，但后日就要唱歌表演，希望能尽快痊愈，问到会否找个对象照顾自己，他说：“暂时唔揾噜。”

工作量骤升排至今年6月　至今仍理解王青霞隐瞒婚讯

新一年基哥成为逆市奇葩，工作已排到六月中，新年至三月在内地及香港皆有活动，六月则去澳大利亚、美加等开骚，他直言有段时间因“无良YouTuber”的假消息损坏形象，工作量明显减少，不过他相信时间已能证明自己为人，大家最初可能不会分析，乱信网上消息，但久而久之都会知道有人“乱作”。记者提到，当初王青霞已婚的消息都是由YouTuber爆出，他也不否认，而对于王青霞他仍处处维护，表示理解：“到而家我都冇嬲佢，我都好明白点解佢唔同我讲，因为真系好惊，一讲咗出嚟，佢有佢考虑。佢话自己会搞掂，到时或者佢搞清楚再同我讲，OK，过咗去嘅嘢。”

怕遭YouTuber放大言论失工作　封口避谈王青霞

基哥一反常态地不欲多谈王青霸：“我每一次接受访问，跟住又有好多YouTuber睇到，一睇到，两个字咋，佢捉住两个字，然之后就话揾专家分析点解会讲呢两个字， AI又分析依两个字系点解，佢哋可以咁深入！有时唔理佢哋系唔得㗎，尤其是有某位YouTuber直情做一啲假嘢出嚟，做假嘅证据出嚟，我都希望唔好再畀任何题目佢哋继续落去。”问到是否怕事件进一步影响工作，故此宁愿封口，他不讳言：“会㗎，会㗎，绝对会㗎！最近有一个商场，本来倾好晒，跟住商场话李龙基我哋暂时唔做先喇，迟啲先，我都好明白咩意思，都系睇咗啲负面新闻，提款基、失德基、乜乜机、洗衣机、洗碗碟机……不过咁，冇乜所谓，我绝对唔可以话逐个逐个回应佢哋，佢哋点写系佢哋嘅事，普通市民大众市民眼光系雪亮，睇得多亦都知道真相系乜嘢，所以我而家都睇得好淡，你点写就点写，尽量唔好甲太多话题佢哋讲。”

听高人指点停染粉红头　谈与王青霞缘份：乜都唔谂，心如止水

他透露新年有与王青霞互相问候祝贺，始终都是朋友，对于当初王青霞爆婚讯后的“解释”，他没太大感觉，一切交由时间安排。李龙基指近日见到游飊离世甚为感触及可惜，自己连明日能否睁开眼都不知道，所以更会对一切看淡，尽量别被外来因素搞乱自己。早前基哥向《01娱乐》透露，受高人指点今年不再染粉红头，因他属木，若再在头顶染红，恐怕“由头烧到落尾”，问是否因之前染错头招惹了不该招惹的是非，基哥说：“我唔知，唔敢讲，不过事情过咗去，系又好，唔系又好，事情都发生咗，由得佢。我觉得上天好有安排，你听日会做乜听日会做乜，我希望佢安排我做多啲嘢，唔好搞咁多嘢。（记者：有另一个节目嘅师傅，话你同王青霞未缘尽？）咳咳咳⋯⋯都系留俾上天嘅安排，缘尽定未尽，暂时你问我，我真系乜嘢都唔再谂，心如止水。”

坦认近两年运程极差　将求黄大仙指点迷津

讲到去年运程麻麻，会否趁新一年去求神或睇运程、趋吉避凶，基哥笑说：“我呢两年运程非常之差㖭啦！非常之差！今年，讲真，我自己有少少担心，所以亦都未敢去问，但系我迟啲会。我几信命运，我亦都几信黄大仙，黄大仙好多时可以指引下我，我迟啲有时间问一问黄大仙今年运程点。”