金燕玲近日接受方健仪网台节目《女人方言》访问，期间谈到自己曾照顾患癌父母，哽咽忆述最难以忘记的一幕；又分享两度患癌、两度离婚的心境。金燕玲与苏施黄相伴20年，不过她至今仍不认为彼此的关系是“爱情”，直认当对方是“水泡”，抗拒承认自己因婚姻触礁后不喜欢男人而“变孪”。而讲到对离婚的体会，金燕玲以过来人身份苦劝女性不可以乱生小朋友、不可以没工作，更表示：“我就系为咗婚姻，连自己都唔要咗。”

罕有由影坛转战电视圈　离婚后拍处境剧力求观众入屋

大多数艺人由电视台进军影坛，但金燕玲是少数从影坛走入电视圈的，她于约50岁时拍无线处境剧《同事三分亲》、《毕打自己人》，指当时与第二任丈夫离婚后前路茫茫，突然获曾励珍（珍姐）邀请，尽管起初都有点担心，但觉得拍处境剧日日有曝光，是很好的方法让观众记住，于是就答应。拍《同》剧她颇开心，但去到《毕打自己人》她常常觉得“到喉唔到肺”，中途便决定退出剧组：“我同珍姐讲，我唔做喇，你铺排我死又好乜都好啦。”其后又参与了神剧《天与地》拍摄。

演艺生涯不介意做绿叶　唯独抗拒刻意“扮后生”

金燕玲的演技一早备受肯定，但入围或获奖总是“最佳女配角”，不过她早就不介意没主角做，甚至30岁时饰演嫲嫲都接受得到，反而最介意一件事：“𠮶时工作机会唔多，所以每个机会嚟我都觉得唔紧要，我就去做，揾食嘛，有工作做我都好开心。我从来都唔介意我做咩角色，我反而净系介意一样嘢，我好怕扮后生！如果去到而家我71岁，好似《金多宝》，要做60几岁、要后生啲，我问导演，‘你系咪揾第二个人嚟做呀？’佢话‘你做！’我反而会觉得……我唔系好buy呢样嘢，扮后生，好奇怪㗎，你明唔明？”金燕玲坦言初入行时对工作毫无抱负，直至离婚回港后重新开始，她才知道自己要走的路就是好好地做好每一出戏，只能这样才有生存空间。

两度患癌学懂体谅照顾者　与阿苏展现无声默契

金燕玲先后患上过子宫颈癌和乳癌，很多人会关心她的抗癌历程，但却鲜有人问及她在父母患癌时作为照顾者的感受。她指：“我好记得爸爸临终𠮶一日，佢好辛苦喺屋企，辛苦到不得了，佢系上海人，佢成日都用上海话讲‘死得喇！死得喇！’当佢一路喺度讲嘅时候我好难受，因为我唔知道点样样，有咩可以做。”她指病人会慌、照顾者一样会慌，但因著这此经历，她患癌时反而很知道要如何配合照顾者“阿苏”苏施黄：“我哋两个嘅相处之道就系，大家都识得生病就要入医院，我哋大家都明白，你都唔知要点照顾我，去医院最好喇！我试过做紧化疗，我喺屋企好辛苦，好似鬼咁样飘，行几步去个厅，佢就瞓咗喺厅嘅梳化，佢唔会同我讲咁多嘢，因为我都讲唔到嘢，又冇嘢想讲，总之你飘出嚟见到佢喺度，咁你又飘返入去，尽在不言中，唔使讲嘢。佢初初都会想煮啲嘢畀我食，我话唔使喇，食唔落，我自己想食咩我会讲诚畀佢听。我意思系，做一个病人都好紧要，你要去帮照顾你嘅人，你都要理解到做病人唔系大晒，唔系我病我就大晒，钟意发脾气，钟意忟憎，你忟憎都要体谅照顾你嘅人啰，因为佢哋都好慌。”

至今难忘癌父临终为失禁道歉　哽咽表示：我难受到不得了

金燕玲父母各受癌症困扰五年，她作为家中长女，肩负起照顾责任，所幸情绪没有“爆煲”，但父亲临终前数月的一幕，令她至今难以忘怀，一讲起就哭。她说：“我𠮶日喺医院，佢𠮶时已经系最后𠮶几个月，唔可以自理，会失禁，我突然之间肚痛，喺厕所冲出嚟，就见到我爸爸已经失禁，我爸爸系一个几好样嘅男人嚟，佢一世人就系一家之主，照顾咗屋企成世，又失禁，佢系咪好难受呢？佢觉得自己都好冇自尊，我知道佢流紧眼泪，我唔敢睇佢，跟住佢就同我讲一句，佢同我道歉，我难受到不得了！”金燕玲哽咽续说：“呢个去到我拍《一念无明》𠮶部戏𠮶阵时，余文乐做我嘅仔，我𠮶个角色又系有时会有失禁呢个问题，佢要帮我清理，导演唔知道我有呢个经历，我话‘你可唔可以俾我讲对唔住？’将我爸爸同我讲嘅说话我讲咗出嚟，呢个就系好……好难受，永远都唔会忘记嘅一个记忆。”

两段失败婚姻因由　为第一任前夫堕胎、二婚为爱女死顶多年才离婚

访问中，金燕玲又谈到两段婚姻，以及与苏施黄的感情。她将第一段婚姻失败归咎于太后生，因为她19岁认识前夫、21岁结婚、27岁离婚：“爸爸妈妈从小家教就系女人系好似生出嚟就系为结婚而生存，所以我自细就煮𩠌好叻，做家务好叻，为屋企付出。但我哋讲小朋友、婚姻，如果你生小朋友边个凑？第一段婚姻我𠮶阵时其实有机会可以生两个小朋友，76年又大肚、78年又大肚，结果因为老公唔要，所以我冇生到，我而家谂返好彩唔要，因为我觉得自己都未够成熟。”到第二段婚姻，金燕玲是奉子成婚，因为她当时已经36岁，很想要小朋友，所以就结婚了，但其实结婚没多久她已发现婚姻有问题，只是她为了对小朋友负责一直“死顶”。

苦劝女性勿乱生仔及经济独立：我为婚姻连自己都冇咗

她亦以过来人身份，苦劝广大女性两件事：“我觉得自己嘅经历，我好希望share出去畀所有女性朋友，第一就系小朋友唔可以乱生，真系要考虑你自己作为一个Mother，我只可以代表女性讲，我唔可以代表男性讲，边个嚟凑呢？我今天另外一样嘢我好骄傲嘅就系，虽然我最后都离婚，但系我对个女嘅照顾，一手一脚凑到15岁，后尾因为爸爸嘅外遇，佢唔处置𠮶样嘢，我已经去到50岁，牵涉到如果我再唔出嚟做嘢，我生存唔到，我系因为呢个原因，我先至要离婚。我要离婚其实佢一岁、几岁我已经可以离婚，我作为一个Mother，我要去负责，因为系我自己要生嘅，所以到今时今日，我同个女嘅关系系好close，我而家今天都同个女讲，你一定唔可以唔工作，唔可以冇自己收入！因为我就系为咗婚姻，连自己都唔要咗。好多时婚姻唔work就系因为呢啲因素，我唔可以讲永远系人哋嘅问题，自己都有问题。”

失婚前路茫茫获阿苏表白　获爱女支持跨越心理关口

金燕玲两度与男人结婚，但后来她与同性的阿苏成为人生伴侣，方健仪问这个转变对她有什么启示，她二话不说：“冇启示！”她指当时回港后前路茫茫，跟阿苏打麻将后，阿苏竟向她表白：“佢觉得我好凄凉，话有冇搞错，人做呢行你做呢行，做得你咁凄凉？钱又冇乜都冇，几廿岁人撞到咁嘅情况，佢睇到我stuck咗喺一个咁嘅处境，可能就系吸引到佢，于是乎佢就Approach我，就话‘我好钟意你，我觉得你好惨，我想照顾你。’我真系觉得‘咩事呀？我同你打吓麻将，咩事呀？你觉得我有咁嘅倾向抑或点样？’佢话唔系，我纯粹觉得你好惨，佢就话我想整一个屋企畀你，你就可以有地方住，咁你返嚟香港，你冇工作咪唔使惊啰，唔使惊交租。”

金燕玲当时心想“有冇咁嘅人呀？有冇咁著数？”不过她亦跨不过心理关口，要求只做朋友，然而阿苏要她做其伴侣，金燕玲考虑期间咨询了女儿意见：“有一日我就同我个女去散步，我就同我个女讲，跟住落嚟我会同你讲啲嘢，你讲畀我听你嘅谂法，我净系咨询佢一个人，我问完佢之后，佢冇讲嘢，我话‘你讲，唔紧要，你讲咩都得，你讲得㗎喇，你总之心里面谂咩你就讲。’佢话‘I felt very awkward to talk about it.（我觉得讲这些很突兀。）’咁我就话‘me too（我也是）’，我就真系贪图佢会整一个地方畀我住，我真系需要一个地方，系呢样嘢吸引我，佢话呢个人真系会好似佢讲嘅咁样照顾你咩？我话我又唔知㖞，佢系咁讲，佢话如果你需要嘅，佢又真系会照顾你嘅，咁你咪去啰。”

坦白关系为求容身之所　抗拒被标签为同性恋：当阿苏系水泡

金燕玲从来不隐瞒，自己接受阿苏纯粹只为一个容身之所、贪图有人照顾自己，但她也十分抗拒被当是同性恋者：“之前我一路都喺度拗紧呢个挛唔挛，佢话因为我同你一齐，人哋睇你会系我嘅partner，人哋会当你系挛，我话‘咁我最多系半个挛啦。’（方健仪：你都系有少少抗拒。）我抗拒！我非常之抗拒！我真系唔系因为离婚唔钟意男性，跟住钟意咗女性，我唔系吖嘛！我到而家都唔系吖嘛！”被问是否当阿苏是水泡，金燕玲非常坦白：“绝对系当佢水泡！”她指最初与阿苏及其同性恋朋友约会时，自己也很不舒服，幸好阿苏从不勉强她，对她好到不得了，她亦坦言与阿苏关系至今已长达20年，让自己及身边朋友大跌眼镜：“眼镜都跌烂晒，我冇谂过会同依个人，结果而家时间长过我两段婚姻，我冇谂过。”

断言非爱情却相伴20载　感激阿苏兑现承诺用爱感动

她果断表示自己对阿苏一定不会是爱情，表面上笑言：“我成日望住佢，你又矮又肥，我都唔知做咩同你一齐。”但内心她却觉得阿苏有一颗善良的心，只是从外表看不出来，惟有从经年累月的相处中，她切切实实感觉到一件事：“一个人爱惜一个人，佢系点样take care你，我哋嘅关系……系两个非常之独立嘅人住喺一间屋，有200%嘅自由，从来出街唔需要问过对方，我可以形容为一个……系用‘舒服’两个字嚟形容我而家嘅关系，点解我可以同佢咁耐。”金燕玲指，尽管大家是独立个体，但每晚食饭时又会互相分享当日的生活，“呢个系从来喺我过去两段婚姻，过去嘅男人又好，从来未试过有一个人咁样，同我会大家分享大家啲嘢。”在访问最后，她感谢阿苏用美丽的爱去感动自己，对当初的承诺说到做到。