黄浩然入行29年，经历银河映像时期的磨练，也在电视台高产岁月中成为观众熟悉的收视福将。上回谈到，他曾在电视台十多年日睡不足四小时，长年透支身体，直至一场罕见免疫系统疾病，令他被逼停下来，重新反思家庭与工作的排序。
来到人生下半场，他把目光重新投向电影、舞台与自己。以往拍过不少电影，他对电影圈仍有憧憬，却坦言连金像奖座上客也未做过，甚至为此感到惭愧，盼待有朝一日能以提名者身份踏上红地毡。50岁的他，比以前更愿意试，学唱歌、演音乐剧、挑战独脚戏，不再事事计算成败；而年岁带来的突破与课题，不独在舞台上，也在待人处世上，他坦承：“我觉得以前系令到好多人唔开心……同我共事系好辛苦。”
服装：CLOT

黄浩然专访｜拍剧十年日睡4小时终大病　辞演火速被代替认清轻重

未曾参与金像奖感惭愧 盼能有电影提名

在TVB期间，黄浩然几乎是收视保证，机会接踵而来，但他自从2010年拿过“飞跃进步男艺员”后，似乎与奖项不太有缘。对此，他显得意外地坦诚，甚至带点自责：“我金像奖都未去过添！我连座上客都未做过，好奇怪。呢样嘢我未讲过，我同自己讲，我会唔会有一日可以去金像奖睇呢？我未去过，我老婆都去过帮新演员做形象顾问，我依家讲都觉得好惭愧。”

拍过无数电影，却未曾以提名者身份踏上金像奖红地毡及舞台，成为了他心中一份隐隐的牵挂：“我都希望系有提名嘅时候去，电影提名未必一定系金像奖，但香港最代表性就梗系金像奖，都希望喺电影上面有啲提名。”过往访问艺人类似问题，很多人都会表示对奖项随缘、遇上好角色比奖项更重要等等，但黄浩然却非常坦白，更说：“咁我真系未够好吖嘛，人哋觉得你冇咪冇啰，系咪呀？就算你好，都好多因素会影响到你㗎嘛。但系你问我嘅，我好想有呢一件事去发生，就系话有朝一日可以有啲电影奖项嘅提名。”

迷惘中获古天乐经理人Ronnie拯救 放心交托自己予对方

上集提到，他离开电视台其中一个原因是发现自己对出现在大银幕上仍有憧憬，相信也因为这样，他选择加入古天乐旗下的天高娱乐。这份机缘，源于一份累积了二十多年的信任，二人结缘于1999年的电影《甜言蜜语》，之后亦有合作，但今次合作的关键是古天乐经理人Ronnie。“我同Ronnie倾偈，我就话其实我可唔可以走出嚟啊？我都想真系试吓㖞，好耐冇返返电影，我想跳出舒适圈，会唔会有啲可能性？佢好好呀真系，即刻帮我line up咗成件事，除咗老板， Ronnie而家都系我经理人，我哋公司好好就系大家个自由度好大，佢亦都好清楚我想要啲乜，或者我唔钟意嘅嘢，佢哋亦都唔会叫我去做啰。”黄浩然直指，Ronnie是在他最迷惘时把他拯救的人，他亦放心把自己交托予对方，给予无限量信任。

至于老板古天乐，浩然眼中的他，从当年的轻松演员变成了背负业界使命的领袖。“以前佢拍完戏就返屋企瞓觉，依家去拍完戏仲有好多嘢搞，身份多咗好多，成个娱乐界，样样嘢都关佢事㗎嘛而家。”他觉得古生的性格没怎么变，一样说话简洁，但不同的是他背著一份使命感，身体力行为业界谋生，默默付出：“佢好多嘢都系做咗唔出声嘅人，同埋佢系完全唔会认叻嘅人，佢系做咗咪做咗啰，唔使特登讲。”

古生虽然忙到睡觉都没时间，但他仍会拨冗约旗下艺人见面，了解一下发展方向，“其实我哋都会定期有artist同佢单拖食饭嘅，但系𠮶个饭局就系，佢一晚要几个饭局，老板好忙，有时公司春茗佢都会走埋嚟，当然啦，我签得佢，我梗系：‘大佬，有啲角色拍吓啦，可以有多啲嘢玩吓啦。’”他理解现时电影业界确实正经历寒冬，僧多粥少，想开戏都难，唯有互相撑住。他十分感激古生即使再忙，去年也抽空看足他全场舞台剧演出“第一佢好忙，第二就系喺呢啲环境通常佢都会入嚟打完招呼，可能坐一阵，开咗场，或者甚至乎唔坐，打个招呼就走，但系𠮶阵时佢入嚟打完招呼，出咗去睇。佢又同我分享话‘你做得OK呀，我好钟意呢个戏！’好感动，大家都尽在不言中。”

打坐学唱歌演戏 忽然参演音乐剧

去年黄浩然首次拍ViuTV剧《翻盘下半场》，观众反应正面，赞他演技跃进；他更参演了音乐剧《三．八》与《我们的青春日志》，不但要演戏，还要开口唱歌。初入行时想做歌手的他，终在入行28年后演出音乐剧，他透露自己在《三．八》前半年开始学唱歌，当时并未接音乐剧工作，纯粹因一位音乐人而重拾唱歌：“有一个出名嘅音乐人，佢就问我‘你唱唔唱歌呀？’我话‘吓？我以前唱歌㗎！’‘你依排冇嘢做，学吓唱歌啦。’到依一刻我就唔会透露呢个音乐人系边个啦，到如果真系有机会我同佢合作出咗首歌，咁大家就会知道系边个。”

除了学唱歌，他又趁工作量不多的空档跟素人一起上戏剧课、跟常霖法师禅修：“全部人见到我都好意外，‘下？你仲嚟上堂？’咁我话‘系呀，唔得就要嚟上堂㗎啦！’希望揾到啲新嘅嘢，explore到啲新嘅嘢。”他当时并没什么目的，纯粹想学，就一鼓作气向前走，结果就出现了《三．八》这个机会：“我每样嘢都准备咗之后原来就有呢啲嘢发生，更加令我觉得，其实都唔使谂咁多，你想做咪做咗先啰，你唔做、唔行，就永远都唔会有生机，或者有啲机会、可能性发生，只要你行，你肯行你肯郁，就有好多可能性。”

首演独脚戏望身教儿子 以前必怕输不敢挑战

之前的音乐剧，确实有观众评价赞浩然唱歌好听，他谦称：“唔系叫好嘅， OK啦，未算系好，同好争好远。”接下来他将在5月份挑战更高难度，在只有60人的空间演沉浸式独脚戏《Ko’s Coffee 的最后1小时》，一个人撑起30页对白，他形容是“自己玩自己”，亦是踏出了非常大的一步：“以前我一定唔会接㗎！惊啰，惊做得唔好啰，会好计个结果，我做完有咩得益呢？冇㗎㖞，可能做几场，但系你要排好耐、要花好多时间，仲有个风险系你可能好衰㖞做得，会做唔掂㖞，因为所有嘢都唔系我专长。”

但现在他不再框死自己，反而对任何事都觉得一试无妨，更表示成功挑战不熟悉的范畴，那份满足感更大。此外，他亦视这种突破为身教，鼓励两个儿子勇于尝试：“我啲小朋友睇到我对一件事件，对我嘅工作𠮶个认真、𠮶个专注，其实都系一个畀佢哋嘅教育嚟嘅，哗，一件咁难嘅事，我畀佢睇𠮶啲台词，咁多，要唱咁多首歌、讲咁多对白，阿爸都去做㖞！我都想畀佢哋睇吓，有啲嘢你系要practise，我喺屋企不断咁重复重复去讲台词去唱歌，要畀佢知道，原来真系要去做好一件事，其实你要落好多苦功。”如果你口里叫他们“温书啦”、“做好佢啦”、“做练习啦”，小朋友不会听得入耳，甚至会抗拒，因此他希望以身作则，感染儿子都跳出舒适圈。

舞台剧演出受众贵精不贵多 50岁新成就解锁

在电视、电影的黄金盛世拍摄，演一次已随时能传播到过百万观众，但现在演一场音乐剧，距离固然近，但接触到的每场只有60人，问浩然会否有落差感，他说：“咁咪更加珍贵啰，即系你要买飞入嚟睇啰！好似我呢个《Ko’s coffee》，我做，真系几场㗎咋，我老婆都问‘哗，你排咁多嘢，嘥咁多时间咁多心机做几场？’就系咁㗎喇，你唔睇就冇得睇㗎喇，60人一场，得几百人睇到㗎咋，佢又唔会录嚟播嘅，你睇到就睇到啦。”浩然忆述去年首次做舞台剧，剧院容纳到千几人，做了13场，即使闲日都场场爆满，使他首度感受到舞台剧威力，“冇㗎喇，你睇唔到就冇得睇㗎喇，就系咁所以只要系好嘅戏，大家就去睇啰。”在50岁时迎接了唱歌和音乐剧的挑战，浩然并冇特别订立下个目标，反笑说：“做好而家嘅嘢，啲嘢就会出现啰！冇特别谂咩解锁，喂，大佬，我一个人讲30页纸都叫解锁喇啩？呢样嘢都仲唔叫解锁？咁咩叫解锁？”

谈到踏入知命之年的改变，他认为跟“四字头”相距甚远，变得比之前心急。虽然浩然外表、体能绝对不似50岁，甚至他自言Fit过以前，但心态上就觉得现在很赶时间：“超过咗一半㗎喇㖞，要每一样嘢玩多啲㖞，多啲唔同㖞。所以你话我会唔会定一个目标，我唔会定一个咩嘅目标或者想咩解锁，但系只不过有啲新嘢嚟玩，我就会同你玩啰，都唔会拒绝啰，无论几大挑战性或者几难，我都觉得要试㖞！”

意外爆粗获赞贴地 真情流露视观众如朋友

除了演艺路上的成长，观众亦看到黄浩然的更多面向。早前他亮相好友Brian@24味（李凯贤）的YouTube 节目，见到对方写挥春时，冲口而出讲了一句：“X你个X样变咗书法家㖞而家！”这份“真性情”意外地获网民疯传大赞贴地，YouTube上的留言包括：“第一次见浩然哥讲咁多粗口 好正”、“多谢JBS搞呢个台 带动多啲人real啲 好钟意睇到啲艺人可以摆低形象 畅所欲言”等，他不讳言：“其实我讲好多粗口嘅。我冇刻意谂，始终我自己系一个公众人物，太多都唔系几好嘅，只不过佢嘅风格……”

不少人对于Brian和浩然是好友感到意外，但二人其实已相识20多年，自己在媒体面前未必能完全展露真性情，怕影响到人；但在好友面前当然比较放松，一句半句粗口他相信无伤大雅，但就不会刻意为讲而讲，他强调：“想讲咪讲啰，我又唔系please你，我又唔惊你闹我，咁我讲咗咪讲咗，我觉得真情流露𠮶样嘢紧要过，要为咗目的去讲，我就唔会啰。”他指出这个年代已没有明星，社交媒体发达，观众追求的是真挚，希望艺人像朋友一样：“你对朋友系点呀？咪最真挚𠮶面俾你睇啰，我唔会掩饰嘅，我系咁咪咁啰，我唔会话‘哎呀，黄浩然唔讲粗口㗎。’唔系，我讲粗口㗎，不过依家讲少咗嘅，我喺我啲仔面前直程唔会讲㖭啦，最严重都系X街𠮶啲啰。”

问到以前是否比较有偶像包袱，或因为一些原因较保护自己，浩然说自己30岁就结婚，显然没什么包袱，要说分别的话，自己以前确实没那么放得开：“我会计算啰，我会计算我要塑造呢个形象又可以点呢？但系依家，我咁咪咁啰，我接受得佢访问，我冇谂咩㗎，咁我见到佢，条友仔喺度写中文，我咪讲咗𠮶句粗口啰，冇谂过啦总言之，咁咪OK啰，大家又觉得你几真挚㖞。”

由心说起——从前脾气差追住幕后闹 伤害人感悔疚

访问末段，问浩然若能回到过去改变一件事，他会改变什么呢？他选的不是一件事，而是个性，答案也维持上段的真挚和坦荡荡：“我觉得以前系令到好多人唔开心，都牵涉到工作，我个人系去得太尽嘅好多嘢，会伤害到人，我会想改变就系我伤害到人而自己觉得冇问题𠮶个性格啰，呢样嘢好多人同我共事系好辛苦，我系可以追住𠮶个人嚟闹，爆晒粗，90几只字嘅粗口，我觉得呢样嘢系好衰嘅，真系好唔啱呀！”

他相信因为这种个性，令他损失不少机会，直言：“如果我唔系咁样我应该已经蜚声国际。”虽然曾励珍（珍姐）和很多伯乐都一直给他机会，不过浩然相信：“我觉得好多人同我合作过一次之后就会却步，就会觉得呢条友好麻烦、搞唔掂。算啦！咁多人拣，做咩拣佢啫？”就连准备跟陈恩硕（Tom）合作《三．八》音乐剧时，郑丹瑞（旦哥）都特地温馨提醒Tom：“喂，唔得㗎㖞依条友！”浩然透露，旦哥曾跟自己说：“虽然我唔识你，但系我都听过你唔少麻烦嘢嘅。”故一直对他有保留；虽然合作过后就知道今时今日的浩然已非昔日般难相处，但亦使他深深明白到自己臭名远播：“原来就算冇合作嘅人，都知你啲嘢。”

现在的浩然已经改过，除了因为太太时常提醒外，亦与他接触的佛教有关：“人就系咁，有一刻，叮！咁咪叮啰，呢几年我都接触咗佛教多咗，做好多关于佛教嘅嘢，我相信任何宗教，佛教有天主教好基督教有好，但系话你点样去做一个好人，点样做一个好人，系从呢个方向去谂，咁就跟住呢条路去行啰。”他对昔日的行为深感内疚和懊悔，问到有什么想跟那些曾被言语伤害的人说，他表示：“梗系对唔住啦，我都讲过好多次，话同以前令到佢哋难受嘅人啦，‘对唔住啰，我都知衰㗎喇，我依家唔会㗎喇，你可以揾吓我嘅！’但系又好好㖞讲真，有啲我以前曾经对佢态度唔好嘅人，依家见到面，大家都仲有倾偈㖞，唔系当我仇人嘅，呢样嘢系我好感恩嘅，大家都唔会话见到我掉头走。”

回顾这一段历史，浩然认为未必负面：“自己嘅行为，咁当然，为自己负责任，你系咁样，𠮶个系你嘅经历啰，亦都系你成长嘅一啲点滴，又唔系话一定Negative嘅，咁我亦都更珍惜而家嘅嘢啰。”虽然时光不能倒流，从前做过的事不能逆转，但万幸的是，每一秒钟都可以重新开始、挥别过去，成为你想成为的人。