早前施明离世，李泳豪李泳汉兄弟反目、李家鼎公开家丑的风波，却意外地令李泳豪前女友杨思琦“被平反”，从分手后被闹足十多年，到如今网民去她的社交平台留言区集体认错，发展极度戏剧性！早前杨思琦受访时，表示担心鼎爷身体，回应李家事件时表现获网民赞大方，近日她出席伍咏薇（伍姑娘）及李凯贤（Brian）主持的HOY《九运会客室》节目受访，谈到李家事件及坦承当年后悔太诚实公开恋情，更罕有地谈及女儿生父吴帅，坦言：“你本应想系走到去结婚嘅阶段，但系唔能够，你估玩咩？无啦啦生个女，梗系想有好结果！”

思琦后悔太诚实认恋李泳豪：我𠮶时真系好蠢

当伍姑娘开始追问恋情时，突然口误说：“你同泳汉拍拖……”思琦随即耍手：“我唔系同泳汉拍拖呀！”结果二人爆笑，伍姑娘笑指：“捞乱，对唔住！（思琦：你搞清楚未呀？）”到正式入正题，思琦说事情已过去十多年，没必要回望，讲到当时公开恋情，她直认太蠢太诚实：“开头做freshman、新人，咁我真系拍拖，啲记者问你‘杨思琦，你系咪拍紧拖？’咁我咪话系啰，我拍紧拖……实则我拍紧剧个剧组100对couples都拍紧拖，但佢哋冇人走上嚟认㖞，我𠮶时真系好蠢，我做乜认呢？我应该唔好认呀，我而家大个，𠮶时如果俾我选择，我唔鬼认，咁而家你哋咪唔知道我拍咗拖啰！”她坦言公司事后有下旨叫她“收埋”，她心谂：“咁我都认咗，点收埋？”但她自问努力工作、睇工作比恋情还重要，可惜常被外间以为恋爱脑。

感动获网民平反　自言问心无愧：我不嬲都闹衰晒，闹成世

对于被指拜金，思琦以四字“百辞莫辩”回应，她重申：“我唔系咁嘅人，如果真系要揾个有钱嘅，我出嚟都会有人介绍，我街都唔出。有人话‘𠮶个又好好，好富有！’‘𪠳？关我咩事呀？’”她承认与李泳豪拍拖时有人追求，但并冇心动。对于近日被网民平反，思琦直言从没谂过：“分开咗有十几年，𠮶件事到而家……但系我真系冇谂过，譬如我直播，网民走入嚟话‘我好支持你，加油！’或者我有啲视频佢哋留言，好正面咁样鼓励我，我不嬲都闹衰晒，闹成世⋯⋯成日都话我衰，都冇人赞我好嘅，所以好感动！同埋我问心无愧！最近突然间好多noise系走嚟系支持我，我就感恩啰，但系我好多谢各界好多唔同嘅朋友，唔识嘅影迷、fans，呢样嘢我好开心。”对于有没有关心鼎爷，思琦就表示没有直接联络对方问候：“希望佢多啲好好咁样照顾自己，休息多啲，唔好咁操劳，我哋后辈只能问候。”

罕谈吴帅　称原本想结婚：无啦啦生个女，梗系想有好结果！

杨思琦当年突然生女，伍姑娘问她“点解咁冲动？”她回答：“唔系冲动嘅，其实，即系已经（同李泳豪）唔系一齐嘅时候，咁啱啱展开咗，而呢个（吴帅）系我以前认识嘅，而唔系话你识咗十日就走去结婚𠮶啲。”伍姑娘追问关系维持了多久，思琦表示：“我谂……你真系考我，我点答你呀？维持咗几耐……以前已经系认识，未同豪仔拍拖，已经系认识，唔系话你分手，之后先突然间认识咗新嘅一个。”她续说：“但系冇谂过原来系唔可以喺埋一齐，你以前认识咗，你本应想系走到去结婚嘅阶段，但系唔能够，你估玩咩？无啦啦生个女，梗系想有好结果！大家都有个共识，但系发现有啲嘢真系唔OK，未必接受得到，成世㗎㖞，咁你觉得唔OK，就算我有个女，咁我唔好意思，我真系唔可以一齐，但系我呢一个（小朋友）我都会keep住啰，因为系上天俾我嘅礼物嚟㗎嘛。但系当时好多人唔理解，觉得我唔知点，讲到我……仲多负面嘢，咁咪生咗个女啰，然后好爱佢，又好开心，自己照顾佢，又做工作啰。”而最后，讲到思琦现时的老公收得好埋，思琦说：“系，收得好埋，我唔敢讲，我唔敢再讲，唔好再问我！你知啦，踩蕉皮踩得多。”但她表示老公很疼锡她与前任所生的女儿Krystal。