吕颂贤（Jacky）近年主力在内地发展，最近更荣升监制转攻幕后，日前他回港接受了《娱乐头条》主播Angela俞咏文的专访并分享近况。吕颂贤坦然现在生活仍然非常忙碌：“其实我仲有好多嘢做，嚟紧将会做一个内地短剧嘅监制，我都系第一次做监制，我想做幕后好多年㗎喇！因为拍剧我觉得好辛苦，点知做完监制之后，先至发觉原来做演员先至系最幸福！因为做幕后要兼顾好多嘢，讲真我都想返嚟香港工作，希望有人请啦! 哈哈哈! ”

吕颂贤谈早年肺部感染昏迷十四天

讲到早年曾因肺部感染于ICU昏迷十四天，吕颂贤反而最担心太太：“因为佢形容当时冲入医院就好似睇剧咁！啲人走嚟走去，拉晒帘，插晒喉！我就摊喺𠮶度！当时我医生仲话未度过危险期，你话系咪吓死佢呀! 虽然经历过死过翻生，但系面对生死，都冇乜唔同，如果醒唔返嘅话咪冇嘢啰! 都系咁啦！”

吕颂贤自爆曾抗拒提起令狐冲

于吕颂贤的演艺生涯中，都有很多重要的角色，最重要嘅当然是令狐冲！Jacky笑言曾经抗拒经常提起令狐冲：“如果冇咗令狐冲，可能大家都唔知道边个系吕颂贤，不过我以前啱啱北上发展嘅时候，我系好抗拒令狐冲，我觉得都过咗去啰！做乜成日提啫？！最唔钟意嘅成日同人哋比啰！到有一日真系嫌烦啦!我就话，系呀!我就系令狐冲！啲人反而好开心㖞! 咁算啦!你话系就系啦! ”

吕颂贤被称“港版木村拓哉”

另外，吕颂贤被称为“港版木村拓哉”，他就表示不好意思：“边度似啫？人哋咁型我边会似呀？其实都唔知系咪当年传媒制造出嚟！最记得开头时系木村拍紧《悠长假期》最hit嘅时间，我当时喺化妆间，众所周知郑裕玲好钟意木村拓哉，突然间化妆姐姐就话木村拓哉嚟喇! Do姐即刻话边个？边个似木村？吓到我呀！跟住佢问系咪我？我话唔系我唔系我！哈哈哈！”而近年亦有人说吕颂贤和吕爵安很相似，Jacky笑言有机会的话，亦不介意“父子档”上阵。