杨思琦近日出席伍咏薇（伍姑娘）及李凯贤（Brian）主持的《九运会客室》节目受访，思琦和伍姑娘在TVB时已多次合作，今次在节目上重逢，伍姑娘一坐低已连环爆料，讲到思琦当年在拍剧时被集体欺凌，而思琦回想起当时，都不禁在节目上落泪！

伍咏薇爆杨思琦被欺负：一群人恰佢

伍姑娘说当时是拍时装剧，自己是主角，该剧是“双生双旦”，她说：“入面好多前辈，亦都好多同辈，可以话系双生双旦。讲真，呢套剧我本人都唔开心，我好少拍剧唔开心。佢同我有好多戏份，佢当时呢套电视剧系比一围人恰佢、一群人恰佢，佢唔觉嘅。佢系very好勤力、好乖嘅女仔，佢发生事件应该开咗工冇几耐，已经发觉有人对佢……㗎啦，挂住对剧本，冇乜点理佢。”

杨思琦被前辈大闹遮灯光哑忍多时　终爆喊冲出厂

伍姑娘指，人是物以类聚，当其他人见到思琦被虾，都会虾埋一份及附和，她亦觉得思琦好“黑仔”，并把所有委屈吞下去。她忆述最难忘一次是夜晚12点几，准备拍完就放宵夜：“场戏就讲成班人齐人嘅，恰佢𠮶班人啦，齐晒人嘅，全部主角齐晒！临时演员都有嘅，特约都有嘅，讲紧成个conference room出到嚟开门，就企出嚟，个位好窄，大家排排排，打灯啲Camera man排晒喺度好迫，佢（思琦）就已经觉得好辛苦，成日俾人虾，突然间有一位前辈就话‘𠮶啲唔知咩人嚟㗎！捞咗咁多年，啲灯又遮住我块面，都唔知点㗎！”佢都惯咗，又濑嘢（杨思琦：我都惯咗㗎喇。）又到时辰，其实啲导演、个个都知，剥花生𠮶啲人，𠮶个导演好好，个导演都知，当日个女导演就话‘唔系唔系，其实冇乜问题嘅，可以再郁嘅。’已经想息事宁人，大家都明白做好件事。”

冲出厂爆喊后　遭同剧演员连环落井下石：全部都系PK

然后事件被推至高峰，思琦听到对方“对空气喊话”，已又闪又避，但对方都说：“唉！又遮住！”不过现场冇其他人出声，伍咏薇就帮口，她说：“我话‘不如咁啦，等导演排好啲啲嘢先啦，导演你话喇！’最好就咁㗎啦，导演排好，都系闹，好多声音，好似老鼠声咁嘈。”此时思琦突然大叫了一句，然后就爆喊，令伍姑娘都愕然，“𠮶啲人话‘哗哗哗！做乜嘢？’‘系啦，又唔知做乜嘢，喊啦，你喊啦！’有啲人又话‘唔知做咩，玩咋嘛，话错你咩？’”伍姑娘说前辈、后辈全部都丧闹杨思琦：“全部都系PK！闹到佢X街！”思琦当时冲出化妆间喊，伍姑娘说厂内有人说：“出去喊，咪就系等监制落嚟𠮶啲人啰！”思琦原来到2026年的今天才知道这件事，她委屈说：“我都冇监制电话，我点打俾佢？”之后监制下来，想息事宁人，后来见思琦喊到双眼红肿，监制便提议先放宵夜。

核心前辈袖手旁观突然开声　原来是赶收工

思琦继续追问当时情况：“监制有冇误会我呢？会唔会觉得系我问题？”伍姑娘：“监制同佢哋好熟，所以⋯⋯（咁都冇办法）但系监制系好人嚟嘅。（好人唔识得分是非嘅？）个高潮位就系，你出咗去之后，有个人就话，‘哎呀，你哋真系嘈！’我心谂好吖，终于有前辈出嚟讲句说话，我等听，佢话‘你唔好搞咁多事啦！我赶住时间收工㗎！’唔怪得之成件事冇出声，原来赶住收工，你作为最重心嘅核心人物，你系咪喺件事核心里面， Team work里面，你应该主持公道或者唔出声呢？”思琦闻言表示：“哦，原来系佢自己，唔系帮我。”

伍姑娘爆结局时思琦再被当透明

而思琦在节目上亦忍不住落泪，她坦言自己本来已没有记住这些事，但因为伍姑娘实在扮得太神似，她才一下子记起那些人的嘴脸，不禁悲从中来。伍姑娘还说，拍到大结局一集，那位欺凌者自己整了甜品去现场派畀大家食，跟众人说：“请你食吖！”唯独去到杨思琦面前却拧歪面，其他人又立即附和：“系啰，做乜请佢食？”令伍姑娘觉得相当幼稚，当思琦说“伍姑娘，我真系好感动。从来，系你第一个而家帮我将我平反嘅！”伍姑娘强调自己所讲的句句属实：“我发誓如果我讲大话俾雷劈死！”

.

涉事剧疑为《翻叮一族》

节目在网上引起热议，有人就认为涉事的剧集为2010年的《翻叮一族》，主要演员包括夏雨、许绍雄、商天娥、伍咏薇、陈键锋、敖嘉年、杨思琦及唐诗咏。此外，Brian有问两位，该名欺凌的前辈还是否在这一行，她们表示：“唔清楚，唔知情，不过应该唔喺香港。”