ERROR成员郭嘉骏（193）月前因不满澳门跨年倒数骚没有Solo表演，事后在社交平台公开点名投诉监制，疑因此惹怒公司高层，将他“雪藏”了。事隔4个月，193日前（17日）以睡衣造型进驻尖沙嘴某商场一个户外玻璃柜内倒数74小时，至今天（20日）下午2时届满，宣布正式复工，新歌《呆等》MV同时首播。193表示这次的举动算是行为艺术，自觉是一个好奇怪的人，做了这个呆等waiting room在入面做些平日于家中会做的事。他说：“之前公司叫我返出嚟，我话唔好，想延迟啲我未放够假，未ready，有8年无试过好好休息。”

即场感动至眼红红

问到今日重新出发有什么感受，193说：“情绪波动emotional，出嚟时有少少手震，见到主持好感动，识咗8年回忆返晒嚟，搞到我眼红红。（融雪走出雪柜？）呢个唔系一个雪柜，唔系融雪，踏出嚟一步呼吸到新鲜空气。㖊晚无紧张，喺度edit啲reel，我啲朋友当公厕话嚟就嚟，好多ig片要剪。”

他又答谢粉丝的支持，自己重看以前error的片也很emo：“原来咁辛苦一步一步挨过嚟，挨到头发都少咗，发线高咗2mm。（你MV入面封手写信会唔会畀粉丝睇？）封信唔见咗，我喊到湿晒。”提到新歌《呆等》，193说：“好快就有呢首歌，Wyman觉得呢首歌几好，应该会中，叫我最好状态先出。自己唱歌以前为咗应付工作，依家系真系钟意，会去钻研，有keep住学唱歌。（嚟紧有咩工作大计？）会拍返节目，公司有揾我倾，新年时已有磋商，问我想点样。放长假令我感受到退休生活，好正，想休息多阵先。放假可以放纵食嘢一日食九餐，过咗90kg，依家减紧肥，想去返全民造星状态70kg左右。”

不敢再公开闹高层

问到193经历过今次教训，还敢不敢闹监制闹高层？他说：“监制够胆闹嘅，呀，唔系唔系，高层就唔会，一定系私底下闹，唔会公开闹，边个打工仔会公开闹老板㗎，系我冲动啫，𠮶刻真系冲动嘅。啲网民闹我擦鞋仔时我会闹返佢哋话你傻㗎，系人都擦鞋㗎啦，唔系好似你咁净系识网上打字，但系我竟然犯咗同样嘅错误，我竟然闹我公司高层，仲要系公开闹，咁我就觉得今次真系好冲动，纯粹系好冲动，其实好快就无嘢，我好快就同公司高层“耍冧”又和好，佢都有体谅我知我冲动。经一事蔡一智，所以都反思咗好多，呢几个月个人慢落嚟之后，好平静，平静到系想剃头出一出家咁。我有向公司争取自己想要嘅嘢，但系争取唔系迫，系要双方同意，大家合作要有共识先得。休息呢几个月学识要商量磋商，慢慢等啲嘢发生，要酝酿，唔可以咁急。我以前系个好急嘅人，真系确实过ADHD，只不过系无食药，我食药会晕，靠自己控制。我睇咗好多心理学嘅书，改变唔到世界只可以改变自己谂法，专注自己课题。我已经delete咗threads。网民话娱乐圈几大恶人我系几中一个，唔知点解。”193又好多谢队友对他的支持，特别是阿Dee。他又指新助手其实是他朋友的朋友，要签对方并提名对方参加《全民造星》。