朱敏瀚昨日（21日）现身《飞常日志II》宣传活动，讲到他在剧中饰演的飞机师Captain K很有型，他说因为是“制服诱惑”，相信每个人著起机师衫都会有加乘。他十分感谢这套剧，因为儿时睇《冲上云霄》已经好渴望做飞机师，视之为一个目标，故能够梦想成真，再加上能成为香港国际航空学院代言，他都十分开心。讲到戏中角色好恶、好Cool，他笑言：“系，角色性格嚟嘅，完全唔系朱敏瀚，我谂呢一个角色呢，我谂系得好少系朱敏瀚嘅影子，因为我平时都应该唔系咁嘅，冇咁唔平易近人！”问到是否需要扮Cool，他表示都是照对白讲，“今次嘅对白都写得几充足嘅，我其实跟住对白去讲都已经有𠮶件事喺度，咁严厉啲呢，系公司、监制、导演要求，佢希望我喺尤其是教书嘅一面嘅时候，要保持严肃，Captain K其实对住戴祖仪、郭柏妍就轻松好多嘅，对住同辈， 或者对住Tiff（刘颖旋）、周嘉洛佢哋就轻松好多，但系对住学生，就要有𠮶一面。”

朱敏瀚为新剧晒灯变黑 自爆今年状能Fit爆随时除衫

近日朱敏瀚在社交平台分享自己去晒灯，他透露因为正开新剧，今次角色需要皮肤黑，但他本身很易白，所以要keep住晒。问到今个夏天是否会以新形象示人，他表示：“系嘅，因为又漂咗个头呀，同埋因为年头呢，我同班好朋友去参加Hyrox，所以今年个状态好猛烈呀！我认为我而家个状态系我近几年最好，我开紧剧，随时除衫都ready，系呀！”记者笑说难怪开始访问前，戴祖仪路过都要摸他的胸肌，他说：“佢咩人都摸㗎啦！”又解释指以前要拍除衫戏的话，前两日已经会好著紧及戒口。但现在已经在状态内。

陈滢与AI写剧本 为JW生日会悉心安排剧本杀

近日是好友JW（王灏儿）生日，陈滢发起搞剧本杀活动，朱敏瀚、周嘉洛、罗天宇、陈懿德等都有参与，他透露因为JW一向爱玩桌上游戏及狼人杀，于是陈滢很有心，与AI一齐创作剧本，还准备好道具。从片中所见，陈滢甚至玩到趴地，令人猜测她是否饮醉，朱敏瀚说：“因为陈滢系个搞手，所以佢就系最快死嘅死者，佢就系用佢嘅死去推动个故事，睇下在场边个系个凶手。（记者：有网民以为醉。）唔系唔系，只不过佢演绎有啲夸张啫。”

JW哑忍两年终平反拜金指控 朱敏瀚力撑为自己发声

JW这阵子因宣传新歌接受多个访问，期间谈到与前男友分手后硬食“拜金”指控两年，但真相其实是对方背叛她，问朱敏瀚是否知道当初JW独自承受这些标签以及分手真相，他回应：“咁细节当然唔会比佢本人清楚，但系我哋由拍《痞子》嘅时候我哋几个都好好朋友，互相支持，不论系工作，基本上大家都有咩都倾，咁我而家都见到佢，佢重新出返嚟做好多歌我都替佢好开心，尤其佢而家首新歌我都觉得好好听，佢再私底下……呢两年，因为佢离开TVB，我哋见面嘅机会系少咗，但系我哋友谊不变，但系佢嘅私事我而家就唔清楚。”

问到见JW终于还自己清白，会否替她开心，朱敏瀚就指一班朋友其实从来都很相信JW为人：“我哋咁多个朋友认识嘅JW系好好嘅，绝对唔系可能大家写到系点样，所以我哋对佢嘅本人由头到尾都冇改变过，我哋对佢都有绝对嘅信心，同埋知道佢个人系非常之好，绝对唔系咁样，所以如果我而家系平反咗，咁我觉得系好事。”JW在访问中透露过，原本打算不再提，以为事情会慢慢丢淡，谁知两年后仍是无法撇走外间的标签，于是她决定要为自己发声，讲出分手真相，问朱敏瀚是否都很支持对方为自己发声的做法，他分享：“我觉得‘唔讲就冇人提’呢样嘢，我以前都有经历过，因为我尤其是做Gym，以前你做运动，我觉得系要话畀人听。你做紧运动，你要话畀人听，我Post我晒灯，所以你知道我晒灯，你会知道我去做Gym，所以当我做呢啲嘢，我真系做啦，我唔系净系Post，然后话畀人听，可能作为我哋呢一行系需要，反而就唔好将所有嘢收收埋埋，可能以前我哋都会照用作品说话，但系而家我哋大家好多嘢睇，咁就未必个个都留意到你，咁可能如果你出嚟话畀人听我做紧呢样嘢，咁大家就会再清晰啲。”