前无线艺人张韦怡（Gogo）近年转型直播带货及卖水晶，近日她更推出首本著作《GoGoGoal水晶能量转运术》，前日（19日）于书展举行讲座，期间分享到自己因与姑仔打官司陷入低潮、严重抑郁以至流产等悲痛遭遇，以及如何靠水晶走出低谷等等。她接受《01娱乐》访问时，坦言对官司胜诉不感到快乐，因为小生命已流失，并亲述血淋淋的流产经历，指自己休克昏迷10分钟，甚至首度经历死亡，一度去到一个“睇唔到自己”的地方，医生指她险些便脑干死亡，故此她直言不敢再生：“我小朋友都喺现场，所以对成家人系一个永不磨灭嘅一个阴影。”

书展出水晶工具书 经历创伤悟出自己是最大贵人

Gogo在书展举行讲座，有不少平日睇开直播的粉丝亲身到场，向她索签名、合照等等，她指出书是知道很多客人未必记得每一款水晶功效，于是干脆出工具书帮他们温故知新，让他们帮自己或家人做能量提升，否则社会充斥太多负能量也会带来很多问题。她指这本书已用了一年筹备，当亲手将实体书捧上手时，的确有生BB的感觉：“之前有流产嘅经验，所以好想藉住呢本书同好多女性或者弱势社群嘅人讲，遇到乜嘢艰难嘅地方等等所有嘢，其实自己永远系自己最大嘅贵人，就算经历咗乜嘢都好，可以藉住自己嘅力量，令到自己重新再活一次。”

与姑仔对簿公堂爆严重抑郁 靠拉长石逆转失眠

Gogo与其“姑仔”潘碧玉早前对簿公堂，互相指控，对方亦对她诽谤，使她于过程中激动流产，最终法官裁定姑仔须赔偿张韦怡逾312万港元及利息，以弥补其身心煎熬及创伤，并驳回姑仔的反申索。她在讲座上谈到自己在官司期间吃不下咽又失眠，最终因水晶而疗愈，自此便迷上：“我自己系严重抑郁，生活都成问题，个手控制唔到系咁震，食嘢都会震，其实都冇乜胃口食嘢，亦都系瞓觉瞓得好差，每日得两、三个钟会瞓得着，持续差唔多个几两个礼拜，一路食药都唔得，自己有一刻谂通咗，我唔可以再咁样落去。有朋友掹我出嚟，话见吓人，咁我见人嘅情况下，佢就俾咗嚿石头我，其实系一个拉长石，闪闪发光我觉得好靓，但系一戴喺手度，佢同我产生咗连结，好刺痛，刺咗落我个心里面，但系亦都好温暖。当晚我就攞咗个石头，瞓咗十几二十个钟，就系咁样，所以我就迷上咗水晶呢一样嘢。”

官司厮杀见尽人性丑恶 获赔312万难补心灵创伤

早前Gogo在IG发表胜诉宣言，但坦言对此不感到开心，她在访问中再阐述：“喺法律层面，无论胜诉或者败诉一方，喺法庭上面嘅厮杀，同埋见证好多人性嘅丑陋，喺呢个过程入面，只可以讲个天畀好多人经历。我都非常之相信因果，因为我系非常之虔诚嘅佛教徒，喺呢个过程入面，我觉得冇话开心唔开心，因为胜诉当然系畀自己一个交代，畀父母一个交代，冇做过就系冇做过，所以真的假不了，假的真不了！但系喺厮杀过程入面，双方嘅心灵，同埋我二、三、四、五、六次嘅伤害，旧事重提嘅伤害，同埋小生命嘅流失，无论几大赔偿都系弥补唔到。”她希望大家不要内耗，因为自己当初就是过度悲伤导致流产，绝对深深感受到内耗冇益。

血淋淋流产经历全家蒙阴影 休克10分钟见白光险脑干死亡

问到会否对生BB有阴影，Gogo不讳言：“有阴影嘅，唯一嘅阴影就系唔敢再生。”她曾跟老公商量过是否要“追多个”，但由于流产带来阴影，加上年纪渐大，目前正考虑代母方向，幸好老公都十分理解。她续说：“佢明嘅，因为当时流产嘅过程都几血腥，同埋我小朋友都喺现场，所以对成家人系一个永不磨灭嘅一个阴影。系有啲好恐怖嘅画面，血肉模糊、自己亲手将血块残碎嘅部份掹出嚟……我自己都好惊血㗎其实，我都有一个昏迷嘅时间，当时好似去到上到白车嘅情况下，好似系⋯医疗报告话有10分钟系休克嘅状态，真系痛不欲生喺呢个过程入面！我老公都系有好大阴影，小朋友都有好大阴影，当时我个仔都话以为冇咗妈妈，因为嗌唔返我，喺呢个过程入面我已经去咗第二个空间，同埋我第一次经历死亡，叫天不应，叫地不闻嘅情况下，就听到我个仔嗌我嘅声，‘妈妈、妈妈’咁样，我就去咗一个擘大眼好光嘅地方，我有意识睇自己只手同只脚，但系睇唔到自己，成个身体睇唔到自己，但系去咗一个有光芒嘅地方，但系就系听到我个仔系咁嗌‘妈妈、妈妈’，我醒返已经系俾人倒吊咗喺白车入面，佢就话好彩你醒返，因为当时血压跌到六十几，佢哋话我休克咗大概10分钟。我当时同老公佢哋已经搬咗出去，喺酒店流产，系突发性嘅剧痛，醒返嘅时候已经喺白车度，佢哋话我争少少就会脑干死亡。”

避开再与姑仔见面 拒绝和解只盼早日中断关系

Gogo补充，当时儿子都见到血淋淋的画面，故绝对是一家人的阴影，因此她觉得自己赢了官司也不代表什么，只好尽快向前走：“人哋虾完你，如果你再喺漩涡里面纠缠嘅话，永远受伤害都系自己，只有快啲跳出嚟，交俾专业团队或者法律去处理咗其他嘢嘅话，就真系会同𠮶个人停止任何嘅量子纠缠。”她感谢老公不论在创业及家庭纠纷都很支持自己，站在道理一方，问到将来过时过节若于家庭聚会见到姑仔会否很尴尬，她直言：“我谂所有嘢都系避开，避开任何冲突等等所有嘢，其实人大个咗，每个家庭都系自己一个unit，冇话咩大家庭乜嘢，大家就系见面都唔会讲嘢或者点样，就处理咗佢。”Gogo认为与对方没有和解需要，并表示：“我只希望快啲极速地去中断呢啲所有关系与纠缠。”

公司被盗用商标及直播片诈骗 但仍觉做生意满足感大于艺人

此外，张韦怡的公司日前透过律师行发出严正声明，指有人盗用其商标及影片作冒充及非法用途，有不良商家疑似诈骗，并已有人受害，张韦怡的公司已派代表报案。她在访问中再透露：“希望香港政府亦都要保护好我哋一啲良好嘅商家，因为喺做生意过程入面都唔容易，当我哋客人越来越多嘅情况下，好多人会冒充或者偷咗我嘅相，或者偷咗我嘅影片去做一啲非法嘅行为，做一啲兜售假货嘅行为。”她指有人盗用她的直播短片卖货，结果苦主收货后发觉货不对办：“佢哋竟然盗用埋我哋公司嘅logo所有嘢去扮我哋，我哋再追溯𠮶啲网址、所有网站，佢哋会选用到付方式，因为唔留痕迹。”不过撇除这一切，她仍觉得做生意比做艺人满足感大得到，“一定一定！做艺人其实系好被动㗎，同埋我个人就唔系好钟意主动Social𠮶种，你知以前TVB好兴敲监制房门，我系从来冇敲过，冇咗就由佢，我系比较佛系嘅一个心态。但系自己做生意嘅话，每一日都有好多决定，要面对好多唔同嘅嘢要处理，喺呢个处理过程入面，会有高高低低，但系关关难过关关过。”