现年94岁的艺人胡枫（修哥）一向老当益壮，早前更开演唱会，成为“举办演唱会最年长的华语艺人”。不过他早前身体不适，家人对外透露中了新冠肺炎，而今日（30日）他在社交网与新抱Jojo拍片，新抱指胡枫其实是胆管炎，但当时为免修哥被骚扰，故未有告知确实情况。她指修哥入了ICU，足足昏迷四日，当时更因呼吸不顺畅要插喉；而修哥就亲自交代情况，他说自己醒来时惊见自己被五花大绑，因为怕他抓到伤口，修哥多番感谢医护人员，又表示：“我喺睡梦中嘅时候我就同自己讲一定要对所有好朋友、屋企人，见返一面，所以我而家做得到，我会多啲同大家倾偈、同大家见面㗎！”

新抱说：“早前爸爸唔舒服，我哋只系同人哋讲爸爸中咗新冠，同埋因为流感高峰期我哋唔俾佢出街，咁其实佢系好危急嘅胆管炎，佢系入咗伊利沙伯医院嘅ICU嘅。头尾都昏迷咗四日，因为要插喉，佢当时嘅呼吸系好唔OK嘅，医护人员话要插喉先至可以帮到佢，所以我哋就因为太担心，亦都唔想大家知嘅时候，惊有记者去医院度骚扰到医护人员，亦都骚扰到佢。”

之后修哥与医生对话，医生说他在鬼门关打了转，修哥坦言：“好恐怖！”医生解释他患胆管炎的原因，透露今次除了通胆管，也帮他做手术切除胆囊，免得第二次发作。修哥感谢医生，而医生就说：“你大命！喺天堂打咗个转，上天话你唔好咁快嚟享福，香港好多市民都挂住你，你迟啲先上嚟享福，所以先救返你，都系你自己嘅福气啦。”

修哥之后还原自己昏迷后的情况，所幸他看来颇为精神，且面带笑容，他说：“当我擘大眼嘅时候，觉得呢度好陌生，有个医护人员就问我‘你叫咩名呀？’我答中咗，佢非常之开心，虽然醒咗，但系非常非常之辛苦，可以讲五花大绑绑住我只手，唔俾我𢯎到个面，又唔可以掂到心口，惊我掂到啲喉就唔系咁好，所以一直落嚟系好辛苦。虽然系辛苦，但系医护人员非常之照顾我，据我所知，伊利沙伯医院嘅杏林高手，对我非常之好，好悉心调理，我最记得有一次我喺睡梦中，摸到一双手，我话医生，你只手点解咁冻，医生就话：‘系呀，我啱啱洗咗手！’虽然我摸到佢只手好冻，我感受到佢内心嘅热情，对我非常之好。”

修哥续说：“喺我睡梦中，不断不断记起我屋企人，我啲仔女，新抱、同埋弟弟妹妹，仲有所有所有嘅朋友，我都想见返，所以每一段都有我啲朋友出现，有我啲契仔契女出现，每一段都有我嘅屋企人关心我嘅片段仲有一样，令到我非常之积极嘅，就系谂起有好多网友鼓励我，平时鼓励我身体健康，样样都要积极，所以我呢段时间都有谂起佢哋，我更加多谢QE（伊利沙伯医院） ICU𠮶啲杏林高手，调理我嘅身体，多谢医护人员对我好好，我喺度感激感激！仲有另外一个就系浸会𠮶啲姑娘个个对我非常之好，非常非常之友善，我亦都多谢佢哋，我喺睡梦中嘅时候我就同自己讲一定要对所有好朋友、屋企人，见返一面，所以我而家做得到，我会多啲同大家倾偈、同大家见面㗎！”他又说很想见契仔契女，所以自己一直都积极人生，顺道多谢这么多年来担任自己演唱会的朋友。