梅艳芳的102岁母亲梅覃美金（梅妈）前日（30日）离世，但就住丧礼后事安排就爆出两个版本，先是梅启明在医院外表明将一力承担梅妈丧礼，会动用梅艳芳信托基金为梅妈风光大葬。不过其后梅妈生前好友潘小文就向《01娱乐》表示，梅妈已立遗嘱，丧礼将按照梅妈意愿交由孙儿低调处理，其后再透露遗嘱执行人身份，正是梅启明细佬梅德明的儿子，换言之是被梅启明多次公开闹爆的姪仔。而梅启明对此事也有所回应，先是多番叫潘小文“食大大笃屎”，指她“凭咩讲呢啲嘢”，又向《01娱乐》表示叫姪仔拎遗嘱去他面前讲：“佢边度够胆拎俾我呀？我写包单佢100个唔够胆！”
此外，梅启明原定昨早去跑马地警署领取梅妈的身份证，不过最终失败，他指是因为身份证在夹万内无法开启，将透过法律程序处理，更预告丧事随时搞唔到住：“一有咗法律程序乜都要停喺度。”

赴警署领取梅妈身份证受阻 直言入法律程序后手续将暂停

梅启明昨日一大早去跑马地警署欲领取梅妈身份证，用以办理死亡证等手续，问到接下来程序，梅启明变得不欲多谈，透露：“（身份证）𠮶啲喺夹万，冇人可以攞到，要经过司法程序，所以唔透露。第二，任何一个人去攞都要等到开庭，我依家要揾律师处理。警察部叫我揾律师处理，好多嘢唔方便透露。”问冇身份证是否代表余下手续都未能完成，他说：“要经过法庭，入咗法律程序就所有嘢冇得郁，明解冇？（所以潘小文同姪仔有冇身份证都郁唔到？）就算攞咗身份证乜证都好，一有咗法律程序，乜嘢都系，等于要停喺度，一定要经过法庭。”现时双方各执一词，他日前他在医院外受访，记者已问到若无法与姪仔就丧礼取得共识，最后可能会变成“各有各搞”闹双胞，他当时回应：“如果佢真系对阿妈好，唔使佢今日咁样走，呢个就系共识，有商有量。老人家走咗你而家嚟共咩识？唔识讲呀真系。”

大律师指遗嘱执行人若成年 梅启明则无权主理梅妈丧事

就住潘小文早前的说法，《01娱乐》向梅启明查询，而他表示：“唔需要理会佢， 孙就系孙，仔就系仔，再加上佢系冇权去处理任何嘢，佢话有遗嘱，冇用嘅，我会处理。”被问会否担心最后要争后事办理权，他重申：“唔紧要㗎，一，佢冇资格同我争，二，喺法律上佢更加冇，如果讲遗嘱我更加要去争取。”更扬言必要时或会向法庭申请禁制令，使得“所有嘢冇得郁”。若遗嘱属实，梅启明能否绕过遗嘱主理丧事呢？《01娱乐》曾访问大律师陆伟雄，他表示：“一般嚟讲，如果𠮶张遗嘱已经列明咗边个系遗产嘅承办人，简单嚟讲，佢就会帮梅妈做埋啲后事。”并补充指唯一不合符情况的条件，是梅妈指任的孙儿未成年，因为在法律上需要成年才可以处理：“如果十零岁，咁你就喺法律上未必适合做遗产嘅承办人，咁有可能就会委托返其他人。”陆大律师更提到，梅启明无权动用信托基金一分一毫。

潘小文证实梅启明姪仔将执行遗嘱 遭开火： 我嗌佢食屎

记者昨日再向潘小文查询遗嘱执行人身份，她回答：“不是梅爱芳的孙，也不是她的儿子。遗嘱执行人系梅德明的儿子，已经四十几岁。”梅德明即梅启明弟弟，换言之其子就是梅启明姪仔。梅启明回应《01娱乐》时再隔空对潘小文开火，指她是外人：“你话梅启明嗌你食一笃屎先！一笃唔够两笃，两笃唔够食够大大笃你先再同我讲嘢，喺度乱噏嘢乱作嘢，同埋佢凭乜嘢讲呢啲嘢做呢啲嘢？佢一个外人，同你哋一样，凭啲咩呢？𠮶日医院我已经闹咗佢，我话‘你边位呀？’姑娘掟咗佢出去，我讲嘅系事实，我唔会歪曲，我话你边位，你哋个个咁惊佢？呢个潘小文你乜水？边位？仲有，你要闹嘅就同我加一句‘我嗌佢食屎！食大大笃，一督唔够就大大笃！’”

质疑潘小文外人身份 断言姪仔不敢拿遗嘱对质

讲到潘小文谈及梅妈于遗嘱表达了意愿，他质疑：“你凭咩做呢啲嘢讲呢啲嘢，你边位？你又唔系律师？”当记者提到遗嘱承办人是梅妈孙儿，他则谓：“佢执行关你叉事咩？你同我交叉佢，交叉交叉交叉，叉到佢够为止！第一你有咩要讲要剩，你就叫佢揾梅启明，梅启明等紧你！如果你唔能够做到呢样嘢，你冚嘭唥就系Bull Sxxt！（即系你叫佢拎份遗嘱去你面前讲？）就算拎都唔系佢拎啦，系咪呀？（如果姪仔拎呢？）佢边度够胆拎俾我呀？我写包单佢100个唔够胆。”他认为即使这份遗嘱存在都好，姪仔居心也是显而易见，称他禁锢梅妈，令梅妈不能为自己作声：“原装阿梅嘅翻版喺度，好嘅嘢学唔到。”