胡子彤将再代表香港出战今届名古屋亚运，他接受HOY主播王凌燕专访分享特训情况。他说早有这计划：“上年八、九月开始，主要系因为想同队友们经历多一次大赛，但我自己嘅性格系一日未成事都唔会公布，而家就可以大声宣布，我系会出战亚运。”

胡子彤无奈因工作缺席前两届亚运

新戏刚煞科，子彤说很幸运没撞期：“因为对上两届亚运我都有入选，但工作关系去唔到。（新戏都好考体力，有冇帮你保持体能？ ）最紧要系训练咗一个好好嘅意志力，我哋拍10几个钟，训练占几个钟，𠮶几个钟系高强度，所以帮到训练意志力。（呢段时间点训练同平衡工作？ ）一至五我哋有三日训练，老板古天乐开演唱会系星期六日，就冇办法，一定要出席老板演唱会。澳门演唱会嘅上昼，我喺中山同队友受训，练完就即刻坐车去澳门做演唱会。唔好彩呢段时间，我哋平时训练嘅场地晒草湾封场，要不断去唔同地方训练，好彩香港而家有一个新嘅室内训练地方，全力支持港队嘅训练。一路想有个属于香港棒球总会，或者港队专用嘅场地，因为我哋嘅场地都隶属康文署，要同其他人分享。”

胡子彤谈运动生涯难忘事

谈到运动员生涯难忘事，子彤就说：“十几二十岁嘅时候，有场比赛因为自己失误令球队输咗，冇咗冠军，𠮶刻真系想放弃，每个运动员都需要经历过失败先会知道要继续付出同努力。”子彤曾表示计划今届亚运后退役，今天提到退役他就说：“我发觉有啲嘢唔好讲到咁死住，因为好挣扎，好钟意呢个运动，但同时工作上，托赖慢慢有啲计划。（会唔会已经唔舍得？）唔舍得同班队友嘅时间，我上年返球场好开心，因为佢哋系由细到大，见过我最唔好同最好嘅时间，𠮶啲系最纯粹嘅感觉。”

胡子彤曾获古天乐点醒

“我觉得工作帮到我喺运动场上嘅表现，因为知道有好多嘢我哋控制唔到，我可以做到嘅，就系眼前嘅工作，而呢样嘢可以带你去到更远。呢个系我几年前同老板食饭，佢同我提过嘅讲法，望远啲，但系唔可以忽略眼前嘅嘢。我𠮶时唔明，望远啲但又唔可以忽略…即系点？但而家开始理解点解佢会咁讲。（你34岁系咪已经超出一般棒球手退役年龄？）都唔系㗎！其实可以打到40岁，所以睇吓自己仲继唔继续坚持落去。”子彤表示希望多些人喜欢或支持香港运动员及棒球，祝愿大家在亚运有好成绩。