谢东闵（Brian）今日（16日）以青年营及交流计划大使身份现身活动，讲到日前因为请陈庭欣食生日饭而传出绯闻，谢东闵就解释只是朋友，指目前以揾钱行先，暂时对拍拖不强求，早年有“一厂黎明”之称的他，巧妙以黎明金句回应：“拍拖就同撞鬼一样，都系讲缘份！”而本身已经是音乐学校老板的他，自爆即将在广州开烧烤餐厅，问到到时是否可以再请陈庭欣食饭，他即笑谓：“梗系唔系啦，梗系佢埋单！”对于陈庭欣早前笑指中秋可以“打友谊波”，他就用女方之前在《东张西望》的口误名句“食灯笼玩月饼”回应：“中秋节不如去食吓灯笼，玩吓月饼好过啦。”而晚上二人合体出席关楚耀新店开幕活动时，就再为绯闻解画。

Brian担任交流计划大使，他指自己是过来人，很支持青少年去外地体验生活，忆述16岁时去外国读书的经验：“我试过home stay住咗喺一个英国家庭半年，我印象最深刻嘅就系我试过喺度住嘅时候，屋租之外，仲要俾三餐我食，食完之后，晚餐系太阳蛋、茄汁豆、沙律，直程系灰啊！但系佢哋觉得好饱，我咁样讲真系衰……但系佢哋体型又可以咁犀利，咁我就真系唔饱，所以𠮶时喺英国嘅时候真系学到一身好厨艺，学识点样蒸嘢、蒸鱼、蒸海鲜、煮蟹、炒饭、炒面，同埋𠮶时同东北人一齐租咗个地方，系咁煮辣嘢，辣到我晕喇！”

他指英国家庭当他是仔一样，因此很温暖，虽然文化上有不适应的地方，例如店舖很早收，但仍然是非常深刻的体验：“点解要推广俾小朋友？因为中学系你人生包袱最轻嘅时候，你系真真正正无忧无虑，其实谂返转头，中学同小学嘅忧虑系多余，所以我觉得如果有机会再做呢件事，一定要好好珍惜，因为你长大咗之后好难再有咁嘅机会，所以就希望鼓励小朋友今次踊跃参与，试吓、体验吓。”

当年练就一身好厨艺，Brian现时仍间中会下厨，更预告即将在广州开餐厅：“关于烧烤，希望生意兴隆！”他透露自己与朋友合伙，但除了打本，一样想入厨房学师，届时要中港两边走：“我谂住开完之后同啲厨师落去学，跟佢学嘢。我觉得有时你做艺人，可能做一个演员，要识得幕后嘅嘢，睇吓人哋啲光点打、啲剪接系点、拍戏做导演情况系点呀，我觉得做一门生意都要学识所有嘢，学识计数，做侍应点做得好，做厨师点样煮嘢煮得叻。”问到为何会忽然想开餐厅，他笑言：“想揾钱啰！因为穷啰！试吓啦，有啲朋友合作就试吓啦。”

早前Brian因为包场请寿星女陈庭欣与现场十多人食饭，出手阔绰因而传出绯闻，他叫大家不用想太多，展现风度说：“朋友啫，大家唔使谂咁多嘅，又唔系好阔绰。现场咁多女仔，冇意思，请吓佢哋食饭啫，冇理由要佢埋单。”至于开餐厅后会否再请陈庭欣食大餐，他笑言：“梗系唔系啦，梗系佢埋单！”两人相识十五、六年，被问有否发展空间，他暂时却以揾钱行先：“唔好话发唔发展空间，识咗十几年，我自己对感情呢样嘢，我真系冇乜点谂咁多嘅呢一刻，我觉得而家暂时离开TVB之后呢，我系比之前更加忙，因为多嘢要顾，以前喺TVB有粮出、有嘢做，你𠮶段时间冇嘢做都有粮出，但系你而家离开咗TVB之后，冇嘢做真系冇粮出，我而家好concern呢样嘢，所以真系要俾心机工作，感情嘢暂时冇乜点谂。”

对于陈庭欣是否他的理想型，他引用黎明金句回应：“我觉得都系黎明先生话斋，拍拖就同撞鬼一样，都系讲缘份！”不过女方日前受访时，就透露自己偏好成熟型，谢东闵似乎都有优势？他却谓：“咁就大镬！我真系好唔成熟㗎！讲笑啫，我自己就真系冇去谂呢样嘢，普通朋友食饭，有时互相埋单，佢生日嘛，互相埋单正常，所以我今次生日都要佢帮我埋单，如果唔系我真系埋佢单！”

Brian坦承与朱智贤分手后都单身，但由于冇工作就手停口停，自己目前无瑕想拍拖：“我而家好冇安全感呀，只系希望能够做好自己每一样嘢，令到自己嘅事业更加成功。（点解冇安全感？）因为而家冇嘢做手停口停，梗系冇安全感，冇安全感就要俾心机令自己有安全感。”不过二人志趣相投，同样热爱Pickleball，陈庭欣日前曾笑说中秋可以约“打友谊波”，Brian更是幽默感十足，引述当年女方在《东张西望》的口误爆笑金句：“中秋节不如去食吓灯笼，玩吓月饼好过啦！”

而二人今日（16日）晚上，更是合体出席关楚耀的Pickleball新店活动，原本是关楚耀与谢东闵受访，之后陈庭欣应邀加入，但谢东闵再强调是普通朋友请食饭，指“唔系大家谂咁样”，而且每次见面都是一班人；陈庭欣更说二人相识十多年，一餐饭除开十多年都“啱数”，更反问：“做咩唔叫啲东张男神女神share返？你揾好多咩？”谢东闵则笑言麻麻地，叫女方下次请返食饭。陈庭欣不讳言恋情传出后有收到网民恭喜，对于传绯闻，二人睇得很开，不介意情侣档吸金，谢东闵说：“入行咁多年都俾人传咗好多镬啦。”陈庭欣则补充：“系啦，佢都话多我一个唔多，少我一个唔少。”