早前林宝玉远赴米兰有艳遇，被当地型男“抄牌”攞电话。虽然Connie忙于为艺人姚正菁打点，但无损心情齐齐睇Anterprima时装骚，更抽时间Shopping，点知被误会为 “名模”，遭遇相当搞笑：“因为嚟到Fashion Week梗系要着得靓靓， 𠮶帮品牌喺街拍之后，去到附近名店想睇吓手袋，但系见啲店员对我格外热情，都觉得好奇怪！后来先知道，佢地认错咗我系另一个华人面孔嘅名模，一齐影合照，又安排我去个小角落静静地睇袋，搞到我都忍唔住买咗六位数！”

林宝玉自认购物狂

Connie笑指每次去时装周都属“贴钱”开工，难敌购物心魔：“因为呢度啲款真系靓好多、平好多，加上去到外国心情、工作都冇咁繁重，而且购物系可以纾缓压力，所以都忍唔住手！（好大压力？）都系㗎，因为姚正菁新歌即将录好，而我又会有啲幕前嘅工作要两边兼顾。”

林宝玉爆收藏过百个名牌手袋

呢日林宝玉自爆收藏过百个名牌手袋，笑言收藏品比自己“值钱”：“每次去到时装周心情都会好好，因为可以著好多靓衫，亦会见识到好多丰富眼球。人生最高峰嘅时候真系有超过100个手袋，有啲系收藏品唔会用，加上依家专注时装，会开Channel讲吓服饰，都要有好多‘道具’，不过呢啲‘道具’比较贵啰！我冇统计过值几多钱，因为着得靓唔系用钱可以衡量，拥有一啲啱自己嘅袋系无价！”