无线台庆剧《璀璨之星》昨日（8日）举行记者会，除了主演的张智霖（Chilam）、高海宁（高Ling）外，今次更有绝少拍剧的蔡一智特别客串！自《冲上云霄II》后相隔13年再拍剧，问是否因为好友Chilam说服阿智演出，Chilam说：“监制呀，陈维冠先生重金礼聘，指定一定要蔡一智先生嚟演。”阿智听罢笑言：“黐线！”除了讲到今次拍剧的点滴，亦谈到Chilam儿子“魔童”被指停学一事，Chilam透露是自己想囝囝“Gap Year”一年陪他做巡回演唱会，认为是一生人一次的机会：“我就比较自私啲，我希望你陪我耐啲。”并透露过程中花了不少唇舌说服老婆袁咏仪。

蔡一智演粗暴角色每次cut机要自辩　赞Chilam是武术指导

属于剧集稀客的阿智直言：“我就好少拍剧嘅，你睇我口都震埋，好少拍剧，接到呢个角色就系做一个我从来都唔会做嘅嘢，喺呢个剧里面做晒，对女士动粗，好粗暴啊呢个人！好唔似我！反而喺呢套剧拍嘅时候，讲得最多𠮶句说话，每个镜头完咗之后，我都会同个对手讲，‘我平时唔系咁嘅人’。”不过高Ling就指阿智角色好锡细佬（周志康饰），与现实生活一样，阿智说：“我好锡佢㗎，虽然佢睇落个子大过我，不过现实生活细佬都系大只过我嘅。”谈到他跟Chilam自《冲上云霄II》再合作，Chilam：“佢系我嘅吉祥物，有佢啲收视都会好！”当问到阿智是否因为Chilam才拍剧，他说：“佢系我嘅戏剧指导嚟㗎，同埋动作指导，因为我记得有一场戏，要有啲动作，但系冇武术指导，原本觉得唔需要，但系度度吓就有，最后我哋多咗一个‘张家班’出嚟，就指导我，好彩佢指导我，我就冇受伤。”

Chilam挑战奸角预咗被闹　高Ling形容感觉快分裂

剧集预告见到Chilam角色又奸又深沉，更要出手打人，他预计播出后可能会俾人闹，并说：“人大咗就可以试吓，唔可以成日咁阳光咁可爱，要做返啲我自己想试吓嘅。都冇乜心理关口，因为好恨去做呢啲嘢，现实做唔到，现实冇可能做到我喺里面做嘅任何嘢，都系有一种满足感。”两位对手都指Chilam超入戏，高Ling用“分裂”形容：“我拍嘅时候好撕裂， Chilam好风趣幽默，我第一次知道原来佢转数咁快。（阿智：咁我就知咗好耐。）好分裂呀！私底下同佢倾偈𠮶时好开心，一入个mode，突然眼神一聚焦，个气场就迫埋嚟，我就萎缩咗。我成日觉得我喺入面好似一朵花，开头系咁样，越拍越缩，枯萎咗。”与Chilam分属老友的阿智也直言：“喺套剧里面有时我都唔系好认到你，好似唔系好识你咁㗎，识咗咁耐，从来未见过佢呢一面，真系冇见过。”

靓靓探班负责“鸡蛋里挑骨头”　高Ling爆每次现身都有美食

Chilam透露老婆袁咏仪（靓靓）有探班，对于他变奸，阿智问：“ 佢会唔会会觉得好似个老公多咗一个咁？”Chilam解答：“佢都系从好专业嘅角度鸡蛋里挑骨头，你呢度系咪可以咁样？唔系㖞，大佬。话‘你呢度点解对脚擘咁大呀？’好细致㗎，会有呢个咁嘅讨论。”上次靓靓爆Chilam去她的电影剧组探班兼食Crew饭，问靓靓今次有否来吃Crew饭，高Ling说：“靓靓嘅时候系有好多嘢食㗎，每次都有唔同嘅嘢……（Chilam：你咁样令到我好小气，佢嚟到就万岁，我去佢个剧组就食佢啲饭。）你哋系一体嘅。”而囝囝“魔童”张慕童就未有前来探班。

Chilam要魔童休学一年陪巡唱　花尽唇舌说服靓靓批准Gap Year

讲到魔童之前有上台跟Chilam夹Band表演，问儿子是否很有音乐天份，他谦称：“不见得， OK啦，正常，要努力。”对于魔童停学一事，他解释是休学一年：“未至于，我都系俾个机会佢拣吓，Gap Year，Gap下先，我就比较自私啲，我希望你陪我耐啲，当佢知道自己有咩不足嘅时候，又会揾返自己要学嘅嘢。（记者：你要求佢Gap一年？）系呀，我要巡回一年。（记者：觉得值唔值得？）我觉得好值得！我作为父亲，首先我喺我自己立场，我觉得maybe once in a life time。”高Ling亦非常同意，Chilam认为魔童能在自己喜欢的范畴获得实战经验，是很美好的事，但他坦言花了不少唇舌说服靓靓，每件事都要商讨，至于最终为何能打动到她，Chilam表示：“我话我老喇，俾次机会我啦。我唔知几时会再有机会去巡回，可能佢已经唔骚我。”至于将来会否一家三口上台唱歌表演，她指靓靓会发台瘟而且冇唱歌天份，阿智却突破盲点：“佢出过唱片㗎㖞！”Chilam却谓：“佢都系拍戏啦。”