七仙羽（七师傅）今日（14日）现身中环兰桂坊出席万圣节活动，受访时讲起对张致恒，因对方透露七师傅帮手垫付$12,000电费，而她亦不止一次帮忙。早前张致恒自爆欠债百万，当中蔡卓妍、关智斌、林盛斌都是其债主，问七师傅可曾借钱畀对方，她竟说：“我冇借，我直接俾，我谂住俾层楼佢，送㗎！真㗎 ！但我屋企人反对，同埋身边啲人都闹，个个都话不如俾我。”七师傅透露历来经济援助对方达六位数，见四个小朋友很可怜，也想过帮手养他们，不过遭老公反对，所以她亦十分纠结，询问“大家觉得我应唔应该俾层楼佢？”而讲到对张致恒的建议，七师傅指现时的财困问题根本无法解决，劝他申请公屋及攞综援。

陪老公蒲兰桂坊一晚食几餐饱到呕　自爆纤腰靠死顶缩肚

她指外籍老公热爱到兰桂坊饮嘢，自己即使工作忙碌亦会抽空陪伴，有时更为了大发慈悲，每间餐厅拉客都入去帮衬，一晚食足几餐：“食到我同老公都呕，好唔舒服，太饱喇！但系因为我善良慈悲，帮得几多得几多。”问到食咁多，但身穿贴身旗袍的她依然纤瘦零赘肉，她抵死自爆靠死顶：“我依家hold住个肚，一放松就出咗嚟，依家hold住咗！我hold得好实，一松懈，个肚就出嚟。”被问到老公是否特别爱揽其纤腰，她笑称：“个个都钟意揽，头先盛生（盛智文）都有揽。”

曾垫付张致恒$12000电费　称低调帮助很多人

七师傅更罕有大谈屡传财困的张致恒（Steven）。Steven早前自爆电费高达$9,489，更曾遭电力公司停电，幸获七师傅慷慨垫付$12,000电费，希望不影响小朋友。七师傅在访问中直认有援助张致恒一家：“我其实唔止帮张致恒，我好多人都有帮，普罗大众都有帮，只不过我低调做慈善，我冇公布出嚟，张致恒有时有特别困难，我都会帮。”讲到电费近万，会否感惊讶及深究背后原因，她指据了解不是一期，而是持续累积。

直认冇借钱而直接畀　想送楼予张致恒惟遭强烈反对

被问到Steven有否问她借钱，七师傅语出惊人自爆直接送钱，更曾夸张到打算“送层楼”给对方安顿一家：“我冇借，我直接俾，我谂住俾层楼佢，送㗎 ！真㗎 ！但我屋企人反对，同埋身边啲人都闹，个个都话不如俾我。当时点解我想俾佢，因为就算送啲钱俾佢用，解决唔到最终嘅问题、烦恼，佢人工得咁多，养四个小朋友、一个老婆、工人，要交万几蚊租，其他杂费，冇钱剩，呢个问题永远都化解唔到。后尾我就谂，不如我送层楼俾佢，层楼就算旧旧地，佢都够用，谂住帮佢还晒啲债佢就唔使再烦。我见到四个小朋友都几可怜，加上佢同我老公系同乡，谂住帮吓佢，但系身边人都反对，话唔可以，呢个系佢嘅功课，要佢自己完成人世间嘅功课，你唔可以咩都俾佢，后尾我就冇。”

资助金额达六位数　七师傅纠结应否送楼一了百了

至于这段时间总共资助了多少金额？七师傅指时多时少，相信应该达六位数：“六位数，加加埋埋。有时佢一下子需要啲钱多啲，可能𠮶个月就多啲，有时可能就少啲，我有时都同佢讲，唔可以咁频密，太频密嘅话，我惊好似纵惯咗，加上你呢件事都系解唔到，我话我唔知要俾到几时你个问题先化解得到，都唔系长远嘅办法。所以我后尾就谂，不如一了百了，畀层楼佢算，咁大家觉得我应唔应该俾层楼佢？”至于送怎样的单位，她谓送靓屋会俾人闹，但平屋都够他一家安顿。

信张致恒非呃钱　建议申请公屋及综援解困

面对坊间不少网民质疑Steven“扮惨呃钱”，七师傅则选择投以信任一票，指他人工得二万多，但租金都万几蚊，还有杂费及工人薪金：“佢话计都计到条数，加上以前争𠮶啲债都未清，所以越积越多。我估佢唔会周围呃人，因为佢系基督徒。”七师傅亦积极为其出谋献策：“或者佢就系快啲申请公屋，或者申请综援，佢而家个问题根本解唔到，我之前都有同佢老婆讲，不如揾份嘢做，佢老婆话揾嘢做冇人照顾四个小朋友。（记者：佢有工人）佢话小朋友有自闭症，同埋情绪问题，一个工人搞唔掂，可能佢细个，冇吃苦嘅能力。如果我，我会得，我照顾四个小朋友我会得，我磨练太多、经历太多，乜都可以挨苦，佢可能未挨得苦。”

曾想收养张致恒四名幼子　因老公反对打消念头

除了送楼，七师傅更自爆曾一度想收养Steven四个小朋友，但遭外籍老公反对：“我𠮶时都同老公讲，横掂我都冇小朋友，帮佢接管屋企几个小朋友，我老公话我哋咁忙，连猫都唔得闲照顾，我老公成日要工干，加上佢几个小朋友，我哋要习惯几个小朋友嘅生活习惯，唔系想养就养得到。万一你养人哋小朋友，病咗，一阵间赖我哋，我老公话唔可以因为心地善良就谂嘢咁简单，我同老公商量过，我话佢几个小朋友真系可怜！或者大家觉得我应唔应该畀层楼当化解呢个问题，唔使咁烦。”

热心助人惹反对甚至割席　七师傅陷两难：小朋友好可怜

不断施以援手，亦令七师傅饱受身边好友责难与压力，朋友甚至分成两派扬言割席：“好多人都闹我，好多人话师傅唔好同佢做朋友，唔好帮佢，个个都闹我。而家分两派，一边朋友话你再帮佢我就唔睬你，所以我好难做，有时见到小朋友冇嘢食、冇奶粉，冇尿片，我又好同情佢，有时偷偷地帮吓佢，但系如果俾身边啲人知，身边啲人都闹我，但我心地善良，有时忍唔住觉得佢小朋友好可怜，但身边啲人都系反对，要佢自己谂办法，话香港好多人比佢惨嘅仲多，你帮得几多，都好多人咁闹我，所以我有时都好难做。”面对各方反对与道德两难，七师傅显得相当无奈，叫大家帮手畀意见。