无线早前重播经典剧集《十月初五的月光》，剧中深入民心的“QE”薛家燕与“初哥哥”张智霖（Chilam）昨日（14日）于新城电台节目《开心大派对》温馨重聚！两位老友一碰面，家燕姐随即连环摆乌龙，被问到多久没见时，她说：“哗！好耐啦！十几年？”Chilam当场哭笑不得说“其实就冇嘅，因为你演唱会我有嚟做嘉宾嘅！”家燕姐随即爆笑道歉，而Chilam则无奈地走出镜头，笑说：“你忘恩负义！”家燕姐忆述起2017年随口邀约说将来开骚对方要做嘉宾，翌年果然有机会开演唱会，Chilam二话不说一口答应力撑，Chilam还有心地表示：“我仲要谂吓着咩衫呀，平时着西装，正常好正常，所以我就揾返啲初哥哥着嘅衫。”

家燕姐指好挂住Chilam，对对方赞不绝口，直言当年拍剧早已亲如母子，更大爆当年前往吉隆坡的暖心往事，不过却再度记错嘢：“我哋去到吉隆坡，佢话家燕姐，我预咗一晚一定要请你食饭，我话食咩饭啊？原来佢特别去订咗条毋忘我⋯（Chilam：唔系，叫忘不了！）哦，哈哈哈哈哈！（Chilam：毋忘我系花嚟嘅啫。）佢就订咗一条叫忘不了嘅鱼俾我食，原来系要订嘅，原来好贵，几千蚊。（Chilam：好食嘅，我揾人夹份。”家燕姐又透露当年拍跳舞戏不慎扭伤脚踝送院，但当值医生翌日才能看诊，Chilam当晚即刻联络其医生舅父连夜相救，“真系冇得好讲，系一个好好嘅合作嘅演员。”

家燕姐亦落力帮“乖仔”宣传无线新剧《璀璨之城》，透露自己早前在韩国出席电影节时，首播日已特意上网追看兼留意网民反应，大赞Chilam演技成熟细致：“第一日播嘅时候，我睇啲反应，个个都赞你！”谈到Chilam在剧中与陈晓华（Hera）有火辣激吻亲热戏，家燕姐笑言：“佢话有场戏好激嘅，我即刻上网睇……真，真系好激！佢好少拍咁激嘅戏，好激情，不过放心，Chilam系一个好乖嘅人嚟嘅，靓靓（袁咏仪）就会放心嘅，拍嘅时候佢冇手多多嘅。”

被问到拍激情戏是否难度很高，家燕姐自言当年粤语片尺度非常含蓄：“我少拍㗎，我哋𠮶时拍呢啲戏，一拍就pan上天！哈哈哈哈！”Chilam则指现今世代要露骨少少，所以事前沟通最为重要，幸好现场有导演、灯光及收音师等不同单位，大家各自清楚自己工作。家燕姐随即传授心得：“同埋同对手讲清楚，我将会锡你边度边度，唔好俾佢突然间 surprise，锡咗第二度！”Chilam闻言即回应：“其实你系有经验嘅！”家燕姐亦抵死妙回：“我真正嘅时候系有经验，哈哈哈哈！”

今次是陈晓华首次挑战大胆激情戏，Chilam表示现场有监制亲自指导，自己只是按指示才坏事做尽：佢话要整高佢只手，我话点解要整高佢只手，佢话系咁㗎，佢就好似俾你控制得好好咁样啰，𠮶种control freak、控制欲好强，我都系跟住去做，全部坏嘢都系佢指使我做！”被问到有一幕镜头低炒镜头，甚至影住陈晓华Pat Pat，Chilam直言拍亲热戏根本毫不享受，反而极为辛苦及充满顾虑：“好多嘢要顾虑，对我嚟讲，第一，呢度系咪掂得先？佢话OK，唔怕咩咩咩，咁第二就系有时好激动𠮶啲锡，又惊会唔会撞崩啲牙，其实𠮶刻好多嘢谂，又要抱起佢，好攰，要几多个take呢，好多嘢㗎，唔系‘哗，好似好正呀，你就好啦，益晒你。’唔系咁简单。”而这场戏，他透露该前后足足拍了五至六个 take。家燕姐闻言深表同情，指男演员其实最怕拍亲热戏，Chilam补充：“同埋打人啰，要刮人一巴呢啲好惊㗎，锡同打人啰。（家燕姐：会惊过龙嘅时候做唔啱，要打多几次，唔得㗎嘛，不过好彩佢屋企有靓靓同佢练。）”记者随即问道，究竟是练打靓靓还是亲热戏，家燕姐再大笑：“练锡啦梗系！”Chilam透露老婆袁咏仪已一起看过他与晓华那场戏，大赞拍得好睇。

此外，同剧的吴卓羲与张曦雯近来绯闻传得沸沸扬扬，在宣传活动上甜爆互赞，被问到在片场有否目击二人放闪？Chilam只回应：“第一，我就好专心做自己嘢嘅；第二，其次佢哋又真系演夫妻㖞，所以你话如真如假，我唔知呀！”当记者追问二人宣传时眼神充满爱意、遮都遮不住时，Chilam即打趣笑道：“咁应该真系要恭喜佢！（记者：Chilam恭喜佢？）你咁讲咋，我唔知呀，乜都唔知呀！”家燕姐则赞成二人发展，笑称：“系咪男未婚女未嫁？咁唔紧要㗎，如果大家倾得埋仲好！令个戏投入㖭，我赞成呢样嘢。（记者：佢哋衬唔衬？）OK啊，靓仔靓女，萤幕上睇都好衬。”