阿Bob林盛斌今日（29日）于电视城出席《夫妻肺片2》开镜拜神。期间谈到张致恒（Steven）频繁传出欠债、甚至自爆欠债达七位数一事时，身为债主之一的阿Bob，听到“张致”两个字已即时向后连退四步，他激动表示：“我见关智斌又讲完、阿Sa（蔡卓妍）又讲完，谂住我唔使面对，但今日始终都系要面对。”阿Bob更即场大爆，原来Steven早前仍有私下联络他，企图再次开口借钱！

见证Steven出道至落魄 Bob心疼：每次选择都好似行错路

阿Bob表示自己与Steven认识多年，早在对方刚出道的Boy'z时期，当时他任职DJ时，两人已非常熟悉，私下更会一起出去玩、打麻将。看著对方一路走来的变化，阿Bob 坦言感到十分可惜与心痛：“见住佢嘅人生，之前 Boy'z 𠮶阵时真系几好㗎嘛，到之后发生好多事。我睇到都觉得好可惜、好心痛，好似佢每一个选择都做错咗，每一个决定都行错咗。”

借完又借未还过一蚊

谈到Steven向他借钱，Bob坦承有好几次：“几多钱就唔讲啦，虽然个数目唔系话好大，𠮶阵佢都讲到好阴公嘅，正如阿Sa话，当畀小朋友利是钱，我都系呢一样嘅感觉。因为你养几个都唔容易，再加上未有好大收入嘅时候，都会替佢有啲担心，咁你讲到自己当时嘅环境好差，屋企嘅经济状况支持唔到嘅，作为朋友咪帮下手。我觉得江湖救急，呢啲嘢真系好闲。但你都要有少少承诺，原来你借咗系会还，都叫做上等人、君子。”

提到他五年前曾提及Steven欠债，这五年来 Steven有否还过一蚊？Bob苦笑并明确表示都有一刻想过“佢会唔会还㗎呢？”但结果：“都真系冇嘅。”

在 Steven 接二连三地，去到第四次开口借钱后，Bob亦开始感到无奈，“唉，我觉得真系唔得㗎喇。我自己都要揾个位停呀，我啲钱都系辛苦揾返嚟㗎嘛，搣开都系有血有汗。所以我觉得去到而家呢个地步，我都觉得成件事好可惜。”

阿Bob说见到Steven在访问中说会努力去还钱给不同的朋友，他亦希望对方真的“努力啲”，可能暂时娱乐圈未有什么工作，便在外面多打几份工，或做兼职：“我身边都有人努力去还钱，打一份工唔得打两份、三份，中间做 Part-time，系好努力嘅。我希望佢都系，见到佢咁惨嘅时候，我自己都觉得好可惜。”

爆Steven早排仍有私下联络他 企图再次借钱

问到二人有多久没联络？阿Bob大爆：“佢有联络我嘅。”追问对方是想再问他借钱，还是怎样时？阿Bob 长叹一口气：“唉！（阿Sa说身边仲有啲朋友有帮Steven？）咁最后𠮶次我就冇了，早排再嚟嘅时候，我就觉得唔好再咁（借）了，唔好意思。（佢有冇承诺还？）咁佢梗系有咁同我讲啦，但我之前就系选择咗信任，所以先一次又一次，我都觉得自己有少少戆居㗎了。但我真系当佢朋友先咁早。”

对于网民指Steven常拿小朋友出来情绪勒索。阿Bob称这正是他的痛点，让他难以拒绝：“某程度上，佢明白到可能呢样嘢系最打动到我。佢同我讲话‘屋企冇饭开、交唔到租’，咁你咪努力啰。但佢讲到屋企连小朋友奶粉、尿片都未够钱买，我就觉得好阴功，咁我都系尽自己少少能力去帮忙。（如果佢下次再用呢个理由呢？）冇架啦，搞唔掂㗎了。”他更打趣道，现时Steven的小朋友应该不需要再食奶粉和用尿片，所以这个借口已没用。

曾好言相劝被推托

阿Bob坦言甚至一度感到生气，因曾尝试给Steven实用的意见，岂料对方每次都以不同借口拒绝。他透露：“去到有一段时间，佢借完再嚟、借完又再嚟，我真系觉得：‘做乜嘢啫。’我都畀咗一啲建议佢，但佢又有好多理由返嚟同我讲‘唔得啊，我咁样唔得。’我当时觉得：‘哎呀，唔好再讲呢啲嘢啦！’都系算啦！你都要知道自己条街数咁样，唔可以再借钱度日。希望佢振作，努力啦。”

是否预了没得还？Bob肯定说：“冇得还㗎啦！”并寄语Steven能够真正振作，努力赚钱还给其他债主：“你唔使找我条数住，你找咗畀其他人先啦！我都预咗冇㗎啦。不过如果佢还嘅话。我会好高兴、好乐意嘅！希望收得返啦！”