“叻哥”陈百祥日前因公开指出无线电视（TVB）的筹款节目“请不起大卡士”而引发热议。今晚（10/11）他出席“EYT友好会联欢晚宴”时，接受《香港01》访问，再次大展“百无禁忌”的犀利本色。面对镜头，陈百祥不仅未有收敛，反而句句有骨落地，更直言TVB如今已被内地巨头远远抛离，市值更仅剩“9亿”，沦为小公司！

报道出街有否收到TVB电话？叻哥：打畀我都冇用，人工佢都畀唔起！

对于日前狠批TVB大骚请不起大牌艺人的言论，被问到电视台高层事后有否打电话给他时，陈百祥直言不讳地回应：“打电话畀我都冇用㗎！（因为你唔听电话？）咁又唔系，我都帮佢唔到㗎！佢连我个人工都畀唔起啦！我做司仪依家人工等于一套电影，你知唔知我一个Show系等于我旧时电影一套戏啊？我喺TVB系第一位㗎！我个人工系等于一套电影嘅人工，佢点样畀到啊而家？你唔系𠮶个世界已经！”

被问到是否担心言论会得罪旧东家，陈百祥反问：“我做乜要惊佢哋嬲？我讲事实啫，我想帮佢手添，点会嬲啊？我就是咁样提醒𠮶啲人鞭策佢。”

寸爆TVB市值仅得9亿：依家系细公司！人哋腾讯两三万亿！

谈到TVB近期的变革与合作，陈百祥越讲越火辣，直接拿出财经数据分析，大爆电视台现时的市值低迷：“啱啱你睇到了，佢咪即刻同腾讯合作啰！依家一间两万几亿嘅公司，同你一间细公司合作，你咪有机会啰！依家TVB系细公司嚟㗎！（佢好大㗎喺香港！）喺香港啫，我依家讲紧腾讯你知唔知金融㗎？人家两万亿、三万亿嘅公司，你讲紧依家佢嘅市值系九亿啊！（所以你觉得佢细！）梗系细啦，你识唔识数字㗎，系咪。”

他续指，香港的娱乐事业已今非昔比，必须接受现实：“今时唔同往日，TVB嘅黄金时代，就国内学我哋，旧时香港、深圳学我哋，我哋依家系港灿嚟㗎！我哋呢啲公司，直情系冇一间超过一百亿嘅娱乐公司，人哋其他随便一间，阿里巴巴又好，腾讯又好，2万亿、3万亿啊！你对财经认识吓啦！”

揭大慈善Show“请不起大卡士”真相：郭富城张学友会唔会唔收钱？

提到大牌明星不上电视台大Show，陈百祥剖析背后的市场现实，认为这并非单纯是电视台的错，而是整个行业的历史必然：“唔系请唔起，人哋唔系为钱呢依家。你觉得大卡士边个肯嚟？你畀得几多钱佢？我带住去入去系咁倚做一个Small Show又好咩都好，都六位、七位、八位数字，咁你TVB畀唔到嘛呢个！呢个唔关TVB事嘛！TVB养大咗呢啲巨星出嚟喇，但巨星个身价已经系TVB负担唔起喇，咁呢个好正常㖞！你觉得Aaron（郭富城）会唔会返嚟做啊？唔收钱？你觉得张学友会唔会返嚟做啊？唔收钱？唔会嘛！”

自夸当年平均收视30点：志伟钟意做嘢，我睇钱！

被问到会否出手“救亡”或重返TVB救市，陈百祥坦言自己已是退休心态，更笑言与曾志伟的价值观完全不同：“救唔到，佢请我唔起，同你讲！大佬啊，志伟喜欢做嘢，我唔喜欢做嘢，我系睇钱嘅！所以我唔接得𠮶啲唔收钱嘅明星队啰，我呢队系收紧六位、七位、八位数字踢场波㗎，点同啊？”

陈百祥续说：“我做咗几十年喺度，我入去𠮶时，我将佢所有收视所有广告提升咗几十%。我做紧TVB𠮶阵时，我嘅平均收视率系30点，你依家见过一个TVB嘅节目超过20点未啊？我平均㖞！系全年㖞！”