负债百万兼屡被老婆雯雯网上放负嗌离婚的张致恒（Steven），近年为了揾食养家可谓绞尽脑汁。估不到相隔长达7年，Steven近日重返乐坛推出新歌，带住两名网台男主持洪仔（M.Yoda）及淦泉（G.Yaki）合唱全新单曲《改过自新》，企图以歌声洗甩负面标签兼开拓新财路！Steven今日（14日）接受《香港01》电话访问，亲自剖白相隔多年再出歌的心路历程，除了自爆连累合唱拍档挨闹兼被杯葛外，更首度就42岁生日的“富贵铁板烧”风波解画反击！

停产7年靠名师操刀　凭歌寄意：唔好似我咁做人

相隔7年无录过新歌的Steven透露，对上一次其实曾自资做歌，可惜未及推出就因“一脚踏五船”事件令演艺事业停摆，一直搁置至今。而今次推出的新歌获广东著名填词人“三本目老师”亲自操刀，Steven直言歌词是度身订造，毫无保留地呈现自己的真实经历：“大家都觉得不如写番我自己本身经历落去，等大家知道我想带出咩讯息。三本目老师听完之后就写咗呢首《改过自新》出嚟。”他坦言歌词未有大改，因为三位合唱者都希望带出同一个强烈讯息：“鼓励同勉励大家，唔好似我咁样做人！”

拍档惨遭音乐圈杯葛　自责愧疚：当正佢哋系仔

今次新歌找来网台男主持洪仔及淦泉合唱，但未计划成为组合。Steven自爆当初全因大家夹啱嘴形才促成合作：“开头洪仔佢哋话想同我一齐录歌喺IG播，唱完第一次发现原来大家都好夹，性格大癫大肺。虽然我系前辈，但我哋冇分前辈后辈，净系好似个爸爸同埋两个仔一齐出去唱呢首歌咁样。”

不过，自知形象插水的他，坦言对两位新人拍档感到极度愧疚，更爆出他们因此惨遭行内人杯葛，连累街坊：“呢次合作佢哋受咗好多委屈，好多人闹我之余，都会闹埋佢哋两个一份，真系要好衷心同佢哋讲对唔住！因为其他人知道佢哋同咗我合作出新歌拍嘢之后，好多人就放弃咗唔再同佢哋玩（音乐）。”

为了不拖累新人，Steven深感自责并承诺会负起责任：“喺呢一方面我觉得真系要好好负返一个责任，如果我唔重拾返工作，就好对唔住佢哋两个，为咗我放弃咗好多事同机会。希望嚟紧日子我会尽能力做到最好，带住佢哋两个好好咁行呢一条路。”

低成本拍MV扮“情窦初开”　发奋减肥追回唯美感

提到新歌MV在黄金海岸的石滩一带取景，Steven直认是低成本制作：“希望大家唔好介意，本身谂住好情窦初开咁喺度玩吓跑吓，纯粹系想有个靓啲嘅画面，但系我都明白自己系需要继续减肥，个画面先至可以唯美啲靓啲。MV出到嚟都好得意，希望大家笑纳，因为低成本制作系咁㗎啦哈哈！”

至于老婆雯雯睇完MV后，Steven叹道对方未有特别评价；反而两个大仔见到老窦上电视就相当惊喜，疯狂追问：“爹哋，点解你喺电视入面？”

叹铁板烧挨轰首反击：笑骂由人，餐厅请点解唔去？

不过，网民最关心的始终是他早前42岁生日，带妻儿豪叹高级铁板烧惹来“有钱食饭无钱还债”的公关灾难。面对大批债主及网民涌入留言区狂轰“还钱未”，Steven大呼冤枉，首度亲自解画：“间铁板烧餐厅知道我生日，特登邀请我同老婆、小朋友去食饭，仲安排咗个蛋糕畀我，我小朋友都未见过铁板烧，所以都好开心。”

对于排山倒海的负评，他直言已经麻木：“我都惯咗，笑骂由人啦。我无钱出去食一餐咁嘅嘢，有朋友请我食，我点解唔去食呢？” 至于生日愿望，他坦言最忧心确诊自闭症及过度活跃的二仔，只望小朋友能健健康康成长。

为了揾食养家，Steven预告即将陆续推出新歌，更会积极筹备在广州或内地其他地方举办音乐会。经历连串风波，他感性地承诺会为家庭坚持下去：“其实近呢两年我一直都好努力去改变自己……因为我依家唔系为咗我去奋斗，而系为咗个家庭、为咗小朋友去奋斗。所以我会继续努力，令大家对我改观！”