唔少年轻人都有自己嘅兴趣，但有无谂过可以将兴趣发展成专业？杜光如 (Tia) 对整甜品嘅兴趣，由小学时期开始萌芽。当年佢喺电视见到人整蛋糕，觉得好有趣，于是开始落手落脚自己试。佢之后每年都会亲手为父母制作生日蛋糕，家人嘅鼓励亦令佢越做越有满足感。

今日嘅 Tia ，已经系国际厨艺学院 (ICI) 西式包饼及糖艺高级文凭课程嘅学生，仲代表中国香港出战2026年9月22日至27日喺上海举行嘅世界技能大赛糖艺/西点制作(西点制作)项目，同全球顶尖嘅年轻技能精英较量！由童年兴趣一步步走到国际赛场， Tia 嘅经历正正展现咗职专教育如何将兴趣转化为专业。

系统化学习　由基本功到进阶制作

入读ICI之后， Tia 经过学院由浅入深嘅系统化培训。佢分享：“课程一开始教咗我哋好多基本功，令我哋有机会接触同学习唔同范畴嘅知识。到 Year 2 ，学院提供咗更多进阶练习，例如制作朱古力或者造型糖艺嘅展品。”由基础到进阶，课程令 Tia 有机会接触甜品制作嘅不同领域，从中确认自己嘅热情所在，亦逐步规划未来嘅职业路向。

众多范畴之中， Tia 对拉糖艺术特别着迷，更经常放学后留校练习到夜晚。佢形容拉制出来的作品光泽亮丽，非常精美。呢份投入，或许就系佢能够将兴趣升华为专业嘅关键。

海外交流拓阔眼界　比赛展品倒塌成重要一课

学院亦会为学生提供海外学习同交流嘅机会。今年六月， Tia 前往西班牙交流，期间参观咗唔同嘅餐厅同烘焙店，亦学习咗制作当地嘅特色甜品。

但要数到令Tia印象最深刻嘅，莫过于较早时喺意大利参加世界杯青年甜点大赛嘅经历。比赛期间，佢啱啱同队友完成嘅作品突然倒塌。努力制作嘅作品出现问题， Tia 同队友当然十分难过，但冷静过后，佢哋亦重新审视整个制作流程，探讨问题出现嘅原因。

呢次经历令佢明白到，比赛成败往往取决于唔同嘅因素同细节，亦令佢学会从失败中反思同改进，累积咗宝贵嘅实战经验。

获老师鼓励参赛　与选手同行累积实战经验

最初， Tia 并唔了解世界技能大赛。后来老师喺学院宣传时鼓励佢报名，当时佢抱住尝试一下嘅心态参加，结果成功入选代表队，开始接受备战训练，并陆续参与唔同嘅赛事。

备战期间， Tia 一直同另外三位ICI同学共同训练。四个人擅长嘅领域各有不同，身边有战友互相切磋陪伴，令佢嘅训练过程充满乐趣。当自己喺处理朱古力方面嘅技巧唔够熟练时，Tia更会主动向较为擅长嘅同学取经，从而改进技巧。

呢种团队训练好快迎来成果，6月Tia远赴澳大利亚出战嘅Global Skills Challenge成功夺得金牌。佢认为参赛令自己受益匪浅，今次夺金亦有赖于整个团队嘅共同努力。

回顾过去一年， Tia 嘅经历非常丰富，由意大利比赛、到西班牙交流，再到澳大利亚夺金，佢唔止接触到以前从未尝试过嘅事物，仲学咗唔少平时上堂学唔到嘅嘢，例如点样处理突发状况、同队友合作等。

将兴趣转化为职业　以开设个人店舖为目标

一路走来， Tia 对自己未来职业路向同目标亦愈来愈清晰。佢希望毕业之后继续留喺西式包饼及甜点行业发展，并以开设一间属于自己嘅店舖为目标。

呢个想法其实早喺佢小时候已经出现，如今透过有系统嘅学习课程、海外交流同参赛机会，逐步累积实现目标所需要嘅技巧同国际视野。佢认为：“将兴趣转化为职业，工作时都会更快乐。” Tia 亦鼓励对相关领域感兴趣嘅年轻人，不妨亲身放胆一试。

职长UNLOCK：掌握“职”业资讯　 发挥个人专“长”

VPET 职专教育一直以技能为本，著重职业导向嘅实战学习，鼓励学生按个人兴趣同专长，及早解锁专业知识、掌握实际技能，为未来职涯规划做好准备。

想发掘更多升学同行业资讯，欢迎浏览职专教育网页，搜寻心仪课程、了解资历架构同埋各行各业嘅发展前景；亦可追踪官方Facebook及Instagram专页，紧贴最新嘅行业动态。

呢个系列会先后同四位中国香港代表队选手进行访谈，除咗糖艺/西点制作(西点制作)项目嘅 Tia ，仲包括时装技术(时装科技)、制冷与空调(空调制冷)，以及管道与制暖(管道及制暖)项目选手。佢哋将会分享从选择修读职专课程，到踏上世界技能大赛舞台嘅心路历程，令大家更深入了解职专教育如何协助年轻人解锁潜能，记得密切留意！

（资料及相片由客户提供）