高中参与全港少年技能竞赛，成为咗令林卓桦（卓桦）踏入时装设计之路嘅起点。佢现时就读香港知专设计学院（HKDI）嘅时装设计高级文凭，亦会代表中国香港，出战2026年9月22日至27日喺上海举行嘅世界技能大赛时装技术（时装科技）项目。

从最初发掘兴趣，到接受专业训练，卓桦就好似平日一步步将设计构思变成实际作品咁，一针一线，织出属于自己嘅时装专业道路。

高中参加全港少年技能竞赛　从兴趣走入专业训练

卓桦一向对时装同设计感兴趣，高中嘅时候，佢喺老师带领下开始接触各类相关比赛，当中更喺2024全港少年技能竞赛中嘅高中组时装科技项目勇夺冠军。

呢段经历令佢开始思考，自己可唔可以沿住时装设计呢条路发展，最后决定中学毕业后报读HKDI嘅时装设计高级文凭。

扎稳制衣基本功　持续训练精进技术

为咗好好装备自己，卓桦喺制衣业训练局九龙湾训练中心接受训练。备战期间，佢不断提升绘图、立体裁剪、制作纸样，同车缝等各方面嘅技能。当中，佢尤其重视车缝技巧，因为佢认为学识车缝，就可以将设计制作成实物。

佢指出除咗车缝之外，亦要掌握另外嘅制衣细节。就好似折褶咁，将布料铺平嚟做嘅时候，就一定要预留多啲布料作折褶之用。佢认为训练加深咗自己对服装整体结构嘅了解，有助掌握往后课程嘅内容。

另外，佢亦好钟意使用熨斗。“如果一开始就用熨斗，熨压嘅骨位会更加平直，做出嚟嘅成品亦会更加靓。”师傅曾经同佢讲过：“七分靠车，三分靠熨。”呢句说话让佢印象深刻，佢觉得呢个工序不但好玩，对制衣嘅细节处理同样非常重要。

最难忘立体裁剪短裙　成品高度还原设计图

喺训练过程嘅作品当中，卓桦最钟意嘅系一条以立体裁剪制作嘅短裙，佢发现原来唔系所有效果都要靠机器或者针先可以做到出嚟。

卓桦认为学习过程中最具挑战嘅地方，系点样将一张设计图转化成实体成品。喺制作嘅时候，佢一开始会先贴出一条红线作为大致轮廓，一旦红线贴歪咗，就可能会影响整个造型。而最令佢开心同兴奋嘅，系佢完成制作后将成品同设计图对比，发现设计高度还原，连细节都精准呈现嘅时刻。

备战世界技能大赛　技术与抗压能力同步提升

卓桦表示世界技能大赛系一次高规格嘅比赛，嚟自世界各地嘅选手会同场竞技。佢相信呢个会系一个有趣同深刻嘅体验，亦希望藉住呢次机会同其他选手互相学习，进一步提升技术同实战经验，突破自己。

对卓桦嚟讲，备战过程除咗带嚟技术上嘅提升，仲包括心态上嘅改变。比赛当中，选手往往需要喺有限时间内完成平日看似不可能做到嘅任务。佢逐渐体会到，心急其实无补于事，反而更要慢慢理清思路，再思考如何完成眼前嘅工作。佢认为，呢次备战经验令佢嘅抗压能力明显提升。

目标从事高级订制　盼日后创立个人品牌

由高中参加全港少年技能竞赛，到代表中国香港踏上世界技能大赛嘅舞台，卓桦逐步走入时装设计嘅专业领域。

毕业之后，佢亦计划继续学习相关知识同技术，希望日后可以从事高级订制方面嘅工作，并创立自己嘅品牌。

职长UNLOCK：掌握“职”业资讯　发挥个人专“长”

VPET 职专教育一直以技能为本，著重职业导向嘅实战学习，鼓励学生按个人兴趣同专长，及早解锁专业知识、掌握实际技能，为未来职涯规划做好准备。

想发掘更多升学同行业资讯，欢迎浏览职专教育网页，搜寻心仪课程、了解资历架构同埋各行各业嘅发展前景；亦可追踪官方Facebook及Instagram专页，紧贴最新嘅行业动态。

呢个系列会先后同四位中国香港代表队选手进行访谈，除咗时装技术（时装科技）项目嘅卓桦，仲包括糖艺/西点制作（西点制作）、制冷与空调（空调制冷），以及管道与制暖（管道及制暖）项目选手。佢哋将会分享从选择修读职专课程，到踏上世界技能大赛舞台嘅心路历程，令大家更深入了解职专教育如何协助年轻人解锁潜能，记得密切留意！

（资料由客户提供）