电影《寒战1994》将于5月1日上映，戏中有久未在香港电影露面的吴彦祖（Daniel），饰演壮年版蔡元祺。Daniel对上一次拍摄香港电影已经是2020年的《除暴》，今次拍摄《寒战1994》，一口气拍足两集，制作时间长达7个月，可谓过足瘾，而他更盛赞第一次合作的刘俊谦，又靓仔又有才华︰“已经钟意咗呢个人。”

鸣谢︰
化妆︰Puipuifc
发型︰Alex Leung 梁伫鸣

可以讲番广东话︰“有回家感觉”

已经有一段时间冇拍香港电影，问到吴彦祖对于广东话对白可有难度。“起初以为会唔适应，但第一日去试造型，见番熟识的工作人员，可以讲广东话就觉得好舒服，有回家的感觉。咁多语言，拍得最多系广东话，英文可能得10部左右，广东话有60几部，所以一讲广东话对白就好舒服。”而吴彦祖亦是位《寒战》迷︰“一直想跟导演合作，所以制片一找我便应承。”

今次是从影以来，饰演最高级的警务人员。“自己都已经52岁，个人成熟咗，当年唔会揾我演呢类角色，而家多咗人生历练就可以演。”导演梁乐民也大赞Daniel在演绎时花了不少功夫︰“佢个角色在《寒战II》是由柱哥（张国柱）饰演，我冇叫佢刻意模仿，但佢一演，举手投足之间完全一样，特别系食雪茄个动作，你会感受到两个人将会有一个连结，而我哋在制作时亦留不少角色出处。”

首次合作已大赞刘俊谦︰“靓仔演戏叻又勤力”

今次跟新生代演员刘俊谦有最多的对手戏，问到这位新人，吴彦祖赞不绝口︰“非常之好，好快就有默契，我系第一日试造型时先识佢，跟佢沟通咗一阵已经钟意咗呢个人，佢又靓仔，演戏又叻，又勤力，你会好欣赏佢。好兴奋可以跟一班年轻演员合作，因为以前我是最后生，而家我系差唔多最大𠮶个，以前啲人行埋嚟话好钟意睇你做戏，而家系话我爸爸妈妈好钟意睇你做戏，呢个系要接受嘅现实，今年都52岁喇。”

既然已成为前辈，对于年轻一辈演员又有何忠告︰“好简单，专心啲拍戏，因为而家有好多额外事情要做，要拍抖音要拍小红书，专心去做一件事会好啲。我都有玩社交平台，但我而家一年先拍一部，好多时间玩。唔好以为有好多人追踪自己先叫红，我觉得只要做好本份，红呢回事会慢慢来。”Daniel又表示一年拍一部这个节奏好适合现在现在的生活模式，过去一年几部戏太辛苦︰“我都想多啲时间陪下个女。”

97年决定来港发展︰“呢个决定就改变我成世人”

现已13岁大的囡囡，原来一直都冇看过自己的作品︰“初初唔想畀佢睇，唔想佢觉得爸爸系一个明星，佢知道爸爸系爸爸就够，但慢慢大过就对我啲作品冇兴趣。不过我自己钟意的作品，其实唔太适合佢而家睇，因为太暴力。”记者提议可以让囡囡睇《美少年之恋》，更建议与冯德伦合体拍续篇︰“拍续作？唔使喇啩，我想再同冯德伦合作，咁多年朋友，佢做导演的作品我都有参与，都系开心的事。”

故事发生在1994年，而当年吴彦祖正实现自己的梦想，到北京习武，随后更决定来港发展。“当年做咗个决定，97年返嚟香港，就改变我成世人，被发掘做演员。当时都唔太清楚回归系咩一回事，只知道香港返中国，唔系好理解那几年的情况，而因为呢部戏了解多咗。”

女儿系巴柔高手　“被佢箍颈解唔到好尴尬”

至于94年在北京习武的日子，因为在美国练武时，教练是同李连杰同学，所以带我哋到北京武术队一齐练习，当时吴京都喺度，系几开心的一件事，全日全力练功，这亦是自己细细个的梦想。而家都有练习，因为一唔练就会冇，所以保持一星期两、三次练功打拳，这是我的爱好来的，不是为拍戏，由细到大的一个生活习惯。”

而这兴趣，囡囡都感染到。“疫情期间佢睇到一啲小朋友学巴西柔术的片段，睇完有兴趣我就带佢去学，都成日出去比赛拎唔少奖。”而作为练了30年功夫的吴彦祖，几年前跟10岁大的囡囡切磋巴西柔术，都遇到挫折。“因为我是练拳脚，佢系练摔技，一次佢箍住我条颈我系解唔开，好尴尬。当年我可以反击佢能佢松手，但我唔会嘛，要有技巧拆解，对于习武30年的我都解唔开呢个锁，令我决定要练巴西柔术，到而家都练咗两年。”

一年拍一部刚刚好　想做导演︰等个女读大学先

虽然吴彦祖在《寒战1994》打得不多，但导演就透露在下集《寒战1995》会出现一场非常震撼的画面︰“两个打得相当有型（吴彦祖、刘俊谦），相当劲的男性荷尔蒙，有不少女工作人员偷偷地望下个Mon，睇到个个都深呼吸。”

在荷里活发展过，今次重返香港电影工业，又有何特别体会︰“我钟意拍港产片或者在亚洲拍戏，多过美国，因为呢度导演话晒事，美国那边又导演又监制，个个都可以话事，你唔知听边个讲好。”从影廿多年，吴彦祖在荷里活都有担任过监制，将来可有机会登上导演一职？“一路都想，但冇时间，而家拍部戏，由准备到拍摄到做后期要花两年，我唔愿离开家庭太耐，等个女大啲读大学先，不过如果我做导演，我一定会自己写埋剧本，所以要啲时间。”