今年是巨星张国荣 Leslie 诞辰70周年，康乐及文化事务署 (康文署) 香港电影资料馆 (资料馆) 特别推出“修复瑰宝 -《流星语》(1999) (4K数码修复版) (香港首映)”放映节目，于4月26日晚上在香港文化中心大剧院圆满完成。

《流星语》修复版香港首映门票售罄

今次放映节目为资料馆二十五周年志庆节目及“香港流行文化节2026”节目之一，导演张之亮及另一位发起成立“创意联盟”的导演张同祖，再加上戏中三位演员包括狄龙、林家栋和饰演小朋友明仔的叶靖岚也有出席首映支持。

导演分享当年拍摄难忘事

《流星语》(1999) 4K数码修复版香港首映门票早已全部售罄，电影放映前两位导演加上三位演员特别在台上分享当日的难忘事。张之亮忆述说：“当年经济比较低迷，对影圈有好大嘅影响，好多戏都上唔到同揾唔到投资方，𠮶阵时开咗一间叫《创意联盟》嘅公司，用另一种方式去集资，去拍一啲优质嘅电影，重新吸引返观众入去戏院睇戏。好多谢张国荣，佢以零片酬嘅方式去支持呢件事，亦都多谢台前咁多位，冇佢哋就唔会成就到流星语，今日心情真系好激动好感激。”张同祖补充：“张国荣系我其中一位尊敬嘅演员，为咗电影工业，佢可以唔计较收益。”

狄龙激赞导演与张国荣

狄龙分享前先跟全场观众打招呼：“观众朋友你哋好，多谢你哋一再支持呢部电影，呢部电影能够修复再重影，我哋多一层开心，多一层期望，因为呢部电影系充满爱同埋暖流。当初点解我会接呢部电影？因为我打听咗导演张之亮系一个点嘅人，其他人同我讲导演嘅花名系叫做阿细，因为佢生得好细粒，但系佢人仔细细多才多艺，为咗电影唔怕闭翳，同埋我睇过佢拍嘅《笼民》，所以我知道呢个导演一定会系好导演，我心悦诚服。今晚我再次出嚟同大家见面，我觉得呢部戏值得怀念，尤其是哥哥精彩嘅演出，同埋我哋嘅小朋友明仔，佢而家已经系英俊潇洒，叫明哥，佢话如果有好嘅剧本，佢唔介意将佢拍电影嘅第二次献俾观众。我唔多讲啦，喺我身边系一个好出色嘅制作人，佢系林家栋先生。”

林家栋感念张国荣

家栋接力说“大家好，其实𠮶时我仲喺电视台，啱啱张之亮导演嘅助导阿Chris揾我，𠮶阵时我都唔知系乜嘢事，只系觉得可以离开电视台出去闯都好㖞，后尾知道原来系拍张之亮导演，有得拍哥哥同狄龙哥哥，仲有好多好多人。其实我同你哋一样，读书时都系听张国荣，所以我好开心。好多人成日问我套戏印象最深刻系乜嘢？其实就系两个男人嘅浪漫，当其时有场戏就系喺海旁，哥哥讲佢最失意嘅时候，同我倾偈，其实我到而家都系记忆犹新，反观我而家睇返成部戏，正如头先祖哥所讲，我哋欠缺嘅就系创意，其实系𠮶阵时导演张之亮已经系一个行得好前嘅人，我希望呢个创意联盟喺𠮶阵时就影响到而家，什至乎系将来，有更加多电影人喺电影方面嘅题材系更加爆棚，因为得益嘅都系观众。”

叶靖岚回忆与张国荣往事

小朋友明仔叶靖岚说：“如果真系要记住其中一幕，我最记得就系我同哥哥喺床上边，大家摸大家耳仔，佢唱住一首儿歌氹我瞓觉，同埋塞咗啲罐头鱼喺喺个盒入边俾我食，我仲记得𠮶阵每一刻嘅感觉。”最后狄龙大哥补充说：“千金难买今夜欢，万金不换当年情，我哋向张国荣致敬。”

适逢资料馆今年成立二十五周年，资料馆另特别呈献“修复瑰宝 - 电影马拉松”，两日逾十小时的电影马拉松将于5月16至17日(星期六、日)一连两天，在东九文化中心剧院放映五部经数码修复的影坛经典，带领观众穿越百年光影长河，感受电影的永恒魅力。为银禧纪念揭开序幕。紧接六月起，将于香港文化博物馆举行“幸会25岁——香港电影资料馆珍藏展”，以珍贵电影文物，细说香港电影光辉历程，更有互动装置让观众与资料馆跨时空接触。