《火遮眼》（The Furious），一部由香港制作，集合亚洲各地动作片高手的电影，由《九龙城寨之围城》金像奖最佳动作设计谷垣健治（Kenji）执导，集合各地高手于一片。中国动作影星谢苗、印尼柔道高手乔塔斯利姆、荷里活动作特技武师黎唯（Brian Le）、日本动作演员岩永丞威、以及印尼武术家雅彦鲁伊安主演。电影安排先在海外公演，获得极好口碑，本月12日强势回家，香港上映。《香港01》找来导演谷垣健治接受访问，作为动作电影新高度，最大的使命就是要营造一幕幕令人印象难忘的动作场面，而面对AI的挑战，谷垣健治冇有怕，更以世界杯来形容今次动作场面的刺激度。

火遮眼｜谷垣健治跟“成龙”学功夫　“同朋友入戏院每人记一招”

谷垣健治《赌神2》已同谢苗合作︰好百厌

《火遮眼》的男主角是中国演员谢苗，亦即是大家在《洪熙官》（1994）、《给爸爸的信》（1995）中认识的童星，而Kenji亦早在拍摄《赌神2》时认识他。“以前见过面，我刚刚来香港做临记，在《赌神2》剧组见过面，佢好百厌，踢完人屁股会扮唔知𠮶种。”随后都有再见面合作，直至今次开拍《火遮眼》，老板江志强提议用谢苗，Kenji举脚赞成。“我想佢在戏中展现中国武术的风格，当学过正统中国功夫的人在街头打交会怎样？日本人就算学中国武术廿年，打出来都是有点不同，打唔出𠮶种味道，所以今次纯粹要佢打中国武术。”

“廿年后观众唔记得套戏讲咩，都会记得呢场5人大战”

谷垣健治认为要拍好一部动作片，先要想好有甚么全新的动作场面示人。“等于《警察故事》个故仔讲咩你未必讲得出，但你会记得成龙喺尖东永安广场捉住啲灯饰瀡落嚟。”所以开拍前，谷垣健治已经跟动作指导度好几个重要场面，包括在预告中看到MMA擂台上打到如叠罗汉般。“呢幕已经可以做海报啦！”

另一场是压轴的5人混战，说混战因为当中涉及5个人3种对立层面。“我打你时，但都要打佢，关系好复杂。三个人对打我睇过，但这样复杂混战就未试过，甚至复杂到喺剪接时，有人提议不如剪咁一个走，变成二对二。我话︰‘唔得！呢场一定要！一定要保留！’我是导演，但我也是动作片粉丝，你问我我一定想睇呢场戏。就算廿年后观众唔记得套戏讲咩，但都会记得呢场5人大战。”

“睇动作片好似睇世界杯咁肉紧”

今次今日做创作，都要考虑AI，要视之为敌还是共融创作，谷垣健治的体验就是好好用。“好方便啊，喺电脑度尝试到好多嘢，令现场减少出错。”无惧AI威胁，因为Kenji知道有些表演，是电脑取代不到。“我哋要清楚自己长处同出路，要明白无论AI点发达，世界上都会有观众睇人踢足球、打篮球，点解呢？因为系Live，你唔知场赛事有咩发生，赛果会点？所以动作片嚟讲，要追求原始一点，到肉一点，让人看得肉紧。”

睇动作片好似睇世界杯咁肉紧？无错，这是谷垣健治的想法。“我跟老板带过《火遮眼》去美国做Screening，当时唔知得唔得，我同老板坐最后，望住啲观众见到有致命的攻击时，会听到‘Oh My God！’到歹角被击中时，会忍唔住拍手掌。去到最后五人大战，大家睇到完全投入，拍足十几次手、仲会尖叫，我同老板见到大家的反应都好开心。这就是大家追求的观影体验，要拍到似睇世界杯咁兴奋。一个人睇，都唔够一班人喺戏院睇咁好体验，而家拍电影，就系要做到呢个效果。”