香港地万家灯火，大舖小店满布；但繁华闹市一角，总见小人物的身影。摆卖近40年，由街头卖头饰、到租店开舖、再重返街头卖白兰花，今年66岁的“好姐”，仍然活跃于新界各区，元朗、葵芳、沙田也可见其身影。

“本人系女子！”离婚多年，独力养大几名子女，就是靠这名女子 —— 女与子并成的“好”字，才得名好姐。 她乐观开怀，访谈期间笑声响亮，仍在街头摆卖的原因很纯粹，“你唔做嘢，咪盏个人快啲老人痴呆！”

淘宝、拼多多杀埋身　好姐：零售业冇得做㗎喇

好姐最初在沙田街头卖头饰，其实只是为了帮女儿打扮，“我有两个女，𠮶时可以打扮下，紥下辫仔咁。 卖咗好多年㗎喇，卖头饰卖咗几十年。”1987年，好姐诞下细女仅仅数个月便开始摆卖至今，“卖头饰系最开心，又多靓嘢睇。”

随著时代变迁，近40年贩卖生涯，见证了香港零售业由盛转衰。她也试过转型，在荃湾一些散货场卖“柠檬王”等零食，但租金令人吃不消，“我租最单边𠮶个位，一日都1,000蚊租㗎。”即使与人合租亦要几百元，加上网购兴起，难以为生，“𠵱家淘宝、拼多多咁容易买，边有得做㗎啫，啲零售业冇得做㗎喇，卖咩都冇用。你睇下淘宝𠮶啲，几好生意就知啦。连小学生都识得买，咁你话你点做吖？阿婆婆都识得买！所以零售业系冇得做嘅。”

4件同款开工战衣防身　“叮当百宝袋”不怕倒泻箩蟹

最终，好姐又重返街头，在新界四围“飘泊”，更要与执法人员“角力”。好姐表示，平均每年被检控一至两次，会被扣押货物、甚至上庭罚款，“我哋跛下跛下，试过喺沙田火车站，佢哋（执法人员）跑得几快呀，追住我走入去火车站入边呀！追到就话：‘阿姐... 唔系，阿婆... 你今年几多岁呀？嗱今次我算啦，你唔好再喺度摆喇’。”虽然有时执法人员网开一面，说“阿婆，去饮茶喇，食早餐喇”，但好姐坦言通常难逃一劫。

为应对执法人员，好姐特意准备了“开工战衣”，腹部前方有一个打横的拉链袋，“叮当百宝袋嚟㗎呢个！”她解释此设计不用孭袋，十分方便，不怕跌钱，“孭住个袋走都走唔到，顾得呢样又唔顾得𠮶样，倒泻箩蟹！”她笑著忆述，女儿曾问她为何永远只穿一件衫，“ 我话梗系唔系啦，我有4件呢啲衫嘅！”

摆档12小时　收入四五百

涉及食安，街头摆卖不能卖柠檬王等零食，于是好姐转卖白兰花，穿梭多个地点，每天早上7时开档，工作10至12小时，每包10元，究竟每日有多少收入？好姐称：“如果唔系监平监贱嚟讲，起码都有四五百蚊嘅，做12个钟头无400蚊都唔想去做啦，系咪先？”她指，曾有客人试过给予100元买一包，但好少遇到。

由于葵芳一带亦有其他长者摆档卖花，好姐会主动避开竞争，“啲人肯定帮个老嘅买㗎啦，点会帮你个后生买呀？你唔够佢卖㗎，咁我咪去第二度卖啰。”说起葵芳，原来好姐与甄婆婆认识多年，指对方年逾80仍然好精灵，但健康已大不如前，希望对方减少吸烟熬夜，“佢又跌过呢，所以行路都冇咁好。”

白兰花用途多　客人自制唇膏手霜香水

好姐指，不少人是在网上见到她们，好心前来光顾，但做小贩最怕“太扬”，且卖白兰花亦好大压力，“天气太热，啲花好容易变，唔可以卖得太耐。卖得太耐啲花冇用，一到夜晚啲花会起点点，同埋开始软化，会缩水，细粒啲㗎𠮶啲花。我哋要摆支冰水喺度、等佢凉凉哋。”

原来新鲜的白兰花，除了摆放在冷气前面令室内、车厢内飘香，更有其他作用。好姐说，有位客人向她买白兰花后，加工制成白兰花润唇膏、润手霜、香水等，甚至加入白兰地、跌打酒内。因为好姐不卖隔夜花，有时卖剩的花就会留给该名客人，对方有时就会将少量产品回馈好姐，但好姐没有代售，只会将其送给其他熟客。

好姐：唔做嘢盏个人快啲老人痴呆

好姐于1993年离婚，前夫只给了几个月赡养费后便没有下文，她独自抚养3名子女成人，现时与30多岁儿子同住，两名女儿已出嫁。既然仔女都长大成人，为何还出来摆档？好姐笑着说，儿子十分孝顺，有给家用，也曾叫她不要工作：“志在唔使攞综援啰，哈哈哈！我又唔钟意伸大手板攞钱㖞‥‥‥你唔做嘢，咪盏个人呢快啲老人痴呆（脑退化）啰。”她续称，其前夫近两年退休后，在家中无所事事，便患上脑退化症。

其中一名女儿，则与丈夫及孙女定居英国，每次回港返英的来回机票昂贵，十分吃力；但女婿将被派遣往马来西亚工作，孙女中学毕业后，她们一家便会搬往马来西亚生活。好姐欣喜若狂，因为双方距离大大缩短，甚至孙女也可自己买机票回来探望，“英国好远呀，十几个钟头机呀！𠮶边（马来西亚）生活指数冇咁高，机票又平，返嚟香港都好啲吖嘛，我哋过去都方便啲近啲嘛！”

访问期间，好姐直言自己佩戴假牙，“就系假先靓㗎嘛！上边就系扣上去嘅，下边就系种呀，即系镶落去𠮶啲嚟㗎。返大陆整咋嘛，争好远呀！”

对于现时的生活状态，好姐抱持平常心，熟客请饮请食，只要有客人买花她便开心，过几年赚够钱便会退休，“做咗咁多年人呀，你唔乐观又点啫？总之开心又一日，唔开心又一日啦。自己冇钱，闭翳𠮶阵时自己知咪算啰。”