“脆”（Threads）呢个App，大家应该听过甚至用紧。我得闲冇事都会上去“冲吓浪”，睇吓啲“妹猪”八卦。但近排睇多咗美股，SpaceX气场又够劲，逼于演算法嘅“淫威”之下，依家我个Threads 10个有8个都系讲SpaceX，啲“妹猪”Post就咁被洗走晒，有够伤心。

SpaceX反高潮 Threads民洗版围炉

话虽如此，经过我呢排嘅观察，呢啲Post都有一个共通点——就系源于SpaceX上市反高潮，近排跌到趴响度，老散一窝蜂涌上Threads“求医”或者“围炉”。

俗语都有话，睇Threads买股票，反智兼好笑。Any肥，重点系而家Threads呢个“散户集中营”，因为SpaceX股价急跌，搞到唔少持货嘅散户同投资小白都陷入恐慌。再者，Threads上面每个观点都唔同，留言区个个都系“巴菲特”，一时一样。

喺呢个“唔咸唔淡”嘅局面底下，一众投资新手、有意入场嘅准买家，又或者已经坐紧艇嘅持有者，究竟应该点部署？以下我会就住Threads上面嘅常见疑虑，加上一啲投资老手嘅意见，同大家分析一下。

SpaceX 现况 三日内蒸发一间腾讯

好，废话讲完，入正题。

先讲基本面。SpaceX 股价由上市高位225美元跌到近一度底见147美元，十日唔够跌咗三成几，市值蒸发超过6,000亿美元（约4.68兆港元），即系成间腾讯﹙0700﹚化咗灰。

跌乜？我睇表面原因有三个：

第一，收购Cursor，股东权益被沟淡。

6月16日，SpaceX股价仲升紧个日，老马突然宣布以600亿美元全股票交易收购AI编程工具Cursor嘅开发商Anysphere。即系话，公司要印600亿美元新股票出嚟找数，原有股东嘅权益就咁被沟淡。晨星分析师经此一事仲将公允价下调至62美元，即系原有价嘅三分一。

师兄，你一间主打整火箭嘅，上市唔够一个礼拜就用股票去买个Start-up AI公司，两个公司业务大缆都扯唔埋，完全奇奇怪怪，我啲股份就咁贬咗值。老马呢啲艺术家性格，我真系完全睇唔透。希望之后个市可以同我讲，我而家嘅谂法系错嘅，但我而家嘅心情真系一落千丈，啲钱就咁比佢“沟”走咗......

第二，发债融资，越借越多。

6月22日，SpaceX突然宣布拟发行200亿美元投资级债券，用嚟偿还上市前收购xAI产生嘅过渡性贷款，以及支持AI基建扩张。问题系，公司账面明明揸住超过1000亿美元现金，但依然要伸手问市场攞多200亿——即系话，𠮶1,000亿可能已经被锁死喺未来嘅算力硬件采购入面，根本郁唔到。分析师预测，到2031年SpaceX嘅净债务可能由130亿美元膨胀至超过4,000亿美元。

上市先十日咋大佬，咁快就借完又借？ 完全当股民韭菜咁割......

第三，估值过高，基本因素跟唔上。

SpaceX上市首日市值一度冲破2万亿美元，市销率大约137倍。但现实系，公司2025年全年净亏损49.4亿美元，2026年第一季单季净亏损已经飙到42.8亿美元。一间仲未稳定赚钱嘅公司，市值高过Amazon，市场已经“预支”咗未来十年嘅超乐观增长预期。当你嘅股价已经反映晒所有好消息，咁剩低嘅就只有坏消息。

唔系叫大家唔好买，但依家咁玩法，真心刺激过玩过山车。俗语话，“赢粒糖，输间厂”，讲嘅就系而家呢个局面。

好啦，讲完表面原因，讲底层原因——其实只系“回归现实”。

SpaceX上市首日升两成，再冲多几日，本身已经系散户“FOMO”嘅结果。而家只系FOMO退潮，返去一个相对合理嘅价位。你问我“见底未”，我会答你：我唔知。但我知嘅系，Threads上面话“见底”𠮶班人，上个月先话Bitcoin会见10万，而家Bitcoin喺边？你自己睇。

专家意见｜温杰：倘坚持要买 如同赌博咁玩

OK，你唔信我，系时候听吓专家点讲。

我揾咗凯基亚洲投资策略部主管温杰（Kelvin）倾咗几句，问吓佢对SpaceX嘅睇法，同埋而家呢个局面，仲持有或者想入场嘅散户可以点部署。以下系访问内容精华，我尽量保留佢原汁原味嘅语气，绝无断章取义。

问：而家SpaceX跌到慌，仲持有或者想买嘅人应该点做？

温杰：哗，我系唔赞成买入嘅。所以你话要买？咁简单，你要买咪买啰。不过你知道佢波动性好大，咁你唯有控制注码啰。即系一系分几注，一系你有一百蚊，你买一蚊或者五蚊。呢个系唯一办法㗎啦。

但系因为我系好保守、好Fundamental﹙睇基本面﹚嘅人，所以呢啲咁嘅股⋯⋯坦白讲，上市初段一定升㗎，因为Institution要追，散户又冇得抽，一定要喺市场买。所以我当时嘅策略系：你要买就一上市队入去，见到唔对路就沽。玩还玩，赚完就散。

但系如果你话而家先买？第一样嘢你要谂清楚：佢未有盈利，负现金流，连Price to Sales都劲贵。业务本身，除咗火箭运输之外，其他都系好虚无缥缈嘅嘢。坦白讲，呢啲系咪真系适合一般投资者？定系应该适合Professional Investor、PE、Venture Fund做初段投资？我系有保留嘅。

但系如果你决定要玩，咁你咪玩少少啰。将来见到情况好嘅，慢慢加注啰。结论都系：你决定要玩，咪玩，但系你当系赌博咁玩。

赢咗，唔好觉得自己分析得犀利；输咗，都唔好肉赤。唯一方法系咁㗎咋。

问：Threads上面好多人讲“阴谋论”，话大户等散户恐慌沽货之后先入货，你点睇？

温杰：应该咁讲，如果真系跌到残晒，大户入货好正常。如果你都觉得系咁，你咪唔好入住，等跌到残晒先入啰。

但系我始终唔能够印证到嘅嘢，我好难分析。我纯粹计盈利、估值。如果当赌博就赌博咁玩，一系买大一系买细。阴唔阴谋论都唔关你事啦。

咁即系精神分裂——我唔介意你去赌钱，但你知道你去赌钱，讲乜嘢阴谋论、讲乜嘢分析呀？印证唔到嘅嘢，我唔想讲。

不过正常地大户冇宝唔落，真系跌到落去，佢收货好正常。

问：Personal咁讲，你估未来SpaceX股价升定跌？

温杰：哗，唔知㖞。

我立场好简单——睇吓佢将来收入有冇持续增长，会唔会蚀少啲钱。如果所有嘢都正路发展，咁咪会升啰。我只能够咁讲。至于升定跌？真系唔知。

问：但佢一上市就收购AI公司Cursor，搞到股东权益摊薄咗，散户好惊㖞。

温杰：收购、并购不嬲都会做㗎，上市前上市后都会做。你话业务冇关连？喺我哋角度睇啫。管理层会唔会睇到将来啲Synergy，我哋唔知㗎嘛。

传统嚟讲，我哋做股东，就系交畀专业管理人员去管间公司。小股东就系信佢哋，你信唔过，咪唔好买啰。上市就系会配股、集资、做并购，系咁㗎啦。

不过尴尬嘅系，啱啱上市就做呢啲动作。但系喺Elon Musk嘅角度嚟讲——上市系一件事，做业务、做并购系另一件事，你怪得佢咩？

你话摊薄，冇得咁讲㗎㖞。

问：最后有冇咩想补充？

温杰：我从来唔敢喺Facebook、Threads留言，真系会俾人闹爆。我个立场好简单：

我当你买，你有一百蚊，可能就买一蚊。升一倍，咪赚一蚊。但我揾到啲安全啲嘅嘢，我可能有信心买五蚊、十蚊。我买十蚊，佢升10%都系赚一蚊。

我只系著重𠮶个“底”——几钱落袋。百分比系冇意义㗎，最紧要系赚得到。

意思即系话，你买SpaceX，唔会买得多。就算佢百分比升得多，其实你冇肉食㗎。

呢啲梗系唔讲得啦。你想玩嘅，控制注码买啦。呢个最正常讲法，会稳阵啲。

#以上观点，不代表本人立场。

#Threads民点讲 #Threads民经济学 #SpaceX #Elon Musk #扑扑“脆”