前情提要：话说我上一篇文——《Threads民讲经｜SpaceX股价滑落　忠贞老散祈祷︰救我们脱离贫穷》入面提到，我近排睇中咗SpaceX，于是上Threads睇吓各路散户朋友有咩高见。结果？

一睇，仲乱过我个户口。经过我连日嚟嘅深度观察（即系碌手机碌到凌晨三点），我发现Threads上面嘅主流意见虽然五花八门，但归根究底，都系围绕住三个门派喺度转：“捞底派”、“观望派”、“信仰派”。

而你，又系边一派？

“捞底派”绝学　“别人恐惧我贪婪”

第一，“捞底派”。

特征：任何价位都系“底”，任何跌幅都系“机会”。

呢派嘅代表人物通常都系Threads上面𠮶啲每次跌市都会出Post话“买入机会”嘅人。佢哋嘅Post或者Comment 通常都写咩“巴菲特语录”或者“别人恐惧我贪婪”。

老实讲，如果佢真系抵买，点解大户唔喺呢个位扫货？因为大户知道，仲有得跌。你见到嘅“底”，只系佢哋眼中嘅“半山腰”。

仲有，佢哋永远唔会话你知佢哋之前嘅“入货位”系几多。因为佢哋嘅操作模式系：由100蚊开始话“抵买”，一路话到60蚊，然后话“平均成本法”。结果平均成本系80蚊，而家股价系60蚊——跑输大市，但跑赢咗自己嘅良心。

呢派嘅金句：“跌够啦，捞啦。”

我信咗三次，三次。而家我户口𠮶个“底”，已经穿到去地壳下面。

“观望派”等运到　命里有时终需有

第二，“观望派”。

特征：永远等，永远唔行动，永远事后诸葛亮。

呢派嘅代表人物通常都系Threads上面𠮶啲每次升市会出Post话“我早就睇好”，每次跌市会出Post话“我都话咗唔好买”嘅人。佢哋嘅技能系——事后分析永远啱，事前行动永远冇。

呢句系废话。等稳定啲先？稳定咗你点知会升？永远等，永远错过。佢哋嘅“等”，同我女朋友话“等我五分钟”一样——永远唔知等几耐。

最惨嘅系，佢哋等到个市升咗，就会出Post话“我一早就睇好，只系冇买啫。”等到个市跌咗，就会出Post话“好彩我冇买”。

呢派嘅操作模式：永远唔会输钱，因为永远唔会入市。但佢哋嘅时间成本，同埋𠮶种“如果我𠮶阵入咗就......”嘅遗憾，可能比输钱更痛苦。

呢派嘅金句：“等多阵先。”

我等咗。等到而家只股由220蚊跌到150蚊——我仲等紧。等紧咩？等紧佢升返200蚊，然后我就可以同人讲：“我一早就睇好，只系冇买啫。”

“信念派”政教合一　 老马喺永恒掌门

第三，“信念派”。

特征：唔睇数据，睇信仰。基本因素系多余嘅，技术分析系呃人嘅，只有“信”先系唯一真理。

呢派嘅代表人物通常都系Threads上面𠮶啲，无论升跌都话“长揸啦”、“相信老马”、“睇淡系你哋悲观啫”嘅人。佢哋根本就系马斯克嘅教徒，大陆个啲比钱就赞你嘅夸夸群，用信念帮老马免费辩护嘅义务律师。

的确，信念可以令你瞓得好啲，但唔会令你个户口好啲。你可以信老马会带你上火星，但前提系你个户口要撑到𠮶日。

最经典嘅系，你话佢知“SpaceX跌咗三成”，佢会答你：“回调啫，特价。”你话佢知“SpaceX发债200亿”，佢会答你：“即系有大动作，利好。”你话佢知“你个户口就嚟清零”，佢会答你：“清完之后，咪由零开始啰，仲有得上。”

呢派嘅信念，同“我一定会中六合彩”一样——科学上叫“赌徒谬误”，情感上叫“揽炒”。

呢派嘅金句：“信念大于基本面。”

我都有信念。我信我户口清零𠮶日，应该会比我想像中嚟得快。

#以上观点，不代表本人立场。

#Threads民点讲 #Threads民经济学 #我在Threads里学投资 #扑扑“脆”#股市门派

#“脆”文“巴菲特”