古天乐演唱会昨晚（22/8）举行尾场，原定唱完《今期流行》后便结束，但现场观众一直大喊Encore，连宣萱及胡子彤都企起身一齐嗌，令全场观众都唔肯走。最后古天乐再次出场，并再次感谢观众的热情︰“你哋太好，真系好多谢你哋！我竟然去到红馆开演唱会。”最后，他选唱张国荣的《风再起时》作结，唱之前更哽咽地讲一次：“多谢大家！多谢哥哥！”

“答应过大家做一个最好的演唱会”

完骚后，古天乐去到后台接受传媒访问，问到完骚后最想做甚么？“开完系有少少亢奋，可以讲去到虚脱。呢一刻最想系畀我瞓一个下昼唔好起身，今日仲攰，个Ending又草蜢又华哥（刘德华），我自己仲要跳，整个Ending长30几分钟，好攰。”

回想筹备演唱会过程，古生就是坚守一个承诺︰“我答应过大家做一个最好的演唱会，7月初开始，我已经每晚凌晨3、4点烦住每一个人，因为我冇经验，只有尽力做到最好。最重要系，你唔可以唔相信自己去做一件事，你一定要相信自己做的每一件事。现今世界，人人都面对不同困难，好好地踏出第一步，做你应该做的事。”

舞台多个装置拉近与观众距离

演唱会上古生有多个环节都要跳舞，甚至邀请草蜢做嘉宾来个大对战，两晚过后会否对跳舞已经上瘾？“跳舞嚟讲系唔会上瘾，你放心。开骚前两个月，同排舞老师跳到３、４点呀阴功，但唔系研究点跳，系点样做到气氛出嚟，我要同现场观众做到一个连系，呢个先系最开心。”

正因为要求跟观众有联系，所以演唱会舞台设计，做到机关重重，令自己无论跟前排观众、山腰定山顶观众，都可以接触到。“呢个系我第一个要求，今次演唱会要接触晒所有人，包括下面同上面嘅观众，唔好净系企喺台度唱歌，一定要接触所有人，握手好，上山顶好，必需要做呢件事，尽量开一个最开心，大家最多接触的演唱会。”

不敢辜负张国荣期望　“点样做好去系好紧要”

演唱会上，古天乐唱了多首张国荣的经典歌，压轴Encore更以一首《风再起时》作结，原来这是古生对哥哥的小小心意。“（工作人员）今日同我讲，最后一场，观众可能想我唱多一首歌，大家冇特别意见，我就提议不如唱《风再起时》，就是哥哥告别乐坛的一首歌。我自己都有一Part唱哥哥的经典歌曲，佢喺我心目中有一个好重要嘅位置，拣唱《风再起时》，系唔知自己仲有冇机会开第二次演唱会，今日系一个暂别，我好想唱呢首歌。”

当年张国荣，曾点名睇好三位新人，分别是古天乐、古巨基及邓一君，结果眼光独到，古生亦承认因此想在演唱会上，多谢哥哥，向他致敬。“哥哥对于乐坛，对于我哋后辈，甚或你问我，佢今日唔喺度，对我哋嘅期望，我哋点样做好去系好紧要。”对于圆了红馆梦，最大感觉是甚么︰“人系需要努力，需要相信自己，红馆畀我感觉系好接近大家，我哋都需要多啲接近大家，多啲听大家的感受去做每一件事。”

难忘32年后跟阿姐唱《热咖啡》　“系无憾！”

两晚演唱会，请了多位重量级嘉宾，包括汪明荃、刘德华，对古生而言，最深刻是请到阿姐出山唱《热咖啡》。“因为阿姐好耐冇唱《热咖啡》，亦是我32年前（入行一年后），就同佢唱《热咖啡》，我伴舞。如果我得一次机会开演唱会，我好想有一个嘉宾喺我心目中，系我当年最好嘅回忆，所以有机会开红馆演唱会同佢唱到呢首歌，系无憾！”

而阿姐工作态度之认真，更叫古生深深臣服。“由开始在启德彩排，到去红馆彩排，佢完全系Full Dress，好认真，每个细节都要知道，会问会倾，真系太完美。”更叫古生开心是阿姐正是妈妈的偶像，今次个唱促成大家一个见面。“我记得第一晚开骚，阿姐好早嚟到，我阿妈坐旁边，我哋三个一齐倾咗半粒钟，因为阿姐系我阿妈偶像。”

至于刘德华，古生表示私下不时有食饭，更经常鼓励自己。“喺我心目中佢领导紧成个圈，对后辈、对乐坛、影坛都系好支持，我好感动。”