关智斌（Kenny）昨日（9日）出席慈善跑活动，除了分享自己的跑步和运动心得，亦谈到好友郑希怡（Yumiko）因被他讲完有双下巴后积极减肥，还有蔡卓妍（阿Sa）被地产经纪在网上大爆租住东半山单位等，Kenny直言经纪有违操守、好离谱。最后，谈到前BOY’Z队友张致恒（Steven）自爆欠债七位数，其中一位债主是Kenny，问Kenny对方已还钱了吗？他非常得体说：“哎呀，我冇为意喇呢啲已经，咁耐嘅事情，咁冇乜记住……你平时同朋友食饭，有时你俾钱先，有时我俾住钱先，我冇特别去记住喇已经。”他透露二人前阵子有联络，亦会给建议，对于昔日好兄弟如今竟然上节目跟梅启明、周永恒等自认“废男”任观众闹，Kenny寄语：“我真系觉得每个人有自己人生嘅课题，有自己人生行嘅路，佢今日行嘅路会带佢去边度，呢个只有佢自己最清楚。”

慈善跑应付5公里无难度　有意挑战全马需半年训练

Kenny出席慈善跑，身形极Fit的他透露当日只应付5公里跑，所以冇问题。被问将来会否挑战全马，Kenny直言想试，现已报读课程测试耐力，又透露：“最长试过跑25公里，差唔多半马嘅行程，我想试吓究竟个全马得唔得，但系如果真系要参加嘅时候，因为我上网睇咗好多片，同埋睇咗好多师兄𠮶啲心得，其实真系唔容易，你起码真系要攞返半年嚟练。可能我之前有练开，打天才波，死顶都十几至二十公里可能勉强应付到，但系真系全马拉松嘅时候，真系要好规律嘅行程去锻炼。”虽然近年积极参加HYROX，但他解释全马与HYROX有天渊之别，前者讲求耐力与技巧，后者则注重爆发力及心肺功能等等。

理解HYROX失禁选手坚持完成比赛：有时比赛好似去咗第二个结界

提到早前HYROX赛事有运动员发生失禁事件，Kenny指新闻铺天盖地，很难注意不到，但自己幸运地未曾在比赛中遇到。对于该选手坚持跑完，Kenny能够理解：“我又有啲明，当其时你肾上腺素喺个比赛入面好投入，因为有阵时比赛嘅时候，你好似去咗第二个结界咁样，你听唔到人哋讲嘢，睇唔到其他嘢，净系专注喺自己呼吸入面，我都好明点解会有咁嘅情况而唔stop，但系依个可能系关乎成个究竟𠮶啲裁判、大会点样处理，可能大家第一次遇见，都未知道应该点去应付呢啲情况，但我谂经过今次佢哋大会沟通咗，以后会明白点样处理呢啲突发状况。”

Yumiko被指有双下巴后勤力减肥　Kenny惊叹其意志力

刚完成广州演唱会的Kenny，感谢Twins及郑希怡（Yumiko）担任嘉宾撑场：“Yumiko基本上佢就系我part of个story嘅其中一部份，我都觉得有少少唔知点算，如果我已经将佢个角色融入咗呢个演唱会入面，咁我系咪场场都要佢嚟呢？因为佢真系要帮我排晒舞，同埋度身订造晒啲衫，𠮶个面具咁样，希望佢成日都会得闲，咁我就可以继续邀请佢。”提到Yumiko近期积极减肥，Kenny透露对方都将会参加运动比赛，又忍不住大爆内幕：“唔知讲唔讲得，第一次见到佢有双下巴。我话识咗佢咁耐，未见过佢有双下巴，我唔知系咪咁样刺激咗佢，佢真系好勤力，而佢𠮶个恒心，系几吓亲我。”他指Yumiko演唱会后依然日食几只鸡蛋兼做3小时运动，意志力非常惊人。

阿Sa住址被地产经纪网上爆料　Kenny批评离谱：系操守问题

至于好友蔡卓妍（阿Sa）近日遭地产经纪在网上发文爆料，指她租住东半山顶楼相连单位，Kenny替好友抱不平：“真系好离谱啰！其实一直都知会有啲咁嘅情况，好似我之前住𠮶啲单位，我记得𠮶时住嘅屋苑，直程𠮶啲朋友同我讲话啲经纪系逐个指呢间屋系边个住，边个住，我觉得呢个去到一个操守问题，我觉得大家虽然都知道可能会咁样做，但系佢好似系上网讲出嚟，如果去到上网讲出嚟，就的而且确有啲……几影响咗其他人。”

Steven自爆欠债七位数　债主Kenny冇为意有冇还：处理好屋企开支先

对于前BOY’Z队友张致恒（Steven）近日与周永恒、梅启明上直播节目自认“废男”，并透露多年来欠债约百万，点名Kenny、阿Sa及林盛斌（阿Bob）是债主之一。被问到 Steven还钱未，Kenny大方回应：“哎呀，我冇为意喇呢啲已经，咁耐嘅事情，冇乜记住……你平时同朋友食饭，有时你俾钱先，有时我俾住钱先，我冇特别去记住啦已经。（记者：系咪都唔预佢会还钱）还钱，我觉得不如等佢自己处理好佢自己嘅嘢先，因为我知佢好大开支，我觉得不如等佢处理咗，佢哋屋企嘅使费开支先。”得知Steven拖欠近万元电费时，Kenny略显惊讶：“咁多！系咪积埋积埋咗呀？”并续说：“佢咁大个仔，我相信佢识得点样去处理㗎喇，希望佢继续学好啲理财啦。”

前阵子仍有跟Steven联络　曾给予建议但不便公开

被问会否帮手解决财困，Kenny透露：“其实我有同佢讲过一啲suggestion，不过呢个我觉得留返我哋私底下，我哋自己，我觉得点样俾一啲提议佢或者点样处理，因为其实牵涉好多嘢，呢啲真系好抱歉，我未必想喺好公开咁样去讲。我觉得唔系净系钱系唯一一个办法，点样开源或者节流，我都可以俾到啲意见，我会私底下同佢讲。”他透露前阵子有联络对方，过时过节亦会传送讯息祝福问候。

Mani指Steven是最麻烦艺人　Kenny不介意执手尾：互补啫

对于经理人霍汶希（Mani）近日与Kenny等做节目时，直指Steven是最难凑、最麻烦艺人，要动用公司资源派司机逼他上学，还要Kenny扮他表哥送他到学校，但车从前门进学校，转头Steven就从后门走人，根本无心向学。问Kenny当年是否常常都要出手帮Steven，他表示当时没多想，认为作为队友是互相补足：“其实我又唔觉得系要帮佢而做好多嘢，始终𠮶时大家系拍档，我帮佢时，其实都系帮我自己，边个能力喺边方面强啲，就边个去做𠮶样嘢，边个人照顾人强啲，边个喺演出能力比较强啲就会去互补，所以冇话边个一定要take care边个。”被问Steven是否公认最麻烦，他笑言每个人都有麻烦之处：“其实我哋个个都麻烦，如果攞20年嚟数，其实每个人只不过系唔同麻烦嘅方面嘅啫，我谂Mani都领教过唔少。你话边个最麻烦，我真系唔识答你，只能够讲，喺呢方面，关智斌系最麻烦，可能阿Sa系最麻烦，只可以咁讲。（记者：你最麻烦系咩？）除咗太靓仔之外，我真系谂唔到，哈哈。”

昔日队友上节目自认废男任闹　Kenny：每个人有自己课题

看到昔日与自己一齐出道做偶像的队友，如今要跟上节目自认“废男”被网民辱骂，问Kenny会否很心悒，他坦言：“我真系觉得每个人有自己人生嘅课题，有自己人生行嘅路，佢今日行嘅路会带佢去边度，呢个只有佢自己最清楚，所以我作为一个朋友……唔知点解人越大个，就越唔想介入喺人哋生活入面，每个人佢自己想点样行佢嘅路，系佢自己嘅抉择，我都只能默默祝福佢。”