本地著名DJ Frankie Lam于上月专栏分享了他成为DJ的故事及昔日的回忆。在访问推出后，Frankie表示内容勾起不少旧朋友昔日的回忆，在此感谢各位拜读。Frankie在本地DJ圈活跃多年，经验丰富。本月专栏将聚焦他DJ以外的身份，以及经过多年洗礼后，他对待打碟的心态有何转变。再次感谢Frankie的无私分享。

香港DJ专访｜自香港Rave年代活跃至今的著名DJ Frankie Lam（上）

波盛：咁多年嚟有无因为DJ依个身份，令你涉猎多咗呢个行业嘅唔同范畴呢﹖

Frankie：呢度正呀，我有几个身份。以前我𠮶个老细因为某啲情况上咗大陆发展，但系你知请DJ或者Artist过嚟你要畀几个站佢㗎嘛。佢冇理由英国飞过嚟，得你香港打完飞返返去㗎嘛。如果你可以话畀佢听，呢一个系你个亚洲Tour，你打完香港，你打深圳，打完深圳打上海，再穿多个韩国或者泰国或者日本，咁你咪有十场啰。咁价钱就可以商宜啲，呢个系好正常嘅事。

当我以前个老细上左大陆，香港就真空咗，咁佢有嘢要帮手就揾我，揾我喺香港做佢个分支。跟住我慢慢开始整埋啲设计，学点样整靓个Event，开埋自己嘅 Label。

波盛：𠮶段时间你邀请过啲咩DJ嚟香港打碟系觉得正﹖

Frankie：好多呀真系，譬如Sasha、 John David𠮶啲就系我揾。我仲可以透露畀你听，𠮶阵时我请Armin van Buuren过嚟，我都唔使五万蚊，你而家揾佢五十都唔得呀，我请过佢嚟三次㗎喇。Deadmau5知唔知边个﹖Deadmau5其实嚟过香港有无人知﹖就系我请佢嚟。可惜我地行得太前，佢喺世界已经去到几劲下𠮶阵，香港都唔系太多人识。𠮶阵个场地系旧嘅California Tower，其实地牢系有个好细间嘅场，𠮶个Party我谂装三百人倒㗎咋，跟住Deadmau5就喺𠮶度打。

不过呢啲大名我又冇乜感觉，以前对太多依啲大名，后尾转咗请啲细名嘅DJ。反而我想讲就系日本嘅Kentaro，一个Scratch嘅DJ，神级，我好开心请到佢嚟。跟住日本两个Scratch DJ，一个叫Hi-C，一个叫Yasa，好劲㗎。我好钟意睇啲Scratch嘅DJ去打碟，真系好好睇。当然Rave𠮶啲又另外一样嘢，𠮶啲系听歌。但系技巧性加埋啲歌好听，Hip Hop、Scratch DJ 都好正。

波盛：你话由最初请大名DJ到转为请细名DJ，点解会有依个转变﹖

Frankie：2000年代接待太多好大名嘅 DJ，我觉得佢哋好老土。佢哋可能因为开始升价，又唔知关唔关殖民地事，好多英国DJ我都觉得比较高傲。所以凑佢哋唔好玩，真系好似凑住一个Artist，佢要咩你畀咩佢，佢要食咩你带佢去，𠮶个音乐交流嘅感觉我已经觉得唔多喇。

电子音乐喺香港𠮶个流行程度呢，喺1998年、2000年好兴英国DJ，我唔知系咪殖民地嘅关系。大约2010年开始，除咗英国以外嘅Techno、House，多咗好多人听法国、德国嘅DJ，我觉得香港就开始真系百花盛放喇，就接待多咗德国DJ。我发觉𠮶啲劲嘅德国DJ佢哋好Casual。我有一次唔记得咗去机场接佢哋，佢哋 Casual到自己搭车由机场去到酒店，自己Check-in 埋。佢地唔会嬲，Casual到好似你身边嘅朋友。去食饭反而佢哋要求食啲好地道嘅嘢，跟住讲好多香港𠮶啲得意嘢，或者交流音乐多啲，唔系好似照顾紧一个超级巨星咁。

波盛：啱啱你有提到开自己Label，𠮶阵系有咩契机促成﹖

Frankie：因为𠮶阵照顾啲大明星照顾得多，我就觉得好攰，我唔想再好似擦鞋仔、跟班咁照顾佢地，然后我机缘巧合之下认识咗一个日本人。𠮶阵时尖沙咀诺士佛台有间酒吧叫Bahama Mama’s，我嘅好朋友阿Ming就喺𠮶度打碟。有一日去到佢突然间话：“喂 Frankie！ 呢个日本仔傻傻地㗎，佢好钟意Techno㗎，佢系日本Techno DJ，介绍你识吖，你哋啱倾㗎喇。”佢个外形就系好瘦嘅，有少少宅嘅，著窄身牛仔裤孭住个腰包喺心口。倾咗几句，大家总算沟通到。因为可能我性格都钟意倾计或者结识朋友，有个游客嚟到咪睇下有乜嘢帮下忙啦。熟落咗之后佢话想喺香港打碟，我话：“好吖！嚟吖！我Setup个Event一齐打吖！”因为个阵时我要Setup一个百几二百人嘅Party，有人嚟玩、Full House好易㗎咋。

而当时香港其实有好多劲嘅 DJ，冇人识冇人理，我有啲觉得唔甘心。跟住我同日本仔话：“不如咁，我地自己玩咯！”点解咁多日本DJ咁劲、咁叻冇人识出唔到国，嚟到香港冇人识佢﹖点解香港呢啲咁劲嘅DJ冇机会出国﹖𠮶阵时讲紧2000年松啲，唔同而家，而家就多啲渠道啦。于事我哋就开咗一个Label叫 Intermix，就专Promote日本DJ嚟香港打碟，亦都Promote香港DJ去日本打碟。

当然我哋要有呢个能力。日本DJ你请咗佢过嚟，真系唔识㗎香港人。除咗你话石野卓球依啲真系殿堂级嘅香港人就识，有啲都好劲嘅一线DJ都未必识㗎。咁我就要花多少少气力喺香港话畀𠮶啲Raver听“喂！依个日本DJ好听呀！”我哋就维持咗呢个Label都十几年，所以由二千年到二零一几年日本劲嘅DJ其实我都真系请晒过嚟㗎喇。而啱啱今年2月我哋就庆祝咗Intermix嘅20周年，我𠮶个日本朋友因为19年𠮶啲事件就返咗去。啱啱20周年我就邀请佢返嚟喺我个酒吧玩咗一晚。

另外中间我仲有一个自己成立嘅 Label 。我同两个澳大利亚人就喺香港一齐玩，最初个Intention就系“点解香港礼拜四冇野玩，冇得听Techno冇得听House﹖”咁我哋三个人就揾咗一间上楼嘅Bar，喺中环以前Volar楼上，依边打台波𠮶边就系Bar嚟，逢礼拜四就喺𠮶度打我哋钟意嘅歌，等啲人有地方去。慢慢越做越好就成立咗个Label 叫 Push，演变得越嚟越好我哋就开始有Budget去请多啲我哋钟意嘅Artist过嚟。

波盛：其实打碟打咗咁多年，又已经玩过咁多地方做咗咁多嘢，有无曾经觉得有少少攰想抖吓﹖

Frankie：呢个就系一定要讲。我以前喺湾仔打过Commercial音乐，跟住而家兴起广东歌，咁广东歌一定系 Commercial 啦。Commercial 同 Rave 嘅分别系咩呢﹖Commercial 就系商业音乐，你唔好理佢中文歌又好英文歌又好，你就计以前兴打Black Eyed Peas、50 Cent，其实一晚你唔可以离开个框架好远。某啲歌啲人一定要听㗎，差在你点样运用佢。即系而家一首《心急人上》，如果你唔用脑思考，你打四个钟头Event你可以打四次㗎，就要睇下你点样安排，但系个框架你走唔甩，你唔可以打咗首唔知乜嘢嘅中文歌出去。

所以打商业音乐对于我个人嚟讲或者对于几多人嚟讲好快会闷，好快会变成开工。打Rave就唔系，打Rave系你完全控制晒所有嘢，每个礼拜反而唔想重复，我唔想同呀边个边个一样。上个礼拜打咗，我今次要带好多新嘢畀啲人。有人听到有一两只经典嘅歌会开心，但系佢哋亦都唔会Expect你打好多旧嘢。所以打Underground音乐打Rave你可以尽情发挥，你品味好嘅你反而系教导紧好多人，呢个先至系DJ嘅职责，DJ要带新嘢出去㗎嘛。而家呢个精神好似畀人慢慢忘记咗。

呢个亦都系锻炼嚟。我就系经历咗𠮶啲叫做“睇住个场嚟打、睇住个人嘅气氛嚟打”𠮶阵时做𠮶啲湾仔场有睇场㗎，你一有乜依郁打一、两只歌唔好听，舞池啲人走，佢真系埋黎笃住你个头闹㗎。我试过初初去湾仔做，晏昼喺张床瞓瞓下醒咗，冲出去客厅部Hi-Fi度揿熄架机，但根本冇开过。因为我发梦喺𠮶啲湾仔场度打打吓碟，停咗音乐，好惊畀人闹呀。

波盛：依啲经验会唔会影响你而家营运自己间酒吧嘅方式呢﹖

Frankie：而家我自己间酒吧就将我以前𠮶个工作嘅定律摆返喺度，其实我成世人都系咁。以前就算我有啲知名度，有一个地方想请我一个礼拜超过四日留喺度打碟，我唔做。因为我唔想日日对住𠮶班人，日日𠮶啲歌，咁会变为厌恶。喺呢个场可能我做一日，喺𠮶度做两日咁样，成日见住唔同嘅嘢见住唔同嘅人可以播唔同嘅歌，令到我每一次都唔会话好似刻板式返工放工咁。

演变到而家我有间酒吧，就好怕𠮶啲员工冇朝气或者系机械式返工，所以我要佢哋全部人唔会返多过四日。你一个礼拜可能返一日两日，你落到嚟你会觉得兴奋开心，“今晚我去开工呀，边个嚟探我呀﹖”同埋有优越感畀到你，你企咗喺间Bar度，你觉得自己系有型嘅。所以我成日返工都好开心，Even打碟或者返自己酒吧都系。

波盛：见到你而家都忙于打点酒吧嘅嘢，对打碟嘅工作邀约有冇需要取舍﹖

Frankie：有。因为COVID之前我仲系经常活跃喺中环打碟维生，Arrange Event、音响之类。过咗𠮶三年之后，咁啱我又100% Take Over咗我原本间Bar，咁忙于处理间Bar啲嘢之余，我又唔想好似以前咁样为咗生计打碟。我做Full Time DJ果阵时好羡慕某啲DJ，我叫佢做“打风流碟”。即系你原本有份工，跟住一个礼拜或者一个月可能一、两次出去打碟，好开心个满足感好大。我都好羡慕呢啲人，但系当然佢地又唔够我地专业。

COVID之后多咗喺自己间Bar，同埋如果我礼拜五、六出咗去，间Bar无咗我会争啲。而我喺自己个Bar度我想打，我随时Set Up套嘢就打得，啲人仲好开心。我想转变下模式，就唔系唔打，而系少啲，我就定咗三个原则俾自己。一，多钱；二，帮朋友； 三，𠮶个Gig好好玩。但系真系好多朋友要帮，开咗间日本酒吧好多行内嘅人知道Frankie除咗系呢间Bar嘅Owner之外佢亦都系DJ，有某啲日本餐厅佢哋开亦都问我可唔可以过去帮下佢哋手。

波盛：而家都有好多人对 DJ 好有兴趣，以你嘅经验你有啲咩建议畀佢哋﹖

Frankie：行啦！因为而家门槛太低，二千蚊嘅All-in-One Controller已经可以玩到，唔系用坏手势𠮶啲嚟㗎㖞，仲可以Connect埋去电话，所以唔好睇到咁复杂。你睇呢样嘢系一种生活态度，好多日本杂志佢啲屋企都有套唱盘喺度，咁𠮶个唔一定要系好劲嘅 DJ 嚟，佢系一个好容易玩到嘅乐器。又唔使话好高门槛，你要弹结他你要上台，你冇五年都唔使旨意。

但打碟嘅乐器你随时可以玩，玩得好玩得唔好你都过瘾，第一步入咗嚟先。而家𠮶部嘢，仲要咁细部又悭位又平，唔玩就真系蚀呀！Even玩嘅门槛都容易，因为太多功能可以令到你可以做到一个简单嘅混音，同埋上网咁多片睇，仲有Sync呢个掣，你揿咗你就无敌㗎喇哈哈哈。

波盛：初学就尽量唔好揿而个掣啦哈哈。其实而家啲器材、揾歌方法同以前打黑胶相比方便咁多，你点睇﹖

Frankie：我系100%打黑胶出身，打黑胶对我嚟讲其实系一件好理所当然嘅事。有个笑话就系我哋以前嘅DJ用个Headphone可能一年半载就会烂，以前你系要不断夹住佢，因为啲歌会唔稳定，个Beatmatch会离开，你要不断喺度掂吓掂吓只黑胶，戴吓除吓个Headphone，所以好易烂。而家啲Headphone就用好耐，基本上你用嚟听一听下首歌开头系点样就可以放低，你唔使点戴。有啲仲唔用㖞，系咪好夸张先﹖Headphone都唔使用，你点知下只歌系咩﹖

而家去到有得Sync或者睇数字，我唔会闹呢啲功能。反而系如果你用一个好劲嘅器材，譬如 CDJ-3000 或者 Serato，你都系玩紧两只歌，一只Mix一只就冇乜嘢喇。我唔会话你差，因为可能你系呢个Style嘅DJ。但系如果你有得选择，你系要用呢一套嘢，你就要用到比起你得两个唱盘要劲，用𠮶啲功能系两个唱盘做唔到嘅。例如四只歌一齐播、落好多effect、呢度又Sample啲嘢或者用而家好兴嘅Stem或者Loop。你用尽呢啲嘢咁样行，我就觉得你对得住呢套嘢。你要求到部机好劲，但系你冇用佢𠮶啲功能咁就嘥咗。

波盛：最后一个问题喇。虽然而家打碟嘅门槛低，但系佢始终系一门艺术同专业。有冇一样嘢你希望想打碟嘅人或者钟意打碟嘅人唔好忘记嘅呢﹖

Frankie：尽量都试下Scratch，Scracth真系好独特代表到DJ依样嘢。因为你做一个Live Set嘅表演，你冇DJ Set你都做到㗎，你用个电脑都做到。但系Scratch真系净系DJ先至玩到出嚟，依个系DJ独有。