Gin Lee李幸倪一连两场的《READY FOR GIN LEE LIVE IN CONCERT HONG KONG 2026》演唱会昨晚（8日）尾场，完骚后Gin Lee接受访问，坦言绷紧了半年，每一日都在想著演唱会，这一刻终于顺利圆满地完成，绝对松一口气，同时十分亢奋，下一步她希望可以有机会开巡回，尤其回家乡马来西亚：“好多马来西亚嘅fans问我会唔会会返去开show，我好想走全世界！因为呢个show筹备咗大概半年时间，都系好多单位好多人嘅心血，亦都系我储咗八年、好多唔同嘅经历嘅一个show，我希望可以继续去分享。”

Gin Lee演唱会｜剖白女艺人辛酸曾瘦到坐唔到　与炎明熹师徒合唱

Deep V开到肚脐吓亲自己　自爆游水著一件头：阿妈话过关

今次演唱会共有七套衫，打头阵的一套黑金战衣已十分性感，Gin Lee笑问：“得唔得呀？收唔收货？我惊大家叫回水，个poster影到咁，个期待值应该去到天咁高！”她指自己并冇特别要求性感，不过同事们就很兴奋向设计师说：“佢可以sexy㗎！”她一见到Deep V低到肚脐都吓一吓，但仍然接受挑战，不过就表示：“其实大家知唔知，我游水都唔会咁样著？我著开连身𠮶啲、劲实际𠮶啲，好似好叻游水𠮶啲人咁。我著𠮶啲泳衣㗎平时游水！我唔会着三点式㗎，我怕羞呀，而家突破咗自己。”她说开骚前都特地畀心理准备家人，但由于妈妈年轻时都是一位会打扮的靓女，所以她觉得对方应该经得起考验，“佢哋好开心，㖊日第一日完咗show之后，佢哋都即刻message我，‘Proud of you’，所以应该OK，过关。”

歌衫达40磅　一著上身即寒背心口痛

讲到会否需要为著靓衫减肥，Gin Lee直言要减，自己对身材有些焦虑，总觉得不够，但想瘦的同时运动量又很大，加上她去年起食素，所以都要不断找平衡，每一日要同营养师、教练调节，感叹：“做女artist真系唔容易。”今次其中一套红色歌衫达40磅，Gin Lee表示好重，试穿时更重到令她寒背：“红色𠮶套其实有三个layer，总共我谂都有40磅，因为𠮶件褛系要上好多好靓嘅闪闪𠮶啲珠，其实每一个都好重，所以第一次fit，一摆落去我就……个心口好痛，唔得唔得，我仲要唱《Falling》，有冇办法可以减少少啊？跟住佢哋就话‘得得得帮你搞’，睇吓有边度可以减少少，就减咗少少珠。”

跳舞跳到有“妈妈手”　痛到冚唔到被

Gin Lee又在台上透露自己要见治疗师，因为跳舞受伤：“你睇好多好sexy嘅动作，其实每一日返到屋企就系要去放松、拉筋，有时一完咗排练即刻去针灸，又好多嘅嘢要去做，其实我而家攞住呢啲咪我个手都好痛！”记者即笑问工作人员为何不帮手揸咪，Gin Lee立即笑说：“唔系唔系，唔系俾说话你哋听， sorry唔系咁嘅意思！唔好误会我！”场面搞笑。讲到敷高丽菜消炎的偏方，她竟自爆原来患“妈妈手”：“我排舞，突然间有一日我冚唔到被，大家有冇试过呢个感觉？我瞓觉冚唔到被，点解我只手发唔到力？原来系传说中嘅妈妈手，但系我系唔使凑BB 㗎嘛，咁我就问治疗师点解会有妈妈手，佢话会唔会系你跳舞啲动作呀？我话我真系唔知道，应该因为我左手揸咪右手做动作，全部动作喺右手，平时唔会系咁用只手嘅肌肉。好惊呀！冚唔到被呀大佬！郁唔到，黐线！”Gin Lee又指旁边只得猫猫杏仁糊，冇人帮自己冚被，每日回家跟猫猫说“妈咪好攰，可唔可以锡吓我？”但猫猫都只是呆著望她，不作理会。

歌曲加插已爱猫叫声　感叹失去是共同语言：想畀安慰大家

讲开猫，其实Gin Lee唱到《开灯熄灯》时都加插了芝麻糊的声音，她表示：“因为首歌系我写畀佢嘅，佢走咗之后我就写咗首歌送畀佢，我好少唱呢首歌，但系我觉得呢一个演唱会，都系我好想分享好多内心世界嘅嘢，同埋真系呢八年经历好多嘅故事，放咗入去，跟住我就同导演讲，我哋要放佢嘅声音喺首歌嘅结尾，跟住出咗段字都系我写。我喺个show都有讲，我发现失去系每个人嘅共同语言，共同经历，所以我希望畀到啲安慰大家。”

首开四面台冇方向感　取消千秋环节因想兼顾全部观众

今次首度挑战四面台，问到是否有很多地方要兼顾，她坦言实在很难：“我本身方向感都麻麻地，去完厕所出嚟都唔记得条路，我系咁样㗎！所以四面台最大嘅挑战就系有啲跳舞嘅动作系同dancer一齐，一转完圈，喺边呢？一转完唔知去到边度，我话我真系唔知喺边，你哋要guide住我，同埋高踭鞋系咁转圈其实都好晕，有时转转唱唱唱，一开眼，我而家喺边？好多moment，我都同自己讲要冷静啲。”谈到首场唱《月球下的人》有坐千秋上半空环节，为何第二场取消了，Gin Lee指碍于红馆规例和负重，千秋不能360度转，首场后她还是希望能照顾到四面观众，所以宁愿走近他们。

赞炎明熹大个女淡定咗　私下不时关心：我哋都唔易示弱

最后讲到嘉宾，头场是《全民造星VI》B3组学员Teller、毕佬、Yip Sir、Larry、Tuzero及绍冠，尾场是《声梦传奇》学员炎明熹，Gin Lee指之前都有考虑要不要请嘉宾，最后觉得还是一齐玩更开心，觉得B3组比赛时做了很多好好的作品，已不停思考有什么可以一齐夹，最后选了很少唱的《Goodnight》：“我觉得好啱佢哋嘅vibe。”至于Gigi，她指对方是自己很锡的妹妹，问到从《声梦》到现在再见到对方有何感受，Gin Lee表示：“佢淡定咗好多， feel到佢大个咗，成个人大个咗，唱歌又叻咗，但喺我眼中都系𠮶个小妹妹，都系差唔多，佢畀我嘅感觉。平时我哋倾偈佢都系keep住就系咁，就系大家见到嘅一个状态，成日要撩佢讲嘢，间唔中都要关心吓佢，因为佢唔会太过主动去……其实我同佢好相似，唔会好容易去示弱，有心事都自己处理，所以会特别关心佢，‘呢排点呀？有冇压力呀？瞓唔瞓到呀？’跟住会send啲冥想video俾佢。”讲到Gigi上台时耳机是否有问题，Gin Lee透露自己都有问对方，若耳机有事，自己可即刻去后台帮她处理，但Gigi说“冇嘢”，不过Gin Lee仍十分细心叮嘱工作人员要留意其耳机：“有时四面台系会有啲回音，系有好多嘢要adjust，我一路行去唔同嘅位嘅时候，都听紧唔同嘅嘢，要执生。”