许志安将于10月8至10日在红馆举行三场个人演唱会《ON STAGE》，也是他相隔11年后再踏红馆舞台！今日（6日）他拍摄海报，期间接受访问，指今次不论造型与布景都以简约为主，他透露影海报的是白背心造型，背景也选用沉实灰色，表达回到初心主题：“呢个setting就系用一盏光嘅灯喺我头顶上面，冇华丽嘅衣服，我就系着住一件背心，企喺度影。好想带出嚟嘅系，虽然系一盏光管灯，但系只要有聚焦嘅能力嘅话，都可以发光发亮！”他坦言三场制作费有限，但觉得用心唱好每一首歌就够。

入行40年歌单大伤脑筋　档期紧逼难加场：最紧要口碑、信心

今次演唱会主题《ON STAGE》由安仔跟公司同事一同构思，他说：“公司觉得《ON STAGE》好好，因为公司嘅朋友觉得我应该系属于个台，所以‘stage’呢个个名好啱，好似想呢个舞台发光发亮，所以我都好钟意。”今次演唱会适逢安仔入行40周年，他对拣歌也十分烦恼，要精挑细选30多首歌，的确要做取舍，但他有信心演唱会会好睇！红馆档期一向难申请，所以他知道“一击即中”都非常开心，更紧张到失眠，已密锣紧鼓构思如何呈现自己想法，安仔提到上次演唱会已是11年前，去年BIG FOUR演唱会如像热身，今次他则会好好把握机会。安仔表示由于档期紧逼，完骚已要拆台，相信加场机会不大，但贵精不贵多：“场数对于我嚟讲，真系唔重要，最紧要系口碑、信心，啲人睇完之后会觉得好多回忆，场地所限就三场啦，我好满足。”

问到万一销情理想，会否考虑Plan B，他不讳言未谂到：“前面加场都系应该唔得，搭台要时间，我哋唔可以因为……如果啲飞好好，而我哋就快啲搭咗个台，唔得，唔可以，一定要搭得好好，做得好好！有啲人话第一场大家都当系彩排，但系我唔系，我好认真，所以𠮶场就要做到最好！（问：尾场系星期六，会考虑加日场？）我得唔得㗎 ？即系要唱六个几七个钟？我而家好少做嘢做七个钟，呢个算唔算plan B呢，真系唔知。”

跑街操弗被街坊集邮　自嘲无人想睇腹肌拒绝赤膊上阵

安仔透露会为演唱会加操，近期练跑还结识了不少新跑友：“跑跑吓嘅时候，都有啲人话可唔可以陪你跑几个圈，会有呢啲朋友仔。我以前都会着返件T恤同佢哋影相，而家就话‘好呀，快啲影。’都冇特别著衫，下一次我带埋以前𠮶啲碟去同佢哋签名，好开心，好似新嘅朋友，呢个都系能量之一。”当被问届时会否在台上除衫骚肌，安仔笑言：“我觉得冇乜人想睇，但系我反而觉得，有人想见到我为咗呢个演唱会有几多付出，但系冇人想睇我啲肌肉，不如乖乖地跳好啲舞、唱好啲歌，感动人，好过见到我啲腹肌。（问：除衫更加睇到你付出）睇到我嘅付出嘅，买件细码恤衫咪觉得好似好大只啰！”他直言以前开Show会“大解衫”，试过赤膊上阵，但现时怕冻，著背心可能要著棉袄背心。

受张卫健启发会认真思索嘉宾名单：要有意思同回忆

前年太太郑秀文（Sammi）开红馆演唱会时，安仔每晚驻场合唱《世纪末烟花》 ，被问今次会否邀请Sammi，他表示：“张卫健有一次同我讲，我同佢分享我10月有演唱会，佢就问我今次会唔会请嘉宾，我就谂一谂点解你会咁问呢？（问：佢想做？）其实佢绝对唔系想做，佢真系话觉得许志安咁多合唱歌，应该揾一啲好精嘅嘉宾，佢亦都会讲，你都唔系开好多场，所以要有意思啲，令到我真系同佢打完波之后，我真系谂，系应该要有，可能唔止一个，可能会有一啲我好想请嘅，或者有啲我好尊敬嘅，或者我觉得好有意思嘅嘉宾，但系我真系未谂到，我会好认真去谂！”至于会否邀请郑秀文、叶德娴，安仔就再说要认真构思，并谓：“有好多可能性，有好多我好欣赏嘅，所以亦都有一晚有唔止一个，但系我得三场，真系要好认真咁谂，因为我请得𠮶个一定系好有回忆性，我又真系未谂到，惊乱咁讲。”

孖AK、Alton跳唱反应佳　大赞后辈仅1小时学识跳《翻腾》

日前安仔现身《CHILL CLUB推介榜 年度推介25/26》担任表演嘉宾，与MIRROR的江𤒹生（AK）、王智德跳唱《翻腾》及《Rebound》，得知外间反应很好，他非常开心有冲劲，觉得三位的化学作用很融和，他说：“好似建立咗一种信任，又或者系一种大家好用心结合咗去做一part跳舞，我最开心系我同公司讲，我send俾同事，我话好开心，因为喺做嘢过程当中，依一个礼拜我好开心咁排舞，好开心返去冲凉，好专注咁去做呢件事，呢样嘢对于我嚟讲好舒服，倾吓偈，讲吓对啲乜嘢有咩睇法，钟意听咩歌，有咩兴趣。”安仔透露自己有听过两位拍档的歌，感觉舒服，尤其觉得两位后辈很有礼貌，并惊叹：“佢哋好劲，我跳舞𠮶part，之前《翻腾》我都有跳过， 都跳咗成个月，见到佢哋跳咗一个钟就识咗，好劲！好有礼貌，好开心，令到我年青咗，59岁都变咗49岁！”

今次安仔跳足7分钟，状态不输dancer出身的MIRROR成员，同时令很多Gen Z发现他原来如此跳得，安仔谦称：“都系嘅，我唔系话我跳得，我有个朋友send俾我，佢话你知啦，我系你朋友啫，我都未必睇过你跳舞㗎，我咁后生。第一我系唔跳得，我系将勤补拙，我系搏命啫，第二就系觉得最紧要𠮶个化学作用，所以除咗今次依个合作比我一个好大嘅回忆，同埋我觉得比我好大嘅能量，识咗两个朋友仔之外，我觉得应该系要每一个商台嘅机会之前去准备同埋专注，都应该要好似同佢哋合作𠮶份心情，因为而家确实舞台越来越少，所以更加珍惜。”

预告与Jer有音乐合作　赞现今歌手超强：同佢哋参加比赛攞唔到奖

除AK、Alton外，安仔也将会跟MIRROR的柳应廷（Jer）有演出，他说从去年BIG FOUR演唱会，到推出新歌《信天翁》跑宣传多了很多演出机会，一切都十分感恩。谈及阿Jer，他赞对方有造谐、歌声有个人特色：“听佢把声就觉得有啲我以前嘅歌可以sync到，𠮶晚喺后台见到佢演出，我听到佢唱，觉得好正！我已经谂到有只歌可以同佢玩，好期待呢个音乐上嘅Crossover，亦好希望好似今次咁，好融和，喺音乐上有啲火花。”

安仔欢迎任何不类型的合作，只要idea好，不论音乐甚至舞台剧他也乐意去试，问到有没有特别欣赏哪位新生代歌手，安仔说很难指明任何一位，因为很多都很厉害：“而家每一个歌手佢揾到自己特色之余，唱歌嘅才能同埋技巧，我有一日谂，如果而家嘅歌手去参加以前我哋𠮶啲比赛，我基本上攞唔到奖！有咗internet之后，佢哋唱歌嘅技巧全部好犀利，同埋佢哋听好多歌，令佢哋音乐嘅造诣好阔，所以佢哋唱出嚟已经好有自己风格，我讲唔出边一个系特别好，我只系觉得佢哋个个都有唔同感觉。”