麻雀乐团｜郭柏妍自揭全日唔敢望庄易羚？一家三口温馨合奏超催泪
麻雀乐团｜《强人》系列金牌监制罗永贤Marco、伙拍其最佳拍档黄伟强编审的《麻雀乐团》，8月25至29日周一至五晚八点半翡翠台播出结局周。8月26日播出的第22集相当催泪，久哥（谭俊彦饰）与家明及亡妻沈盈（庄易羚饰）隔空上演一幕超感人的“一家三口温馨合奏”。
来到结局周，《麻雀乐团》人情味出晒嚟，8月26日播出的第22集更是相当催泪，更获网民推为本年度神剧：“好耐冇试过追剧，呢套好正”、“无线拍番啲地道小品就好好睇”、“呢啲小品真系特别好睇”！事缘麻雀馆牌照问题令久哥（谭俊彦饰）与女儿家明（郭柏妍饰）吵大镬，家明为拯救大龙凤，甘愿放弃到北京发展机会，但家明的心意遭为女儿前途肉紧的久哥极力反对，久哥更因赌气险些放弃前往欣赏家明与港湾乐团的第一个正式演奏会……幸好最后久哥抓紧时机飞奔到会场，并与家明及亡妻沈盈（庄易羚饰）隔空上演一幕超感人的“一家三口温馨合奏”，除了对白超感人、演员演绎够真挚到位，加上唯美又用心的拍摄手法，绝对是结局周、甚至全剧高潮所在！网民：“我又感动到流眼泪了，上一次系认老豆……”、“估唔到我几十岁麻甩佬可以睇无线剧睇到喊。”而郭柏妍的晚装演奏Look，亦大获正评：“郭柏妍个look咁靓得唔得架。”
8月26日的第22集中演奏会除巧妙地衔接回第一集的剧情，还呈现了极华丽及盛大画面，除了为数40人的管弦乐团成员，还有现场数百名观众，令网民叹为观止：“咁多临时演员？”对此，谭俊彦Shaun接受官方访问时，坦言场口拍摄认真:单是拍摄前的彩排，也花上整整一天，并感激HKAO（香港业余管弦乐团）谓：“佢哋好好，佢哋好配合咁著晒西装、当真嘅演奏会咁彩排咗一日。”谈到“一家三口合奏”，Shaun指当时大家都很入戏：“其实上到台𠮶刻，都系两Take就完成，因为大家都已经好入戏，呢场戏系最后𠮶几日拍。”
由于钢琴版《与我常在》代表著久哥与沈盈不受时间、距离甚至生死限制的爱情，故在结局周将一再出现，第22集Shaun演奏一幕，不少网民更以为Shaun真的会弹钢琴，但其实Shaun是为了《麻雀乐团》才学弹《与我常在》，而为了配合密集式的弹奏特写镜头，阿Shaun开剧前苦练《与我常在》足足三至四个月、并持续每日练习一小时。剧集开拍后，阿Shaun亦有keep住练习，连拍摄现场的道具琴也不放过，相当专业：“（有冇计过弹咗呢只歌几多次？）真系多到计唔到喇。其实最难都唔系挑战弹琴，系要边弹边做戏，只手要有好多肌肉记忆、对只歌熟得好紧要先得，咁样个脑先可以（available）应付对白同情绪戏，所以对我嚟讲一路弹琴一路做戏都系挑战。”
Rosita则坦言拍摄“一家三口”戏份前已感动到想喊，更因此全程不敢望“妈咪”庄易羚：“我记得我系由返到公司，到化妆、整头，到出去拍，我都系唔够胆望住沈盈...因为我一望住佢，我就会好心悒、好唔开心，因为真系好唔舍得妈咪！所以拍𠮶幕戏时，我其实都唔系好hold得住啲情绪...𠮶吓我代入咗个角色，见到爸爸妈妈喺远处弹住琴望住我，我嘅感觉就系自己、喺唔同嘅时间，都有一个好亲嘅家人陪住自己……所以我真系好钟意呢幕戏，由剧本到情境...呢幕戏喺我嘅脑海入面留下咗一个好重要嘅回忆。”并谓拍毕《麻雀》后多了反思：“我会谂如果家人唔喺身边...咁会点呢？𠮶种唔舍得、𠮶种珍惜，都令郭柏妍上咗一课。”
第22集Ending，不但时间点去到了一年后，久哥结尾的一句：“沈盈，我系咪弹得愈嚟愈好呢？每次我挂住你嘅时候，我都会弹呢首歌，因为我知道你一定听到。”加上第22集众人还开心地拍了全家福，令不少网民感叹甚有大结局Feel，并好奇余下三集的发展，对此监制Marco给出重要贴士：“其实最后三集都仲有好多嘢发生架，剧入面嘅角色会继续遇到大大小小嘅波折喇、继续会有啲温馨甜蜜嘢喇，同埋会有条硬线发展出嚟，系关于麻雀行业嘅危机同埋传承，喺呢方面除咗久哥同铁姐会面对好大嘅挑战同困难。另一个重点，系宗叔喺最后个角色又再会有啲转变，佢会以强人嘅姿态回归，咁到底佢最后系企喺阿久𠮶边，定还是返番以前同佢对立呢？最后最重要嘅一点，系久哥最后可唔可以放低到沈盈，去同阿铁有个新开始呢？”
麻雀乐团｜一家三口温馨合奏
场口先由久哥说出开场白：“听住呀老婆”，再深情弹奏与亡妻的定情歌《与我常在》；之后亡妻（庄易羚饰）沈盈徐徐步入，久哥则淡定又激动地说：“嚟咗呀？我好挂住你。”一面感动及心痛的沈盈，先是装作淘气问久哥：“仲以为你呢世人都唔会弹得晒成首歌添”，之后再自责又柔情地问：“有个问题我一直都好想问你，其实当初我咁样走咗去，一直都冇返过嚟，你有冇嬲我？”久哥听毕笑著哽咽：“我从来冇嬲过你㖞，我仲要多谢你添，因为你将家明带嚟呢个世界度，我真系好开心”、“我冇谂过我司徒久会做爸爸，个女仲要咁生性！”之后，二人淘气地争著说家明似自己，然后沈盈再强忍伤痛说：“阿久，我唔可以留喺度陪你喇”、“家明走咗，得番你一个”；久哥闻言抛出极催泪Bite：“傻猪嚟架，我脑里面有个掣，只要我一揿，就可以即刻见到你哋，无论你哋去到边度，或者我挂住你哋，都一定可以见到你哋。”将全剧推向高潮。